ليه حرب اكتوبر مكانتش يوم 8 اكتوبر احسن؟
كنت في مصر الاسبوع اللي فات وكنت مع واحد قريبي ومجموعة من اصحابه (عمره 36 سنة مواليد 73) وهو موظف حكومي متثبت من سنتين بعد ماكان شعال مؤقت. المهم كانت الدكتورة عبلة الكحلاوي في التليفزيزن بتتكلم عن البطولات وفكرة خراطيم المية اللي هدمت خط بارليف وفعلا بطولات الواحد كان فخور وهو بيسمعها وكنت بتمنى اكون عايش في الفترة دي اللي الناس كلها اتحدوا فيها على قلب رجل واحد. وإذ بقريبي يعترض ويقول يعني مكانوش عبروا يوم 8 اكتوبر عشان ناخد الخميس والجمعة والسبت اجازة والمصيبة لقيت اصحابه عاجباهم الفكرة وواحد تاني قال يعني هي الحرب كانت يوم واحد المفروض ناخد اسبوع أجازة على الأقل، المهم انا قلت لقريبي حلو (البؤ) ده بس خلينا نسمع الكلام الحلو ونترحم على الأيام الحلوة
لقيت قريبي بيتكلم بجد وقالي المفروض كدا كدا ناخد الخميس اجازة لو حتى بدل الثلاثاء فيها ايه لما الحكومة تعمل كدا وبدأ في محاضرة عن الحكومة اللي مابتفكرش في الناس ومبتريحش الناس وطلع بيتكلم بجد
سألته هو يوم 6 اكتوبر بالنسبه ليه ايه، قالي اجازة وخلاص اللي عبر عبر ومش احنا اللي استفدنا من الحرب و و ..... وكلام كتير مينفعش يتقال
الخلاصة انا واحد رغم اني ناقم جدا على الأوضاع في البلد بس بشوف يوم زي 6 اكتوبر بيعدي كدا من غير ما نعلم الشباب والأولاد معنى الكرامة ويمكن هو دا اليوم اللي الوحدا بيحس انه ليه احترام وكيان فيه بدل مستنقع الإحباط اللي عايشين فيه
اه نسيت اقولكم قريبي بشكل ما ضرب الأربع والخميس اجازة بعد الثلاثاء وكدا هو تمام التمام ثلاثاء واربع وخميس وجمعة وسبت وكل ذكرى اكتوبر وانتم طيبين
