عز العرب للانتاج السينمائي تقدم
فيلم الموسم وكل موسم
الصيانه في التوكيل
بطولة
جيجي موديل 2008 مانيوال
ساري ربيع "موديل 78"
باقي الابطال حسب الظهور
موظف الامن
مهندس استقبال بدقن معرفوش
المهندسه ايمان
الأخ العزيز/ هيثم jisso82
فني الكهربا
فني الميكانيكا
محاسب/احمد
موظف تسليم السيارات
البداية يا جماعة كانت لما سمعت الاعلان بتاع الفيلم
.
.
تهامي بااااااااشا
انا جايبلك فيلم الموسم يا باااااشا
.
.
قصر يا وديع
فيلم ايه ده .....؟
.
.
يا باشا فيلم هيكسر السوق لا تقوللي غبوووور ولا منصوووور
.
.
قولتلك قصر يا ودييع
.
فيلم لعربيه ماليزي داخله سباق جامد قوي مع ماركات عالميه
.
ماليزي ايه يا وديع وسباق ايه بقا احنا عندنا شيروكي وسيتروين تقوللي ماليزي يا وديع انت عاوز تخرب بيتنا يا وديع شكلك كدا عاوز فيلم فيه بنزين كتير
قوللي يا وديع ... وانا افيدك
خد يا وديع .. اعمل الفيلم ده
فيلم
الصيانه في التوكيل
عز العرب للانتاج السينمائي
افلام عربي .... أم الاجنبي
عربيات اجنبي ...أم العربي
وعلشان كده قولت ادخل الفيلم ... روحت على سينما الصحراوي ف ابورواش وسمعت الفيلم .........
المشهد الاول
جيجي جايه من بعيد داخله التوكيل من البوابه بتتمختر وبتقول مفيش حد بجمالي وجايه اتظبط
وساري يتمتم بصوت خافت "ابقي تعالي قابليني" "عشم ابليس ف الجنه""يا منجي الوحش من الجحش" وف الاخر قال ربنا يستر ودخل التوكيل هو وجيجي قابله موظف الامن وقاله انت حاجز .. قاله ايوه .. قاله اتفضل تحت التانده
دخل ساري وجيجي الساعه 11 وربع تقريباً وكان فيه مهندس بدقن معرفوش بياخد الملاحظات على عربيه جايه قبل جيجي
نزل ساري وحب يقف مع صاحب العربيه والمهندس اهو يشوف ايه اخر مشاكل العربيات والصيانه ويا عيني ملحقش يقف 10 ثواني ولقا المهندس بيبص له بصه طويله وبيقوله بصوت غليظ ممكن تقف عند عربيتك لما أخلص
ساري حس انه ف لجنة امتحان والمراقب مش عاوزه يبص ف عربية اللي جنبه خد بعضه وراح وقف مع جيجي
5 دقايق وجات المهندسه ايمان بابتسامه جميله ودوده وقالت حاجز باسم مين وايه المشاكل ؟
ساري قالها :
1- صيانة ال15 الف
قالت بابتسامه جميله هنعملهالك انشاء الله
2- المالتي فنكشن المفروض يتغير من صيانة ال10 الاف وقولتولي مفيش مالتي دلوقتي واول مييجي هنكلمك وطبعا معبرتونيش.
قالت بابتسامه جميله وتقريبا مش هنعبرك المره دي كمان
3- الازاز الشمال بتاع السواق ساعات بيعلق اجي افتحه ميفتحش الا بعدها بدقيقه
قالت بابتسامه جميله مش هينفع نحل المشكله الا لو موجوده دلوقتي يعني لو الازاز معلقش دلوقتي مش هنقدر نعملك حاجه
4- الدبرياج عاوز يعلى
قالت بابتسامه جميله نعليه
5- العربيه بتسقف والسحب ضعيف
قالت بابتسامه جميله مش هنخليها تسقف
قولت ف سري "اكيد على آخر الصيانه مش هتسقف دي هتلطم":majd(4):
6- الفانوس اليمين مش ثابت ف مكانه وشكله مش عاجبني
قالت بابتسامه جميله مش هينفع نعمل فيه حاجه لازم الفانوس يتغير كله والفانوس ب 1200 جنيه نغيره ؟
قولتلها لا دا كده شكله جميل قوي دا انا بفكر اعمل الفانوس الشمال زيه بالظبط
سجلت الملاحظات اللي فاتت واللي لقيت ان معظمها مش هيتعمل فيه حاجه وقالتلي امضي قولتلها هستلم الساعه كام قالتلي الساعه 5 قولتلها ليه دا مفيش غير الصيانه والباقي حاجات بسيطه قالتلي ربنا يسهل على 4 كده
ودي كانت نهاية المشهد الاول
المشهد الثاني
