الحمد لله .. وأنا مروح النهاردة في طريق الزقازيق المنصورة، وبعد ما عديت السنبلاوين بشوية، فجأة سمعت (طاخ) وزميلي اللي كان راكب جانبي لقيته بيتألم من إيده اللي كان مطلعها من الشباك وحاططها على أعلى الباب من الخارج.
وقفت بالعربية بعد حوالي 2 كيلو ولقيت إيده كلها دم ... إيه اللي جرى يا علاء؟ أتاري واحد معرفش عايز إيه بالضبط (هل مجنون ولا حرامي ولا إيه) كان مستخبي على جنب الطريق في الضلمة رمى على العربية حجر ... اتأكدت إن علاء سليم مفيش كسور، بس شوية رضوض وجرح كبير في الصابع الوسطاني .. والحمد لله إنها جت على قد كده.
بعد ما اتطمنت على زميلي .. رحت أشوف العربية لقيت نقرتين في صاج الباب اليمين واحدة حوالي 2 سم في 3 سم والتانية 3 في 5 سم وما بينهم مفيش حاجة ... قصدي بينهم كانت إيد علاء :D ، والنقرتين لا يمكن إنهم يتردوا على البارد لأن تحتهم عضم.
ولأني مأمن على العربية مع المجموعة المصرية للتأمين عن طريق السبع (اللي اشتريت منه العربية) اتصلت بيه، فقالي هاتها أشوفها.
وبعد ما شافها قاللي دي حاجة بسيطة .. كويس إنها جت على قد كده، وبكرة تعالى وأنا أوديك عند واحد سمكري هنا يردها لك وندهنها، وبلاش لفة التأمين وتسافر القاهرة لمركز الصيانة والبهدلة دي، لأنها مش مستاهلة.
وافقت مبدأيا، لكني متردد، هل تنصحوني إني أسمع كلامه وأخليه يعملها عند سمكري هنا في المنصورة (معرفش هتبقى على حساب مين) ولا أصر إني أوديها مركز الصيانة في القاهرة وتتعمل على حساب التأمين؟
المفضلات