عاوز حد ساق الصنى واللانسر فترة طويلة يقول تقييمه ليهم

**alrabeh** · 05-04-2008 06:59 PM

عاوز حد ساق الصنى واللانسر فترة طويلة يقول تقييمه ليهم
عاوز أشترى آخر الشهر ان شاء الله

**yahyanaabil** · 06-04-2008 01:46 PM

انا سوقت الصنى لفتره طويله بس ركبت اللانسر مره واحده وكانت 1300 cc اوتوماتيك والصنى كانت مانيوال وانا حجيبلك من الاخر وانا حقارن بين الاتنين عشان هما تقريبا نفس السعر وال1600 تفرق عن الصنى بحوالى 15الاف جنيه
مميزات اللانسر :
صالون اوسع بكتير من الصنى وتقدر تقول صوتها اهدى شويه يمكن عشان 1300 واكيد استهلاك بنزين اقل عشان 1300 ممكن يكون تقفيل اللانسر افضل لكن ادائها معحبنيش خالص وسحبها بطىء فحت (الكلام ده على ال1300) بس 1600 اكيد سحبها اعلى
مميزات الصنى
عربيه سحبها فظيع يمكن عشان انا راكب 1600 ومانيوال لو ناوى تجيب لانسر 1600 معتقدش ان الفروق تستاهل ال15 الاف جنيه من الاخر عربيه سعرها مناسب ليها مفهوش مبالغه زى اللانسر

فيه فرق كمان اللانسر 1600 فيها abs لكن الصنى واللانسر 1300 مفهومش
هيه ديه كل الملاحظات اللى عندى على العربيتين غير كده العربيتين زى بعض فى كل حاجه تقريبا

**alrabeh** · 06-04-2008 05:24 PM

يا أخى الفاضل بارك الله فيك
وفعلا الحاجة السيئة بالفعل فى الصنى ضيق الصالون
لوبصيت للإلنترا حتجد صالون هايل بس فى النهاية السيارة كورى وسمعة الكورى ما زالت خمس سنين وتلاقى السيارة تعبت
يا ريت لو فيه اضافات أخرى أكون شاكرا لكم

**banboty** · 06-04-2008 05:31 PM

المشاركة الأصلية كتبت بواسطة yahyanaabil

لكن ادائها معحبنيش خالص وسحبها بطىء فحت (الكلام ده على ال1300) بس 1600 اكيد سحبها اعلى

علشان بس اتوماتيك

انما لو 1300 مانيوال هتلاقي العربية مرتاحة و كويسة

انا بسوق التويوتا الكورولا 1300 مانيوال موديل 2004 و سحبها زي الفل بتكييف او بدون ....

الياباني برضوا ياباني !!

**loai-omar** · 07-04-2008 06:56 PM

انا سوقت ال لانسر ال 1600 و ال 1300 فتره

طبعا ال 1300 ماينفعش تقارنها بالصني ال 1600 خااااالص

اما بأه ال 1600 بتاع اللانسر بصراحه انا معجب بييييه جدااااااااااااااااااااا
بحسها انعم و صوتها اهدى و من جوا اكبر من الصني

و رياضية عن الصني

بس الصني ماشاء الله جميله جدا صوت الموتور مش عالي اوي بس سحبها تحفه

انا فضلت اشتري الصني عن اللانسر مع اني من اشد المعجبين باللانسر

والحمدلله لحد دلوقتي مافيش اي مشكله

**yahyanaabil** · 07-04-2008 07:18 PM

المشاركة الأصلية كتبت بواسطة banboty

علشان بس اتوماتيك

انما لو 1300 مانيوال هتلاقي العربية مرتاحة و كويسة

انا بسوق التويوتا الكورولا 1300 مانيوال موديل 2004 و سحبها زي الفل بتكييف او بدون ....

الياباني برضوا ياباني !!

