ما معنى غرزة مقفوله ؟

**r0xer** · 11-10-2009 08:03 PM

المشاركة الأصلية كتبت بواسطة mmamdouh

you are right

mmamdouh

ياممدوح باشا هل الصح إنه يقفلها عشان يخش فيه ولا يهدي شوية ويعديه؟ يعني مش بنتكلم عن عادات الشعب الأصيلة بتاعتنا :d لكن هل عالميا ايه المعايير المتبعة في حاجة زي كدا؟ بتقفل عليه الغرزة ؟ طب أفرض مقدرش يفرمل وكان اخد قرار خلاص انه ياخدها يقوم يلبس فيك ويموتك بدل ماتفرمل وتهدي شوية؟

انا عن نفسي دايما بعمل عكس اللي بتقولو عليه...ودايما بهدي للي جاي ياخد الغرزة خوفا على نفسي أولاً وهو طظ فيه.

أنت أيه رأيك ؟

**evoo90** · 11-10-2009 08:40 PM

والله انتوا واجعين دماغكوا على الفاضى وبجد على حاجه تافهه جدا عملتوها فيلم ومسكتوا فى بعض وخربتوا الدنيا
الغرز بتختلف من سواق لغشيم
السواق بيبقى راجل فاهم وواعى وقبل مايعمل غرزه بيفكر كذا مره ويقيس مسافات وسرعات ويدرس الطريق كل ده قبل مايعملها
اما الغشيم عايز يجرى وخلاص ماتوجوش دماغكم على حاجه مش مستاهله هو ده المفيد السواق سواق فى كل شيئ والغشيم غشيم فى كل شيئ بس كده

تم اعاده فتح الموضوع
مشرف عام 3

**MMamdouh** · 12-10-2009 02:18 AM

المشاركة الأصلية كتبت بواسطة r0xer

ياممدوح باشا هل الصح إنه يقفلها عشان يخش فيه ولا يهدي شوية ويعديه؟ يعني مش بنتكلم عن عادات الشعب الأصيلة بتاعتنا :d لكن هل عالميا ايه المعايير المتبعة في حاجة زي كدا؟ بتقفل عليه الغرزة ؟ طب أفرض مقدرش يفرمل وكان اخد قرار خلاص انه ياخدها يقوم يلبس فيك ويموتك بدل ماتفرمل وتهدي شوية؟

انا عن نفسي دايما بعمل عكس اللي بتقولو عليه...ودايما بهدي للي جاي ياخد الغرزة خوفا على نفسي أولاً وهو طظ فيه.

أنت أيه رأيك ؟

هو مفيش قاعدة عامة تحكم الموضوع دة لان كل مرة بتبقى الظروف مختلفة... يعنى ممكن ببساطة تبقى عايز تاخد قرار قفل الغرزة على واحد بس انت شفتة متاخر او لقيتة مندفع بشدة فا مش حيلحق يلم نفسة بالتالى الرار الصح هو انك توسعلة... و العكس بالعكس لو شايف ان فيه مسافة ووقت كافيين لغلق الغرزة يبقى تقفلها عشان متتحطش انت و هو فى موقف حرج ممكن يؤدى لحادث

انا قلت رائى بافتراض ان الموقف يسمح بغلق الغرزة و دى ترجع لتقدير السائق بس طبعا مش معنى كدة ان يبقى هو دة القرار فى كل موقف لانة ببساطة ممكن يكون هو السبب فى وقوع الحادث

عموما الحل الاسلم انك تبقى اصلا ماشى من غير ما تدى مساحة تدى فرصة لحد ياخد منك غرزة لا مفتوحة ولا مقفولة... يعنى تبقى بينك و بين العربيات حواليك مسافة واسعة تسمح لاغشم غشيم انة يعدى بدون مشال.. و اللا تحافظ على مسافة صغيرة لا تسمح لاحد انة يفكر يحشر نفسة فيها

MMamdouh

**pro_samir** · 12-10-2009 03:45 AM

المشاركة الأصلية كتبت بواسطة evoo90

[size=4]
السواق بيبقى راجل فاهم وواعى وقبل مايعمل غرزه بيفكر كذا مره ويقيس مسافات وسرعات ويدرس الطريق كل ده قبل مايعملها

علي فكرة التردد فى الحاجات دي بيودي فى داهية
يعني احسبها و يا أة يا لأ .. انما هدخل مش داخل هدخل مش داخل غالبا بتكون العواقب مش حلوة
أبسط ما فيها هتلاقي نفسك اتحشرت وترزع فرامل محترمة

لو قلقت يبقي بلاش منها أحسن وخلاص ، ومتخليش كلام اللى جنبك يأثر عليك لو خدت قرار وشايف انة صح

**Dr_Smart** · 12-10-2009 05:17 AM

المشاركة الأصلية كتبت بواسطة terrible_darsh

فى علم النفس تكوين الشخصية بيعتمد على جزء كبير من المؤثرات اللى اقتنع بها العقل البشري .

يعنى افلام الاكشن و السباقات و السرعة بتاثر فى شباب كتير لدرجة اانهم بيتمنوا يكونوا ابطال فى السواقة لاسلوب ممنوع اساسا و غلط و الغلطة فيه بتسبب كوارث ..

حتى بالامارة اى حد فى الدنيا بعد لما ياخد غرز سواء مفتوحة او مقفولة بعدها بيحس انه عمل حاجات ملهاش لازمة بس عملها و خلاص ..

