عمرة موتور

**youssef_elgbaly** · 22-07-2013 06:09 AM

السلام عليكم رايح النهاردة اعمل عمرة موتور وافتح الموتور وربنا يسهل
عايز اسئل بس شوية حاجات
لو الموتور دخل فى عمرة كاملة اعمل ايه ديه كانت اخر خرطة واكبر بساتم حطيتها كل سنة بعمل عمرة علشان تاكسى بيشتغل
وتكلفنى 2100 جنيه والله الميكانيكى حاسس انه بيخلص نفسه بيخرط الموتور كله علشان يبرا ضميره
لدرجة مرة قلتله اعملى طقم شنبر وشوف اللى انت عايزة وبره عنك لو اكلت زيت قالى لا ماينفعش
ياعم طيب انت حاتاخد حقك تركب طقم الشنبر وخلاص وتاخد فلوسك قالى لا لازم نفتحه ويتعمل
الغرابة انه لما بيتفتح تروح للخراط تلاقيه بيقولك بساتم جديدة و وو الخ تدخل 2100 جنيه
انا فحصت من شهر 4 اللى فات الحمد لله هى ابدات تاكل زيت من شهر 6 بتاكل جامد
بس مافيش ترزيع ولا حاجة
المهم لو فتحنا الموتور وقالى نخرط ونخرط اعمله ولا اجيب بلوك اللى هيا نص موتور
والبلوك بيبقى شامل البساتم والكرنك والكامة ولا مافيش كامة بساتم كرنك بلوك بس وسعره كام
وياترا لو ركبت البلوك ممكن امشى بيه لميعاد الفحص القادم ولا بعد ماركبه لازم اروح افحص تانى وانا عندى البساتم القديمة 3 مقاسات شايلهم عندى لو الخراط هايعمل شميز مثلا ادهمله ولا يقولى هات جديد برده علشان ينفع المحل اللى بيبعتنا ليه ؟
انا هاخد ال 3 مقاسات معايا بتاعة البساتم وابقى لما الموتور يتفك اقوله شوف بقى اظبط الشميز على اى مقاس من البساتم ديه صح كده ولا غلط
انا مخنوق والله بسبب كمان التلين والقرف ده
وممكن يعنى ايه شرت بلوك ومكوناته ؟
معلش تعبكم معايا

**hassanin_lada** · 22-07-2013 07:11 AM

انا مش قدر افيدك لان تقريبا كده معلوماتك اكتر مني

بس طالما هتجيب بلوك اللي هو هو الشورت بلوك اللي هو الجزي التحتاني كله

يبقي كده افضل بس اول ماتجيب تديلو شمبر عشان ماتضمنش ايه حالت الشنمبر اللي فيه

واللي اعرفه كمان ان المتور مابيتخرطش غير مرتين فانا مش عارف انت خرطه كام مره لحد دلوقت

ربنا يعينك علي اللي انت داخل عليه بس لو جبت شورت بلوك هتريح نفسك يادوب ياخد طقم شنبر وراجع عليه لما تفكه من تحت
وانشألله خير

**youssef_elgbaly** · 22-07-2013 10:30 AM

تسلم بشمهندس حسنين على الرد

**youssef_elgbaly** · 22-07-2013 10:31 AM

محدش يعرف سعر البلوكة كام وبالنسبة لحوار المرور ايه؟
ردوا علشان اللى هاعمله اجى اكتبهولكم هنا فى المنتدى بالاسعار ::d

**hassanin_lada** · 22-07-2013 09:10 PM

العفو علي ايه ؟؟

انا واللهي عاوز افيدك بس خايف اقولك حاجه مش متأكد منها البسك في الحيط

اسمع بردو لكلام الميكانيكي مهما كان عقاطي او حافظ بس بيبقو مجربين كل حاجه وانشألله خير

**youssef_elgbaly** · 22-07-2013 11:52 PM

المشاركة الأصلية كتبت بواسطة hassanin_lada

العفو علي ايه ؟؟

انا واللهي عاوز افيدك بس خايف اقولك حاجه مش متأكد منها البسك في الحيط

اسمع بردو لكلام الميكانيكي مهما كان عقاطي او حافظ بس بيبقو مجربين كل حاجه وانشألله خير

هو ان شاء الله هايفك الموتور بكرة طبعا ديه كانت اخر خرطة وانا عندى هنا مقاسين بساتم فى البيت نستم استاندر لما كنت شارى الموتور وبعدين بستم بولندى تانى بس اكيد اكبر نمرة واللى راكب فى الموتور الحالى اكبر نمر فى البساتم علشان كانت اخر خرطة فانا فكرت ان شاء الله لما اروح للخراط هاخد معايا طقم البساتم اللى عندى واللى راكب واخليه يعمل شميز على البساتم الاستاندر احسن صح كده واستنا لما يكتب ورقة الطلبات لو كتب فيها بساتم جديدة هاقوله مانا جايبلك بساتم اه اعمل عليها لو قالى لازم اجيب بساتم جديدة هاقوله مش عايز اخرط واروح اشترى بلوكة وبلا وجع دماغ الخراطين وزى ماتطلع بالفلوس واديها طقم شنبر وخلاص وشكلها معايا اخر سنة فى التاكسى واسافر الشغلانة باظت والبلد اتزحمت والصنايعية لوحدهم تخنق كل واحد عامل نفسه ولا بلاش احنا فى رمضان :D
وتسلم كمان مرة بشمهندس حسنين تقبل مرورى

**hassanin_lada** · 23-07-2013 03:21 AM

صلي علي النبي ياعم يوسف مش شوية صنيعية ولا راحو ولا جم هيعصبوك كده :d

انشألله مايقولكش هات طقم جديد ولا حاجه واللي معاك كويسين طالما مافهمش حاجه وفهمو انك فاهم عشان مايلفش عليك

**hassanin_lada** · 23-07-2013 03:23 AM

بص لو عندك فيس بوك ادخل علي الجروب ده

https://www.facebook.com/groups/TheLoverOf132/

ناس كويسين جدا وفاهمين كويس فالعربيات ومواضيع التعمير وكل حاجه تعوزها ومش بيتأخرو عن حد في اي حاجه

**youssef_elgbaly** · 23-07-2013 05:12 AM

المشاركة الأصلية كتبت بواسطة hassanin_lada

بص لو عندك فيس بوك ادخل علي الجروب ده

https://www.facebook.com/groups/TheLoverOf132/

ناس كويسين جدا وفاهمين كويس فالعربيات ومواضيع التعمير وكل حاجه تعوزها ومش بيتأخرو عن حد في اي حاجه

تيسلم يابشمهندس فعلا جروب كويس وانا اشتركت فيه ومستنى request