دخل ساري الاستراحه يدور على هيثم jisso82 الدينامو القادم لمنتدى نايل موتورز والشخصيه الطيبه الجميله اللي كان بيعمل صيانة ال5 الاف للبيرسونا اهو يدردش معاه ويطمن على اخباره وبعد مناقشات عن جيجي والجميله بيرسونا واخبار التوكيل واخبار المنتدى قام ساري يطمن على جيجي لقاها دخلت تغير زيت رجع ساري لهيثم وكمل دردشه وساعه ورا التانيه وفجأه رن الموبيل بتاع ساري بص ساري لقاها نمره غريبه قال استر يا رب اكيد التوكيل رد ساري على الموبيل جه صوت المهندسه ايمان بابتسامه جميله بتقوله استاذ ساري فلتر البنزين لازم يتغير نغيره قال بعد ما اصفر لونه غيروه قالتله الفلتر ب 170 جنيه قالها والكلمه مش قادره تطلع من بؤه ماشي لكن ف سره كان بيقول "كلام تاني" وقال للمهندسه ايمان ممكن حد يبص ع الاكصدام الامامي علشان فيه كام كلبس عاوزين يتركبوا قالتله ماشي ودي كانت اول تعويره لساري ب 170 جنيه
راح ساري لهيثم يشتكيله حاله ولسان حال هيثم بيقول انتم السابقون وبعد كام بصه على جيجي للاطمئنان ساري لقا جيجي راكنه بقالها 45 دقيقه محدش معبرها راح للمهندسه ايمان قالها جيجي بقالها اكتر من ساعه الا ربع محدش معبرها قالتله بابتسامه جميله اه ولسه هتقعد كمان شويه علشان مفيش كهربائي فاضي لأن اكتر من كهربائي مجاش النهارده جه هيثم وسلم على ساري وقاله انا الحمد لله خلصت ومشي هيثم وساب ساري وسط الذئاب"ينفع اسم فيلم جامد"
المهم ساري قال القعده شكلها كده هطول خد بعضه وعلى داندي مول وكارفور .
المشهد الثالث
رجع ساري ع الساعه 5 الا عشره لقا المهندسه ايمان ماشيه قالها ايه الاخبار قالتله عربيتك جايه اهه كانت بتتجرب قالها طيب فيه حد بص على الاكصدام قالتله بابتسامه جميله يا خبر ... نسيت وبعد ما جه الفني بتاع الكهربا اللي كان بيجرب جيجي قال الدبرياج ده لسه عاوز يتظبط بس للأسف الساعه دلوقتي 5 والفنيين مشيوا قالت المهندسه ايمان بابتسامه جميله انا لازم امشي حالا ونادت على المهندس زميلها اللي بدقن وقالتله ابقى سلمه العربيه
بصراحه المهندس ذوق جداً وقال لساري هشوفلك فني يبصلك ع الدبرياج وبعد مداولات جابلي الفني بتاع الميكانيكا وقاللي انت قولت علو الدبرياج علناه وهو كده احسن حاجه للعربيه لأن كان فيه بوش ف الدبرياج وظبطناه المهم سمع ساري الكلام بس حس كده ان الناس بتزحلقه علشان الساعه جات 5 المهندس قفل الورق لساري وبعته للاستاذ احمد بتاع الحسابات
المشهد الرابع
راح ساري على الاستاذ احمد بتاع الحسابات وطبعا كالعاده مكنش طايق نفسه علشان معظم الناس مشيت وهو اللي قاعد وبعد شوية شغل وحسابات ف الورق وعلى الاله الحاسبه وساري بيقرا اية الكرسي قال الاستاذ احمد لساري عاوزين 492 جنيه ويا ريت فكه علشان مفيش فكه يا استاذ
ساري بلع ريقه وطلع ال 500 جنيه زي الباشا وخد الباقي وخد اذن الخروج ومعاه موظف تسليم السيارات وساري خارج بيبص ف الورق لقاهم كاتبين ان المالتي فنكشن اتغير رغم ان المهندسه داليا قالتله مفيش مالتي فنكشن واتصل بينا يوم السبت علشان نقولك تيجي امتى تركبه فرجع للمهندسه داليا وقالها هو المالتي اتغير ولا اتنضف ؟ بصت في الملف لقت انه اتنظف بس فغيرت ف الورق وقالت انه يحتاج مالتي فنكشن وقالتله اتصل يوم السبت
المشهد الأخير
الساعه 5 ونص وجيجي خارجه من البوابه بسرعه بتقول الحمد لله اني نفدت وساري بيعد الفكه اللي باقيه في جيبه .
:36_7_4[1]:
وبينزل التتر بتاع الفيلم وتهامي باشا بيقول
هو دا يا وديع .. اخيراً .. اخيراً فهمتني يا ودييييع
والى اللقاء في افلام اخرى ....
:36_1_31: