عرض للطباعة
السلام عليكم يا شباب
ايه الأخبار ؟؟ يارب يكون كله تمام
انا كنت شارى العربيه من سنه تقريبا (قسط ) فاترخصت سنه واحده باسم والدتى (لأنى كنت لسه متمتش 21 ) وتاريخ انتهاء الترخيص يوم 18 \10 الجاى ده
انا عاوز اعمل بقى الحجات دى :
ادفع باقى الأقساط و ارخص 3 سنين
وانقل ملكليه العربيه باسمى من والدتى
ممكن تفيدونى ايه الأجراءات اللى بتحصل ؟؟وايه بيتعمل قبل ايه ؟؟ وقدامى مهله اد ايه عشان ارخص ؟؟ولو عديت المهله دى بيكون الغرامه فى حدودكام ؟؟
وجزاكم الله خيرا
متاااااااابع
لو حضرتك مقسط مع بنك يبقي لازم تسوي الاقساط مع البنك الاول
لان في حظر بيع علي الرخصه فامش هتقدر والدتك تبيع العربيه
ليك او لاي حد الا بعد تسديد الاقساط
طيب يا استاذ معتز انا هسدد باقى الأقساط وساعتها ( على قد ما فهمت ) ان البنك بيبعت جواب للمرور يسمحلى بالترخيص 3 سنين ( ولوكنت بسدد الأقساط عادى زى منا بيبعتله جواب برده يسمح بالترخيص بس سنه واحده
الخطوه اللى بعد كده بقى انى اروح الشهر العقارى مع الوالده و يتم البيع و بعدها اطلع ع المرور ارخص ال3 سنين بإسمى ولا انا كده فهمت غلط ؟؟
ارجو الأفاده
ما دام البنك ليه فلوس هيفضل الحظر موجود و والدتك مش هتقدر تنقل ملكيه العربيه ( بيبقي مكتوب علي الرخصه حظر بيع )
و موظف الشهر العقاري مش هيرضي ينقل ملكيه العربيه
يعني لو الاقساط هتمشي عادي مش هتقدر تعمل حاجه
تمام يا معتز باشا
يعنى دلوقتى اللى هيتعمل
1 - تسديد الأقساط و رفع الحظر
2 - نقل ملكيه
3 - ترخيص
بس السؤال .. لما الحظر يترفع بيكون معايا جواب يفيد بكده بحيث اوريه للموظف فى الشهر العقارى فيمشى فى اجراءات نقل الملكيه ؟؟ولا لازم حاجه بتتعمل فى المرور الأول ؟
معلش صدعتك معايا انا عارف :)