السلام عليكم ورحمة الله وبركاته

أخبارك إيه يا شباب ... يا رب تكونوا بخير

هدخل فى الموضوع مباشرة

كنت مسافر حوالى 150 كيلو بعد صلاة العشاء ..... وبعد 20 كيلو طفيت العربية كنت بشترى حاجة ودورتها تانى لقيت لمبة بطارية منورة فى التابلوة ... طفيت العربية وشيكت على كابلات البطارية وبصيت على سير الدينامو والعربة مبطلة وهى كمان شغالة .... ملقتش شئ غريب فيها

قلت هنفض وأكمل سفرى ... ولسه بتحرك لقيت الباور بتاع الديليكسيون مش بيتحرك واتحرك بالعربية قلت يمكن يخف ... مستحييل مفيش حل ... الباور ضااااااع تماما

مشيت شوية ومش لاقى شئ تانى غريب فى العربية كملت بس اللمبة لسه منورة ... قلت أكلم حبيبى طنانى ... كلمته فعلا ورد عليا وبعد السلامات وشرح المشكلة .... قالى بنسبة كبيرة الدينامو فاصل .... قيس شحن البطارية عند حد ..... قلت ليه أنا على الطريق مسافر ..... قالى ربنا يستر والبطارية متعملهاش معاك وتفضل شغالة لحد ما توصل ... بس اقفل التكييف .... وهتلاقى النور بتاع العربية بيضعف شوية ..... وتيجى بالسلامة .... طبعا خدت الكلام وكملت وربنها ستر لحد ما وصلت الهرم .... رحت داخل على كهربائى ... قيس يا معلم البطارية والدينامو .... لقيت الدينامو فاصل تماما .... زى كلام طنانى

رحت على الكهربائى ... فكينا الدينامو ... قيس ... لقيناه مش شغال ... مشكلة فى الكتاوت .... حاول معاه .... كل المحاولات فشلت ... احنا كده السبت بالليل .... ومفيش حد شغال ... قالى خلى بالك الكتاوت سعرها غالى .... فهات دينامو استيراد احسن .... لأن الكتاوت الجديدة ممكن تكون صينى وتضرب

سألت طنانى تانى على حد بيبيع وهو سأل لكن وصلش لحاجة ... وقالى هلاقيه فى حدود 250 - 450 جنيه

طبعا الأحد محلات قطع الغيار الاستيراد قافلين ... استنين لحد يوم الاتنين .... وفعلا روحت عند سوس فى الشيشينى فى فيصل .... واستنضفت دينامو .... واشتريته بـ 400 جنيه

رحت للكهرابى وجربت والحمد لله اشتغل وشحن وكمان الإشارة الحمرا بتاعت البطارية اختفت ... واتحلت المشكلة الحمد لله

وكنت لابس طوبة فى الازاز الأمامى .... فقلت مبدهاش .... رحت مغير بعدها الازاز الأمامى للعربية نوعه gm كان بالتركيب بـ 450 جنيه .

شكرا خاص لطنانى اللى رخمت عليه بالاتصالات فى كل الأوقات .... وشكر عام للجميع
ورمضان كريم