هستلم الفلوينس خلاص ... مساعدتكم يا رجاله

**ArafatEHegazy** · 27-09-2011 03:38 AM

السلام عليكم

الحمد لله ربنا وفقني في شراء سيارة فلوينس من محمد ذكي بعد رحلة طويلة من المقارنات والبحث والتنقيب في عالم السيارات والمعارض. وذلك بعض توفقيق الله يعود للاخوة الافاضل في قسم رينو واللذي اتشرف بالانضمام اليه.

ان شاء الله هي الفئة الثانية في الاتوماتيك ب 142 الف.

المفروض ان الاستلام يوم الاربعاء اللي جاي. كنت عايز مساعدة من الاخوة في التحضير للاستلام. هقول اللي أنا عارفه علشان لو في حاجه ناقصة او غلط حد يصلحلي:
1. اولا ان شاء الله هستلم في الصباح وفي النور علشان ابقي شايف كل حاجه.
2. أشيل الورق الابيض اللي ملزوق على العربيه علشان فرق الالوان
3. يكون معايا 2 سي دي علشان اختبار الكاسيت
4. يتم فحص الصاج الخارجي جيدا
5. يتم فحص الصالون والتابلوة والتأكد من عدم وجود أي مشاكل بهم
6. تجربة الانوار والاشارات والمساحات والكاست
7. التأكد من وجود الكاتالوج و الاستبن ومساميرة
8. التأكد من وجود الكوريك وقطعة السحب.

يا ريت التصحيح او الاضافة على النقاط اللي فاتت.
عندي كمان كام استفسار

1. كام كاتالوج بيجي مع العربية وهل في واحد مخصوص للصيانه وتسجيلها مثلا.
2. هل يوجد كاتالوج للكاست وضمان مخصوص.
3. ضمان العربيه دا بيبقي شكله ايه؟ ورقة مختومة من المعرض مثلا؟
4. هل في كود للكاست لازم آخده من المعرض أو الوكيل؟
5. انا عارف من المنتدي ان رقم الشاسية يوجد خلف الكرسي الامامي المجاور للسائق. هل في أي حاجات مستخبية تاني علشان الترخيص.
6. وأخيرا ... هو تكاليف ترخيص الفلوينس لمده سنه واحده كام في المرور ؟

وشكرا على المساعدة وأرجوا منكم الدعاء ان ربنا يوفقني في الاستلام والترخيص.

**SoFiMaN** · 27-09-2011 08:10 AM

الف مبروك مقدماً, و انا عندي استلام كمان 3 ساعات كده ان شاء الله برضه نفس الفئة.. هخلص و اقولك الاخبار

**ArafatEHegazy** · 27-09-2011 10:42 PM

المشاركة الأصلية كتبت بواسطة sofiman

الف مبروك مقدماً, و انا عندي استلام كمان 3 ساعات كده ان شاء الله برضه نفس الفئة.. هخلص و اقولك الاخبار

ها ... ايه الاخبار؟ طمني. إن شاء الله تكون استلمت على خير والعربية تمام معاك.

**party_0000** · 28-09-2011 12:36 AM

بالتوفيق والف مبروك للجميع

**ugaritian** · 28-09-2011 02:25 AM

الف مبروك، سيارة جميلة جدا و مرفهة، كنت يومين في تركيا و هي مالية الشوارع، انطباعي عنها يشبه انطباعي عن البورش خاصة من المقدمة و المؤخرة.

**SoFiMaN** · 28-09-2011 08:09 AM

المشاركة الأصلية كتبت بواسطة ArafatEHegazy

ها ... ايه الاخبار؟ طمني. إن شاء الله تكون استلمت على خير والعربية تمام معاك.

بسم الله ماشاء الله روعة روعة,, استلمتها و رخصتها و اتأكدت معاها دفتر الصيانة ختمهولي و الدواسات و الشبكة (دي شبكة كده شبه الحبل بتتحط في الشنطة تقسمها نصين) و لفيت ان مفيش خرابيش او حاجة الحمدلله فاضل بس غطاء السيارة هستلمه بكرة ان شاء الله

و سواقتها ....... هسيبك انت تجرب بقى بنفسك ان شاء الله

**ArafatEHegazy** · 29-09-2011 01:12 AM

المشاركة الأصلية كتبت بواسطة sofiman

بسم الله ماشاء الله روعة روعة,, استلمتها و رخصتها و اتأكدت معاها دفتر الصيانة ختمهولي و الدواسات و الشبكة (دي شبكة كده شبه الحبل بتتحط في الشنطة تقسمها نصين) و لفيت ان مفيش خرابيش او حاجة الحمدلله فاضل بس غطاء السيارة هستلمه بكرة ان شاء الله

و سواقتها ....... هسيبك انت تجرب بقى بنفسك ان شاء الله

الحمد لله انا استلمت كمان ورخصت. العربية ما شاء الله لا قوة الا بالله ممتازه وجميله وسهله في السواقه. يمكن الواحد لسا ما أخدش قوي على الابعاد. ربنا يدينا خيرها ويكفينا شرها ويعينا على سداد أقساطها.

**shawkyam** · 30-09-2011 11:57 AM

الف مبروك ربنا يديك خيرها ويكفيك شرها على فكرة أنا كمان حاستلمها ان شاء الله بعد 3 أيام بس هنا فى السعودية وهى تختلف عن اللى فى مصر ان الموتور والجير والتكييف يابانى من نيسان و التقفيل كورى