حكايتي مع صيانة ال10 تلاف....

**All_New_Cerato** · 09-10-2009 02:21 PM

امبارح روحت ابورواش (ويارتني ماروحت) , لفيت الكرة الارضيه و مشيت في مدقات بس عشان كنت محتاج اركب حاجات والتركيب في ابو رواش بس...

المهم كنت هعمل صيانة ال10 تلاف وكنت عاوز اركب ريموت و سينسور بارك, فضلت قاعد 4 ساعات مستني (قمة الملل-انصح اي حد يروح انه لازم ياخد حد معاه يونسه و ميروحش لوحده و يكون معاه لاب توب او موبيل يدعم WIFI عشان ميحسش بالوقت)

نيجي بقي للحساب:
360 غيار زيت و فلتر و 600 الريموت, ايوه فعلا 600 جنيه
هو كده ولا كده المهندس كان قالي انه بالتمن ده بس انا كنت فاكره بتاع العربيه ال ex اللي بينزل معاها وللاسف طلع عادي زي اللي بيتجاب من اي محل ب 150-200 جنيه

بجد مكنتش عارف ارد اقول ايه اتكلمت, قولت للمهندس انه مش بتاعها كان رده بكل هدوء (هي مش نازله بالدايره بتاعته!!)

استعوضت ربنا في اللي ادفع و لومت نفسي اني متاكدش من حاجه زي كده من الاول

المهم قولت مدام خربانه خربانه اسال عن الدوسات الاورجنال بتاعنها واجيبها قاللي ب 100 جنيه
قولت مش مشكله تستاهلهم, المهم دخلت مكان الspare parts وقولت للراجل اللي هناك ورهاني اشوفها الاول (منا كنت لسه كاعع 600 جنيه في حاجه ماتستهلش 200 جنيه) المهم لما ورهاني لقاتها عاديه جدا مش بتاعتها المكتوب عليها سيراتو واللي متفصله عليها, قولتله شكرا دي بتتباع بره بخمسين جنيه.

الخلاصه ان التوكيل غالي في كماليات العربيه بدرجة بشعة ويارتها كماليات العربيه الاصليه
وبالنسبه للسينسور بارك مكنش موجود اصلا.

**elmoski** · 09-10-2009 02:35 PM

طب منا لسة كنت بعمل صيانة الف هنا في اسكندرية والتوكيل موجود في الكيلو 24 . المهم غيرت زيت وفلتر ب 270 بس وسألت علي الريموت والانذار كان عامل 315 بس مش عارف بقي بالتركيب ولا لأ وهل ممكن بالتركيب يوصل لل 600 متهيألي استحالة ولا ايه ؟