الموضوع: هى الاوكتافيا a5 فيها ebd ؟؟؟

المشاركة الأصلية كتبت بواسطة amrelsaqqa

الـ abs هو اللى بيخلى العربية ما تزحفش مع الفرملة في المطر والرمل وكمان لو ماشية على ارض نصها اسفلت ونصها رملة ما تزحفش برضه ولا تلف مع الفرملة (ولكن مع الفرملة فقط ) عن طريق فتح وقفل الفرامل بسرعة عشان ما يحصلش قفش للعجل وتفقد القدرة على الفرملة او المناورة

ebd معناه اعادة توزيع الاحمال على الفرامل خلفية وامامية بمعنى ان في العادى الحمل اكبر على الفرامل الامامية لان وزن العربية كلها بيترمى لقدام ساعة الفرملة والعربية مصممة على كدة تصميم ثابت ، انما لو انت حملت العربية جامد من ورا ، هتلاقى مسافة التوقف زادت لان الحمل اللى انت حطيته ورا ، كان محتاج انك تزود قوة الفرملة ورا عشان العربية تقف اسرع
الـ ebd بيحس بكدة وبيزود القوة على العجل الخلفى لما تكون العربية محملة والعربية تقف اسرع

طبعا التحميل الزائد من الخلف ده مجرد مثال والاحتياج لتغيير توزيع الفرملة له مواقف تانية كتير

الـ eba ده لو موقف طوارئ ودست فرامل بسرعة حتى لو مش للاخر النظام بيعزز تدفق الزيت للماستر وبيقلل زمن قفل الماستر على العجلة وبيؤدى ان استجابة الفرامل تبقى اقوى واسرع في الطوارئ

الـ tcs/asr بيعمل موضوع تماسك العربية لو عجل في الرمل وعجل على الاسفلت عن طريق تقليل العزم على بعض العجلات او تقليل السرعة وكمان بيمنع العربية انها تأمرك وهي طالعة

الـ esp بيعمل عمل الـ tcs/asr وكمان بيساعدك انك تتفادى حاجة قدامك بزاوية حادة جدا جدا او تاخد غرزة ضيقة جدا بدون ما العربية تعوم عن طريق انه بيفرمل العجلة اللى في مركز دوران العربية وبيحس بحركة الدركسيون ويفضل محافظ على اتزان العربية حسب حركة الدركسيون عن طريق فرملة عجلات معينة وعجلات لا ، تقوم العربية رايحة زي ما انت عاوز بالظبط يعنى يعتبر تكامل للانظمة كلها مع بعض مع اضافة خاصية الاحساس بحركة الدركسيون والاحساس ان العربية ممكن تعوم وياخد الاكشن المناسب على العجل



الاوكتافيا فيها كل الانظمة ماعدا الـ esp ما نزلش مصر

شكرا لشرحك الجميل وافادتنا بباقى الانظمة

افهم كده ان الاوكتافيا فيها Abs,Ebd,Eba,Asr