عايز اوصل للمهندسين من المؤسسة

**hapepeyaa133** · 09-10-2009 04:17 AM

السلام عليكم ورحمة الله وبركاته
لو سمحتم ياجماعة انا من خارج القاهرة بس اقدر اوصل للمؤسسة (شبرا)مدخل القاهرة يعنى ومعايا عربية ياريت لو سمحتم تتكرموا وتقولولى ازاى اوصل للمهندسين؟ وياريت بقى تكملو جميلكم وتعرفونى ازاى اوصل لمسجد د .مصطفى محمود وجزاكم الله كل خير .لو سمحتم ياجماعة يكون الرد قبل السبت لانى مسافر السبت ان شاء الله

**A.Saad** · 09-10-2009 06:28 AM

كمل على الكورنيش
ممكن تاخد كوبرى روض الفرج
وتعديه
وتاخد المنزل اللى فى اليمين بعد النيل
وتكمل على كورنيش العجوزة
لحد ما توصل لميدان الكيت كات ما تنزلوش
كمل من فوق النفق هتلاقى ش 26 يوليو اللى فيه كوبرى مايو
ادخل من جنب الكوبرى
هتبقى فى ش احمد عرابى
ادخل فيه ولف وارجع من اول U turn
هتوصل عند الكوبرى تانى
هتدخل ش جامعة الدول اللى هوة واسع على اليمين
هتمشى فيه
هتلاقى سور نادى واخره
البنك التجارى الدولى
امشى شوية
هتلاقى مسجد مصطفى محمود على الناحية التانية

**hapepeyaa133** · 09-10-2009 04:18 PM

الف شكر ياجماعة لاهتمامكم وسرعة الرد
طيب انا اقدر اوصل لكوبرى قصر النيل اعديه؟ وابدأ اسال؟ معلش بس عشان هى دى الاماكن اللى انا اعرف اوصلها
طيب لما اعدى كوبرى قصر النيل اسال بعد كدة على ايه الناس تقدر تفهمنى
والف شكر ليكم ياجماعة

**M.FOUAD** · 09-10-2009 09:21 PM

المشاركة الأصلية كتبت بواسطة hapepeyaa133

الف شكر ياجماعة لاهتمامكم وسرعة الرد
طيب انا اقدر اوصل لكوبرى قصر النيل اعديه؟ وابدأ اسال؟ معلش بس عشان هى دى الاماكن اللى انا اعرف اوصلها
طيب لما اعدى كوبرى قصر النيل اسال بعد كدة على ايه الناس تقدر تفهمنى
والف شكر ليكم ياجماعة

الافضل ليك عند المؤسسة هتلاقي مطلع الطريق الدائري هتلاقي لوح كثير موضحالك المطلع بالضبط هتفضل ماشي لحد ما تلاقي منزل محور 26 يوليو و خلي بالك فية اتنين اول واحد ل 6 اكتوبر خد التاني اللي نازل المهندسين و بعد كدة ازل اول منزل يقابك على اليمين منزل شارع السودان هتفضل ماشي فية لحد ما يقابلك شارع بالعرض تحت الكوبري هو دة جامعة الدول شوية و هتلاقي جامع مصطفى محمود على ايدك اليمين قي نص الشارع تقريبا
لو عايز تييجي من قصر النيل هتفضل ماشي زي ما انت و تخش على شارع التحرير و بعد كدة اسال على شارع البطل احمد عبد العزيز هتلاقة تحت كوبري بالعرض خش يمين و كمل علطول لحد ما يقابلك جامعة الدول في اخرة هتلاقي جامع مصطفى محمود شمالك لان الشارع هياخدك لليمين

**hapepeyaa133** · 11-10-2009 12:49 AM

المشاركة الأصلية كتبت بواسطة FOUAD NOUR

الافضل ليك عند المؤسسة هتلاقي مطلع الطريق الدائري هتلاقي لوح كثير موضحالك المطلع بالضبط هتفضل ماشي لحد ما تلاقي منزل محور 26 يوليو و خلي بالك فية اتنين اول واحد ل 6 اكتوبر خد التاني اللي نازل المهندسين و بعد كدة ازل اول منزل يقابك على اليمين منزل شارع السودان هتفضل ماشي فية لحد ما يقابلك شارع بالعرض تحت الكوبري هو دة جامعة الدول شوية و هتلاقي جامع مصطفى محمود على ايدك اليمين قي نص الشارع تقريبا
لو عايز تييجي من قصر النيل هتفضل ماشي زي ما انت و تخش على شارع التحرير و بعد كدة اسال على شارع البطل احمد عبد العزيز هتلاقة تحت كوبري بالعرض خش يمين و كمل علطول لحد ما يقابلك جامعة الدول في اخرة هتلاقي جامع مصطفى محمود شمالك لان الشارع هياخدك لليمين

الف شكر ياباشا بس اللى حصل وكان كوميدى جدا النهاردة انى نزلت اول منزل بتاع 6 اكتوبر وفضلت ادور ع ملف وطبعا كان اول ملف بعد حوالى 13 كيلو

بجد كانت حاجة تزهق جامد واعتقد انى اخدت الملف ده من الصحراوى

يالا بقى محدش بيتعلم ببلاش
الف شكر ياجماعة وشكرا لاهتمامكم وسرعة الرد

**Youssef.Awad** · 11-10-2009 01:33 AM

شكل سعادتك جاى من خارج القاهرة فالافضل ليك وراحتك بعيد عن زحمة وقرف ومتاهة السواقة داخل شوارع القاهرة
تاخد الطريق الدائرى يمين اول ماتوصل لغبور قليوب
بعد سكانيا عالطول ادخل اول طريق يمين ومكتوب تقريبا على سهم (الى القناطر الخيرية)

هاتطلع الدائرى وتفضل ماشى تقريبا ربع الى تلت ساعة لحد اما تلاقى يافتة مكتوب عليها (ميدان لبنان يمين)

!!! هنا بقى هدى سرعتك قوى وخلى بالك عشان الغلطة هنا هاتكلفك اكتر من 30 كم ونص ساعة ع الاقل زيادة

اول نزلة يمين عند اليافتة هاتوديك المحور ومنها على طريق اسكندرية الصحراوى وكارفور والذى منه ... سيبك منه

يمين التانى اللى بعده عالطول هايدخلك على ميدان لبنان ومنها تلاقى نزلة شارع السودان الاول (احسن لك تنزلها) وبعديها بواحد كم آخر نزلة يمين على شارع لبنان
لما تنزل شارع السودان يمين سوق عالطول لحد اما يقابلك شارع جامعة الدول العربية من اوله تحت الكوبرى فتدخل شمال من تحت الكوبرى
وتفضل ماشى طوالى فى جامعة الدول لحد اما تلاقى جنينة مثلثة كده على ايدك اليمين فى نصف الشارع تقريبا
ورا الجنينة عالطول جامع مصطفى محمود

وطبعا طريق العودة نفسه وتروح وتيجى بالسلامة انشاء الله
وبلاش تدخل من الكورنيش وكبارى وهيصة داخل القاهرة