الموضوع: بعد ما دفعت المخالفة..أفتكرت نيابة المرور و أيامها...

السلام عليكم.........

أخباركم ايه؟؟؟ امبارح دفعت المخالفة اللي كانت عليه اللي حكيتلكم عليها في الموضوع ده


و الحمد لله نزلتلي 150 ريال بس (225جنيه) مش 300 (450جنيه) و قدر و لطف..........

واه لو أحكيلكم على المعاناه في دفع المخالفة و البهدلة...القصة بدأت لما خطر في بالي أدفع المخالفة لحسن الوقت يسرقني و يفوت عليها شهر و ساعتها بتصبح الضعف تلقائيا بدون انذار فقلت الطيب أحسن...

و هنا بدأت المعاناه مع المرور....أضطريت أختار ماكينة صراف ألي شكلها يكون عاجبني و رحت بالعربية ركنت جنبها و فتحت الشباك ومن جوة العربية حطيت كارت البنك و كتبت الرقم السري و أختارت من القائمة سداد مخالفات المرور و أدخلت رقم بطاقتي الشخصية السعودية (14 رقم شوفوا تعبوني قد ايه و انا بأنقلهم بس الحمد لله كنت محضن عالماكينة كويس و ما مديتش أيدي أوي يعني)

و فعلا طلعتلي المخالفة و أخترت خدمة السداد فقالي لقد تمت العملية بنجاح الرجاء الأحتفاظ بالايصال و أخد البطاقة و خدتها و مشيت.........الموضوع ده كان الساعة حداشر بالليل كده كنت نازل اتمشى شوية بالعربية و أجيب شوية حاجات......................

طبعا مجهود ذهني و عضلي خيالي و تعب و أجازة من الشغل و ارهاق و كتابة أربعتاشر رقم و رقم سري بهدلة طبعا....................!!!!!!!!!!!

ليه الدنيا ما تبقاش كده في مصر!!!!!!!

فين الحكومة الالكترونية!!ده انا لما كنت أروح مرور فيصل أرخص عربية جديدة أو أجدد أو أعمل اي معاملة كنت بأخد حد معايا علشان يقف في الخزنة و من بدري على ما أخلص فحص و تأمين و كده و ايصال بكربون أحمر و أصفر و لا باين منه حاجة مليان شخبطه و لازم حضرتك تستنى لما الحاجة الموظفة تحسب المسلسل و الاجمالي و تخلص الأربع ايصالات و تقطعهم بالمسطرة في نص ساعة و تدي لكل واحد الوصل بتاعه!!!!!أسوء ايصالات سداد في العالم و هيه نفسها في الشهر العقاري في الكليات في أحته حكومية!!!الاربع ايصالات اللي في الورقه دول و الجمع و الطرح اليدوي!!

ايه المشكلة لو لغينا الطوابر في معظم الأشياء و وفرنا شوية وقت لأولادنا و شغلنا و حياتنا ليه لازم نتبهدل!!ترجع من المرور ممسوح بيك الأرض ترجع من أي جهة حكومية مش طايق نفسك من اللي أتعملك!!

نظام الشبكة السعودية ده نظام بسيط عن طريقه تستطيع أنك تدفع مخالفات أو أيي رسوم حكومية أو رسوم تجديد الأقامات أو استخراجها أو فواتير الكهرباء او فواتير الموبيل لأي شركة موبيل أو حتى قيمة مشترياتك من على الكاشير في المحلات اللي تقبل الدفع بالبطاقة و غيرها كتير جدا جدا من الخدمات.........

و يكفي ان كل الخدمات متاحة من أي نوع ماكينة لأي نوع بطاقة يعني بطاقة صرف بنك سين ممكن تسحب من ماكينة بنك عين أو نون أو ميم و العكس صحيح.........

و سلملي عالطوابير.......

وحشتيني يا نيابة المرور و الشبابيك الحديد و العسكر يطلع يلم الرخص و يدخلها لوكيل النيابة و يطلع ينده عالأسامي و الناس تبعتلك رخصتك لأنه فيه خمسين واحد عالشباك كأنهم متشعبطين في مقام السيدة أو الحسين بس لازم يلزقوا في الشباك و الزحام و الدكك الخشب اللي عملوها مؤخرا للناس اللي جاية في الساحة منهم للكوبري عدل ولا مبني ولا زف هوه كده عالرصيف و اديها........


الشكوى ليك يارب................رجع بلدنا زي ما كانت أحلى بلد في الدنيا........

برضه بنحبك يا مصر.................وحشتيني...خلاص هانت

اسف عالأطالة