الكورولا ال 1300 انا ركبتها مره وكانت اوتوماتيك وكان ادئها احسن من اللانسر بكتر

**limo** · 07-04-2008 08:04 PM

بانا مجربتش الصنى بس روحت شوفت السوبر صالون فى التوكيل
بس انا معايا لانسر 1600 اوتوماتيك وسوقت لانسر 1300 مانوال كتير
ال1600 هتحس بيه لو انت مركب ناس معاك وكبار فى الحجم
لو مسافر هتحس ان العربيه على السرعه العاليه مستريحه
طبعا فى السحب لو طالع مطلع جامد شويه
من خلال تجربتى مع الانسر 1300 حسيت ان المتور صغبر على العربيه لان العربيه كبيره مش صغيره ووزنها مش قليل وده كان السبب انى لما جيت اشترى جبت 1600 مع وجود فرق سعر عالى بيشدك لل1300
الصنى لما روحت شوفتها بصراحه حسيت ان الناس ظالمه التقفيل المصرى اوى
اه التقفيل اليابانى احسن من المصرى بس العربيه تقفيلها المصرى مش وحش
طبعا انا بتكلم عن خامات تقفيل ولم اتكلم عن اداء و مساؤى التقفيل التى بتظهر مع الاستخدام لانى مجربتش العربيه

**ahmoda** · 22-04-2008 01:02 AM

انا معايا صنى 1300 اوتوماتيك بصراحه بحس انى هاقوم اقف على دواسه البنزين عشان تجرى العربيه تقيله جداا على الموتور لكن اللانسر 1300 باحس انها اسرع لكن بيعجبنى عفشه الصنى باحس انها بتمتص الصدمه عن اللانسر

**aboezz44** · 14-01-2009 04:21 PM

السلام عليكم ورحمة الله وبركاته
انا شايف ان المواضيع فيها تحامل شويه على السياره الصنى واللانسر والناس بتقيم العربيتين وتتوقع أداء منهم وكأنهم بيتكلموا عن سيارات فيراري او ميرسيدس اس كلاس
انا عن نفسى معايا صنى 2008 وعامله 6000كم ماكانش ينفع اقارنها مثلا بالانسر لأن عربيتى مانوال
1600cc
شاريها زيرو ب 88000جم ورجعولى 2000جم يعنى العربيه واقفه عليه ب 86000جم والعربيه فى منتهى الأحترام والجمال وماندمتش ابد انى شاريها ومش هاقارنها بأى عربيه تانيه
ازاى اقارنها مثلا باللانسر المانيوال 1600cc
الى بتبدا من 106000 يعنى فرق 20000جم
حتى لو الانسر احسن واثبت بس انا شايف ان 20000جم انا اولى بيهم وما اعتقدش ان الفروق بين العربيتين يساوى المبلغ ده
اما لو صدق كلام الأخوه ان الصنى احسن من اللانسر فيبقى انا وفرت 20000جم وفى نفس الوقت ركبت عربيه محترمه
اما لو ثبت ان اللانسر احسن من الصنى فدى حاجه ماتزعلنيش لأنى اشتريت العربيه الأرخص

بالنسبه للناس الى بيتكلموا عن الصنى اتمنى انهم ماينسوش ان نيسان بتعطيهم عربيه يابانى 1600CC
بس ب 86000جم يعنى تقريبا ببلاش مقارنة بالعربيات ألكوري والصيني
ودى وجهة نظري ألمتواضعة
وجزاكم الله خيرا

اخوكم / احمد عزالرجال

لكى الله ياغزة

**mohamed_008** · 15-01-2009 12:04 PM

انا تجربتى مع النيسان صنى مازالت فى اسبوعها الاول

معايا 2009, و فى نفس الوقت سوقت اللانسر 1300 سى سى

الصنى سحبها ممتاز جدا حتى على الطريق لما بشد مع لانسر بلاقى ان الصنى افضل بكتير غير ان ثباتها ممتاز جدا.