يا جماعة انا كنت حاجز واحدة لامبورجيني من التوكيل الجديد اللي فتح أول ما قرار الغاء الجمارك نهائيا علي السيارات و بعدين لقيت فيه ناس كتير استلمت قبلي !!
فركبت المترو المعلق السريع الجديد من مدينة نصر ل 6 اكتوبر ( سريع ماشاء الله 180 كم / س علي الأقل) و رحت قابلت الناس هناك .. قالولي :
انت طالبها لوحدك و الناس دي كانو شلة مع بعض طلبوا 6 عربيات مع بعض فسلمناها ليهم الأول !
بالذمة ده اسمه كلام !!!
المهم انا قلت اصبر يا واد العربية حلوة و بتمشي ببنزين 98 المتوفر في البنزينات .. الفيراري بتمشي ببنزين 95 و صعب تلاقيه دلوقتي
المهم استلمت النهاردة الحمد لله .. و حاولت أفادي الرادار بس اضطريت امشي علي أقصي سرعة مسموحة 160 لغاية لما اروح حلبة السباق اللي الحكومة فتحتها عشان اللي عاوز يسابق يروح هناك .. و ..و ..و ..
يا أستاذ .. أصحي .. الإشارة فتحت خلاص .. انت كنت نايم ولا إيه ؟
إشارة إيه بس ياعم .. ده انا واقف بقالي ساعتين و ربع
مدارس بقي يا أستاذ كل سنة و انت طيب .. انت مش في مصر ولا إيه ؟
أنا دلوقتي في مصر .. بس من دقيقتين كنت في دنيا تانية