أيهما أبدأ من فضلكم

**ibnelfared** · 24-04-2012 08:15 PM

عايز أشد عربيتى شدة حلوة أعمل أيه هل أبدأ بالسمكرة يليها الميكانيكا ثم الفرش قم الرش الدوكو ؟
محتاج خبراتكم ليا الله يبارك فيكم

**ahmed_gamal777** · 24-04-2012 08:38 PM

فى راى
الميكانيكا -يعنى يا فرحتى عربية روشة وعشان طقم كهرباء العربية بركة منك فى نصف الطريق
السمكرة او الفرش الداخلى يرجع لطبيعة شخصيتك -يعنى ممكن يكون الفرش جوة العربية كنبة لاموخذة ولكن من برضة مفيش غلطة -ودا راى
وممكن لو انت عايز فرشة حكاية وعربية مخبوطة من برضة -برضة دا بيرجع ليك
طبعا اخر حاجة الدوكو -عشان نظافة العربية

ومتنساش ان راى مبنى على كلامك
يعنى انت موضحتش -عايز شغل ميكانيكا اية !
وشغــــــــــــــــــــــ ـــــــــــــــــــــل سمكرة اية !

وربنا يوفقك ل الخير

**MEKAWY2000** · 24-04-2012 08:53 PM

الاول ميكانيكا اولا وبعد انتهاء الميكانيكا من تلين للموتور يبداء السمكره والدوكو وبعد ذالك الفرش الداخلى والتفنيش الاخير وربنا يعينك

**ibnelfared** · 24-04-2012 09:15 PM

متشكريين يا عم أحمد والأستاذ مكاوى ألى نسينى نهائى ولا رد حتى على التليفون ويا أستاذ أحمد أنا هاشد العربية بتاعتى لأنى زهقت بجد فعايز أعرف ترتيب الأصلاحات أبدأ بأيه

**MEKAWY2000** · 24-04-2012 10:11 PM

المشاركة الأصلية كتبت بواسطة ibnelfared

متشكريين يا عم أحمد والأستاذ مكاوى ألى نسينى نهائى ولا رد حتى على التليفون ويا أستاذ أحمد أنا هاشد العربية بتاعتى لأنى زهقت بجد فعايز أعرف ترتيب الأصلاحات أبدأ بأيه

والله ياجميل انا مانسيتك انا اتصلت بالميكانيكى لقيته مسافر وهيرجع الثلاثاء اليوم يعنى بس ماينفعش اوديك للصنايعيه الى عنده على شان انا عايز الشغل يبقى كويس ومتنساش انى انا الى طلبت منك انى اساعدك وان شاء الله هعدى عليه بكره وهتصل بيك وتيجى وبحدد الجمعه الى جايه على شان انا اجازه واكون واقف معاك اعزرنى
اخوك الصغير مكاوى

**a7madramadan** · 24-04-2012 10:53 PM

الترتيب الصحيح هو ميكانيكا (عشان ممكن تتبهدل شوية مع الميكانيكي)
ويليها الجسم الخارجي ومع العمل فالجسم الخارجي (سمكرة/دوكو) ممكن تشتغل تفصيل الجلد للكراسي وتبقى العربية فاضية وتقتصر الوقت ولما تخلص البوية تركب الأرضية الجديدة (لو هتغير او هتركب من الأساس) وتركب الكراسي وفرش الأبواب وباقي الحاجات المفكوكة من الصالون ان كنت فكيت حاجات للتغيير / التنظيف
وآخر خطوة خالص تاخد العربية واكس و بوليش و مبروك مقدما :)

**ibnelfared** · 25-04-2012 12:12 AM

المشاركة الأصلية كتبت بواسطة thediesel

الترتيب الصحيح هو ميكانيكا (عشان ممكن تتبهدل شوية مع الميكانيكي)
ويليها الجسم الخارجي ومع العمل فالجسم الخارجي (سمكرة/دوكو) ممكن تشتغل تفصيل الجلد للكراسي وتبقى العربية فاضية وتقتصر الوقت ولما تخلص البوية تركب الأرضية الجديدة (لو هتغير او هتركب من الأساس) وتركب الكراسي وفرش الأبواب وباقي الحاجات المفكوكة من الصالون ان كنت فكيت حاجات للتغيير / التنظيف
وآخر خطوة خالص تاخد العربية واكس و بوليش و مبروك مقدما :)

مش فاهم أخر خطوة دى بصراحة

**MEKAWY2000** · 25-04-2012 02:07 PM

الفنش الاخير بلوج وكومبون وازاله اثار البويه من على اى حاجه مثل جلد الزجاج الاكر الخ

**a7madramadan** · 26-04-2012 07:34 AM

بوليش+ واكس = polishing and waxing بيبقى مواد كده بتتحط على البوية بتلمعها وبتخليها مقاومة للأتربة بشكل مؤقت نظافة البوية يعني :) خليها فالآخر عشان دي آخر حاجة تتعمل ومافيش صنايعي يشتغل بعد البوليش تكون العربية خالصة وطالعة عروسة ان شاء الله :D

وطبعا زي ما استاذ مكاوي قالك تنظيف برضه لآثار غلطات البوية لو في على الزجاج او الفرش الخ الخ ... اللمسات الأخيرة

**Ahmed_BYD_F0** · 03-05-2012 11:10 AM

بسم الله الرحمن الرحيم

السلام عليكم ورحمة الله وبركاته

والله انا دخلت الموضوع ده لانى محتاج برضه اروشن العربية بتاعتى لانها اصبحت زبالة على الاخر

ولقيت رد وافى من السادة اعضاء قصدى خبراء المنتدى الكبير قوى ده

واخيرا

سبحانك اللهم وبحمدك ، أشهد أن لا إله إلا أنت أستغفرك وأتوب إليك