الموضوع: دماغي حينفجر من التفكير في الفلونس الجديدة 2014

المشاركة الأصلية كتبت بواسطة magedtito

يا رجالة بفكر اشتري فلونس الفيس لفت او الكورولا 2014 و انا مقتنع جدا بالفلونس الجديدة بس كل ما انوي اواجه بما يلي :
يا بني بلاش الفرنساوي خاصة الفلونس دي اعطالها كتير
دي سعر اعادة البيع واقع خليك في التويوتا يوم ما تقول يا بيع الف من يشتري و بسعر ممتاز يعني فلوسك معاك
الفلونس لا تصلح لجو مصر و الصيف بتاعنا تقدر تقولي في كام عربية فلونس في الخليج
يا بني كل الاوبشنز دي و بالسعر ده اكيد علي حساب الكواليتي بتاعة العربية
اعطالها كتير و مفاجئة حتي لو بتعمل صيانتها في التوكيل و انت معاك عيال مش طلبة مرمطة
دى مراكز الخدمة قليلة و مش منتشرة و صحيح قطع غيارها رخيصة بس مش معمره و المصنعيات غالية

يا ريت يا رجالة تفيدوني و لو سمحتوا بمنتهي الحيادية انا ححط فيها شقي سنين

ان جيت للحق انا لحد دلوقتي مشفتش ولا واحد اشتكى من الفلوينس لا من الفيس ليفت ولا من اللي قبلها

بالنسبة للكورولا طبعاً تكسب في اعادة البيع بس حتتبهدل من شوارع مصر

ولما تحب تروح مشوار حتحسبها في دماغك الاول إذا كان مشوارك دا حيدخلك على شوارع كلها مطبات وحفر ولا لأ عشان العربية واطية جداً ..

إذا كانت البي إم دبليو الناس بتشتكي منها وهي على كدا 16 سم إش حال الكورولا اللي 12 سم بينها وبين الارض

وبالنسبة لنقطة الكواليتي دي ... انت شاكك في الكواليتي عشان تجهيزاتها كتير ؟

طيب ما حضرت الكورولا مليانة تجهيزات بردو ليه مشكتش في الكواليتي بتاعتها

وبعدين لو حضرتك بتدور على كواليتي يبقى انا انصحك بالكارينز الجديدة او القشقاي

والعربيتين دول حيوفرولك اقصى راحة ليك ولأسرتك من غير اي مشاكل بس استهلاك الكارينز الجديدة للبنزين زيادة شئ بسيط

بص حضرتك لو عايز عربية عائلية تحت الـ200 الف فأنا انصحك بالقشقاي عربية غنية عن التعريف

ومفيش موقع تجارب واحد بيقول عليها كلمة وحدة سيئة من راحة لثبات لجودة لإستهلاك منخفض للبنزين

وكذلك الكيا كارينز الجديدة ممتازة جداً

ولو بتفضل العربيات السيدان والهاندلينج العالي جداً يبقى خد بعضك وروح على الفورد فوكاس طوالي واقتصادية لأبعد الحدود

إنما لو بتفضل العربيات الهاتشباك فا أنا معنديش فكرة .. عموماً لو غاوي سيدان فانا شايف ان افضل عربيات الفئة هم بالترتيب ( فوكاس - استرا - فلوينس )

ولو suv يبقى قشقاي او كارينز الجديدة وعلى فكرة لو تقدر تعمل تست درايف يبقى احسن 100 مرة عشان تتأكد من كلامي