السلام عليكم ورحمة الله وبركاته،،،

أنا عربيتي بروتون ساجا وهي بيجي معاها cd player نوعه Clarion بس هو أوديو بس ومافهوش أي كماليات.

أنا بقالي ماشي بيها 4 سنين وبصراحه كنت عاوز أجدد بقى وأجيب كاست فيه USB و AUX كمان

لكن أنا مش عاوز أعمل عده وأجيب صب وجي إم والحاجات دي. أنا كل اللي عاوزه صوت نضيف وعاوز تفاصيل المزيكا تبان... بمعنى إني ساعات باسمع مزيكا كلاسيك معينه على الكومبيوتر وباكون عارف إن في صوت آله معينه في الخلفيه والصوت ده بيكون واضح على الكومبيوتر بس تقريباً مش موجودخالص على كاسيت العربيه.

انا كمان مش فارق معايا البيز ومش باعلي أصلاً أوي

في العادي أنا قبل ما باشتري حاجه باعمل دراسات وأبحاث بس النهارده كنت مستعجل وكل اللي عملته إني دخلت على المنتدى وأنا في شارع دمشق من الموبايل عشان أشوف متوسط الأسعار وأشوف أجيب إيه

اللي وصلتله إني واحد زيي مش محتاج غير إنه يجيب كاست بيونير single din عشان بيونير ماركه نضيفه وصوتها نقي.

وقد كان. جبت كاسيت بيونير 3650 بسعر 775 والراجل ركبه بس حصلت حاجه غريبه. كان كل شويه يفصل لوحده لما ندوس على حته معينه في الكاست أو لما نخبطه. طبعاً بعد محاولات ومداولات أنا قررت إني مش عاوز الكاست ده. مع إنه كان عاجبني وكان الجرافيكس فيه عاليه أوي وبيغير ألوان وكده.

أنا بصراحه خفت أغير بنفس الموديل عشان حاجتين:

  • ممكن يكون العيب اللي حصلي ده يكون عيب شائع في الموديل
  • ممكن الراجل ينصب علي ويديني واحد تاني كان حد مرجعه برضه


قررت أجيب موديل أعلى وأغلى 100 جنيه, اللي هو 5350

ده ركب من غير أي مشاكل الحمد لله. بس الغريب إنه مع إن ده المفروض موديل أعلى بس هو الجرافكس أقل وأنا بصراحه مش عارف أصلاً هو أعلى في إيه. الفرق الواضح إنه سنتريت والتاني كان عادي.

يا ريت حد يقولي إيه الفرق الجوهري وإذا كان أعلى فعلاً ولا لأ.

المهم أنا بعد ما ركبت الكاسيت حسيت إني عاوز أركب سماعات :) عشان طبعاً الكاست الجديد بين قد إيه سماعاتي تعبانه عشان الكاسيت الجديد صوته أقوى.

وفقاً لكلام الراجل أنا عندي سماعات 16 مدوره

سالته إنت ترشحلي إيه؟ قال لي بما إنك مش فارق معاك بيز وكده يبقى هات بيونير بيضاوي.

سألته دي هاتحتاج إني أقص حاجه؟ قاللي هانقص حته صغيره.

أنا عندي كام سؤال دلوقت أطمع إني ألاقي إجاباتها عندكم:
  1. إشمعنى سماعات بيضاوي؟ وإيه الفرق الجوهري بين البيضاوي والمدوره
  2. انا معظم اللي باسمعه حاجات كلاسيك ومش فارق معايا بيز وهبد ورقع؟ أجيب إيه حاجه صوتها نقي وتكون حاجه نضيفه ومنين؟
  3. يا ترى الكاست اللي جبته ده كويس؟

شكراً