الموضوع: مش عارف اعمل اية ؟؟

قبل اي حاجة
اهلا بيك في قسم سيات
صحيح حضرتك عضو قديم ولكن اول مرة اتشرف بحضرتك

المشاركة الأصلية كتبت بواسطة bugmenot

السلام عليكم
بأختصار علشان مطولش عليكم
الاعراض ....

انا معايا ابيزا 1000 سى سى انجكشن .. المشكلة الاولى : العربية بتاكل الزيت بشراها يعنى تقريباً 1.25 لتر فى 2000 كيلو .. وبتبان اكتر فى مشوار طويل ( بس الموضوع دة فى الصيف مجربتش الشتاء ) .. بدون تسريب زيت تحت السيارة .. ومفيش دخان بيطلع من الشكمان . بس فى ترشيح من الجوان اللى فى الماتور انا مش عارف اسمة اية بس هو اول جوان تحت وش الماتور اللى فى فتحة تزويد الزيت !! كل ما امسحة يرجع تانى !!


دة اسمه جوان غطاء التاكيهات
بيتباع جديد عند اي حد بتاع قطع غيار فولكس ب50 جنيه (هاته كونتيننتال او توبران من عند فتح الباب)
وخلي بالك وانت بتركبه (لو هتركبه بنفسك) ماتحطش سيليكون ولا اي مادة عازلة او لاصقة
هو لوحده كفاية
علي فكرة تغييره سهل جدا جدا
هتجيب مفتاح الانكيه مقاس 6 وتفتح غطاء التاكيهات وتغيره في خلال 5 دقايق فقط


ثانى مشكلة : لما اركنها يومين او اكثر فى اثناء تسخين العربية لما بدوس على البنزين على ار بى ام 3 او 4.5 مثلا بعد ما اشيل رجلى من على الدواسة تطلع دخان ازرق لثوانى وتختفى !!!
لما بحط ايدى على الشكمان واكتمه ايدى بتبقى معرقة مياه مش زيت !! الشكمان بيطلع مياه طبعاً اثناء التسخين صباحاً وليلاً بس مش حنفية يعنى مجرد رشاش كدة !!
وجدار الشكمان من جوه بيطلع هباب اسود مندى مياه لو العربية متسخنه بس مجربتش قبل الدوارة !! هل كدة الماتور خفيف ؟؟

ولا اي حاجة
بس خف رجلك شوية
انت كدة هتفرم الموتور بدري بدري
وانت بتسخن الصبح سيبها براحتها - كدة كدة حساس الحرارة بيرفع الأر بي ام لحد تقريبا 1.1 يعني 1100 لفة في الدقيقة ولما بتسخن (بعد حوالي دقيقتين او 3 علي اقصي تقدير) الأر بي ام بينزل لحد تقريبا 0.9 يعني 900 لفة في الدقيقة وبعدها تقدر تتحرك بيها

الدخنة الزرقا معناها ان في كمية زيت زيادة وبيتحرقوا مع الدوارة الصبح او الشكمان معبي زيت

حاول دايما تخلي مقاس الزيت بين الماكس والميني او في نص التخطيط اللي علي مقاس الزيت - ماتوصلوش لحد اخر التخطيط لأن عن تجربة اي زيادة بتتحرق وبيفضل فقط الكمية المناسبة للموتور

ثالث مشكلة : الماكينة بتبقى سخنة نااااار ممكن تسلع ايدك بجد ( جسم الماتور نفسة ) بس درجة حرارة العربية مظبوطة على المنتصف والمروحة بتشتغل عادى غالباً بسرعاتها ( لانها مرة بتبقى عالية ومرة مبخدش بالى انها شغالة ) مش عارف سخونة الماتور دى طبيعية ؟؟؟


ماتشغلش بالك
طبيعي ان ايدك ماتتحملش درجة الحرارة (حوالي 92 درجة مئوية او مايزيد) تقدر تمسك جسم البراد وهي المياة بتغلي ؟؟؟؟ تقريبا دي نفس درجة حرارة المحرك
المهم المؤشر في لوحة العدادات وبداية تشغيل وايقاف المروحة

رابع مشكلة : العربية بتاكل مياه بردوا يعنى 2000 كيلو 3 لتر مياه مقطرة ( فى الصيف )
حالياً يعنى 500 كيلو ومزودتش غير حوالى ربع لتر والمروحة بتشتغل اقل طبعا مما كانت بتشغله فى الصيف !!!
وطبعا مفيش تسريب للمياه .. والمياه ملونة يعنى كانت هتبان لو فى تسريب !!

اكشف علي غطاء قربة المياة - احتمال كبير جدا تكون بتبخر المياة وطبعا انت مش هتاخد بالك من البخر - هل لما بتفتحها (طبعا وهي العربية باردة) بتحس انها كانت مكتومة ونفست اول لما فتحتها ؟؟؟

هل المياة بتصدي جوة القربة ؟؟؟ لو المياة مصدية - اعلم ان هناك خرم وتسريب - ماهو الحديد عشان يصدي عايز مياة (موجودة في الدورة) واكسجين (بيدخله من الخرم بتاع التسريب)
لو لقيت المياة مصدية اعلم ان عندك خرم وهنالك تسريب

مفيش صدا - ابحث وراء الغطاء بتاع القربة وتحديدا جوان الغطاء

بالنسبة للسحب الحمد لله السحب جيد يعنى بسافر بيها وببقى محمل العربية وبتجيب 130 عادى بدون تكييف
الغيار الرابع 3 ار بى ام بيجيب 70
الخامس 3 ار بى ام بيجيب 90 .. 100 بتيجى تقريباً على 3.2 او 3.3 ار بى ام !!!
وجبت بالعربية 145 وهى فاضية والطريق مساعدنيش ان اجرب اكتر من كدة .. وبالتكيف جبت بيها 130 - 135 ومزودتش عن كدة
انا شارى العربية فى الصيف اللى فات دة وما ادراك ما الصيف ودرجة حرارتة وكل المشاكل دى معايا فى الصيف لسه معرفش اخبرها اية فى الشتاء !!


عربيتك الله اكبر عليها - حالتها كويسة - بس عموما اختبارات الأر بي ام مع السرعة دي بتحدد حالة اسطوانة الدبرياج اكتر منها حالة الموتور

بس انت حاول ماترهقش العربية اثناء تشغيل التكييف - يعني ماتقرصش عليها وانت مشغل التكييف سواء في المطالع او الطوالي - لأنك موتورك 1.0 ودة حلو اوي عليه القيادة المعتدلة

فا انا فى حيرة رهيبة وقلق رهيب مش عارف ابداء من فين وفى نفس الوقت مش عارف اخد قرار وحاسس ان انا لبست الماتور !!
افيدونى ..

عربيتك زي الفل ربنا يباركلك فيها ويديك خيرها ان شاء الله
لو لاحظت اي حاجة - تابع معانا القسم وان شاء الله هنحل كل مشاكلها سوا واحنا مع بعض

لا تتردد في السؤال وان شاء الله بفضل الله مفيش مشاكل وكلها حاجات بسيطة

والله المستعان
،
،