السلام عليكم ورحمة الله وبركاته
في خلال رحلة البحث في موضوع شراء الفلوينس. وأنا راجع من مدينة نصر وقبل الدائري قولت ما أعدي على محمد ذكي فرع المقطم وأشوف ايه النظام والاسعار.
قابلني واحد من المبيعات. هو الراجل زوق واتفرجت على كذا موديل وقالي ان عنده 2011 جاهز للتسليم و 2012 بعد اسبوع. بدردش معاه وعرف اني ماشي في اجراءات البنك الوطني للتنميه لشراء سيارة بنظام المرابحه. فبقوله دول ادوني معادين علشان يبعتوا مندوب ومجاش في المعادين. راح الراجل قالي أنا عارف واحد هناك في المبيعات وبيتعامل معانا على طول هكلمهولك. وفعلا كلمه واتفت معاه يعدي عليا في الشغل وفعلا قبل المعاد كان واصل عندي وشاف كل الورق وملينا الاستماره في ربع ساعه. الرجل زوق جدا في التعامل وخلصلي كل حاجه وأنا كان بقالي من قبل العيد مستني مندوب من البنك. الصراحه استجدعت الراجل بتاع المبيعات اللي في محمد زكي. الراجل سريع وخلص خلص. مندوب البنك وعدني ان الاجراءات موش هتاخد أكتر من اسبوع ان شاء الله.
المهم نرجع للأسعار أنا كنت سألته على الاسعار. فآخر كلام ان موديل 2011 ب 138 الف ... و 2012 ب 142 والاستلام بعد اسبوع. وقالي كمان انها هتغلى 5 الاف الفتره اللي جايه من الوكيل. حاولت انزل معاه بس هو منشف دماغه ما ينزلهاش ولا لحلوح. أنا قولتله ساعه الاتفاق هنشوف مع مدير الفرع علشان ناخد خصم.
السؤال بقي. هل حد جرب محمد ذكي فرع المقطم في الاستلام والمعامله؟ وهل الاسعار دي كده كويسه ولا لأ. وكمان هل اجيب 2012 ولا 2011. أنا ميال أكتر ل 2012 بصراحه.
سؤال آخير. أنا محتار في الالوان. أنا عاجبني اللون الابيض, بس خايف لأنه موش منتشر خالص وخايف يطلع وحش عليها. أنا عربيتي الحالية لونها أبيض ومرتاح معاها جدا في موضوع التراب والخدوش والحر. هل حد جاب اللون ده؟
معلش طولت عليكم في الاسئلة بس أخوكم محتاج كل خبرات المنتدي.
ان شاء الله لو الدنيا تمام الردود كانت ايجابيه ... هعدي على المعرض أدفع مقدم حجز بسيط علشان العربية.
المفضلات