المرور فى مصر عايز يتفور كله .

فين الاعلانات التحذيرية من السرعة على شاشات التليفزيون !!! ( زى السعودية ) ؟؟

فين اعلانات القيادة الامنة و الهادئة و احترام الاخرين !!

فين و فين و فين !؟؟ و لا احنا فالحين فى اننا نعمل اعلانات 0900 و نبدع فيها و خلاص ؟!

الحل موجود و لو فى حد مهتم بتحسين البلد دى كان اتحرك من زمـــــــــــــــــــــــ ان :(

انا شايف ان الاعلانات هتبقى فلوس كتيره ومصالح مع شركات الاعلانات زي الاعلانات التافهه بتاعت هيئة السكه الحديد وماحدش بيسمع

الاهم من الاعلانات التواجد الامني ... لما بسوق في الكويت على الطريق السريعه ببقى في منتهى الالتزام لأني دايما حاسس ان المرور زي العفريت وممكن يطلعلي من اي حته واللي بيتمسك بسبب الرعونه والقياده المتهوره بتبقى ليلته بيضا ... مره كنا في شارع داخلي مش سريع وصاحبي رجله تقلت عالبنزين العربيه فركت في الطلعه والله العسكري ( مش الظابط ) بهدله وسحب الرخص

**evoo90** · 12-10-2009 06:54 AM

المشاركة الأصلية كتبت بواسطة pro_samir

علي فكرة التردد فى الحاجات دي بيودي فى داهية
يعني احسبها و يا أة يا لأ .. انما هدخل مش داخل هدخل مش داخل غالبا بتكون العواقب مش حلوة
أبسط ما فيها هتلاقي نفسك اتحشرت وترزع فرامل محترمة

لو قلقت يبقي بلاش منها أحسن وخلاص ، ومتخليش كلام اللى جنبك يأثر عليك لو خدت قرار وشايف انة صح

مظبوط اللى يقلق مايعملهاش لازم اللى يعملها يكون قلبه جامد وواخد باله كويس قوى وواثق من نفسه عشان ثقته لو اتهزت يبقى راح فى داهيه

**bmw323** · 12-10-2009 07:05 AM

خلاص ياجماعة كلنا نودع الغرز
(علشان المصرى ألى على حق يقول للغرز لأ) ههههههههههههههههههههههههه هه

**ahmed-moga** · 12-10-2009 09:28 AM

الناس اللي بتعمل الغرز دي.....تتساوى تماما مع القاتل المتعمد ولازم يكون فية قانون في بلدنا علي الأقل يعاقب علية زي السير في عكس الأتجاة في قانون المرور الجديد وموضوع الغرزة دة كان هايحصل معايا مرة واحدة مع سائق تاكسي العاصمة كنت شايفة جاي من اليمين وحسيت انة ناوي ياخد غرزة وتأكد احساسي لما بدأ ياخد الغرزة المقفولة مابين عربية نص نقل وعربية مقطورة ماشين في نص الطريق ومش عارف اية استهتار سواقين النقل دة ازاي يمشى في نص الطريق والطريق يعتبر مش واسع وكان جاي عليا في الشمال لأن الشمال قدامي كان فاضي وكان في مسافة لما يطلع من الغرزة هايكون امامي مباشرة وكنت ماشى علي 95 ك وحسبت الموضوع في سرعة البرق وقررت اني اهدي السرعة وخصوصا مكنش حد ورايا لا في الشمال ولا في النص ولا في اليمين وقررت اروح اليمين لأني حسيت ان السواق دة متهوروهايعمل حاجة هاتودى الكل في داهية وبالفعل حصل الي توقعتة سواق المقطورة هدي شوية في اثناء سواق التاكسي وهوبياخد الغرزة المقفولة علشان كان في واحد في اليمين قدام عاوز يروح للشمال علشان كان في يوترن وتقريبا كان ماشي غلط وعايز يصلح اتجاة ويرجع تاني ودة كان في طريق الفيوم وطبعاانتم توقعوا الباقي لما هدا سواق المقطورة وسواق التاكسي بياخد الغرزة المقفولة وسواق النص نقل جاي وراة مش عايز اقولك العربية التاكسي حصلها اية الجنب الشمال بقي مع اليميت على التوازي وبعدين اترميى النص نقل علي الشمال والحمد الله والشكر لله انا كنت بقيت في اقصي اليمين ومكنش حد في الشمال وطبعا كل اللي في التاكسي ماتوا الله يرحمهم وبقي زنبهم في رقبة السواق الله يرحمه هوا كمان علشان كدة بقول اللي بيعمل غرز لازم يتعاقب عقوبة القاتل المتعمد ولازم يكون في عقاب رادع

-

الموضوع: ما معنى غرزة مقفوله ؟

LinkBack

أدوات الموضوع

عرض

-

-

-

-

-

-

المواضيع المتشابهه

غرزة موت !!!!!!!!!!

اعمل غرزة بفرامل اليد

غرزة شيك .... غرزة بنت ناس.... غرزة محترمة...!

هوايات التكييف فى النوبيرا بتدخل هواء و هى مقفوله

الهوندا سيفك مقفوله على 215 كم

الكلمات الدلالية لهذا الموضوع

المفضلات

المفضلات

ضوابط المشاركة