محتوى المشاركات في المنتدى !!

**farahat** · 26-10-2008 01:33 PM

أنا شايف حاجة في منتدى رينو ، الناس هنا نوعين ، إما ناس معهم العربية و دول برضه نوعين و إما ناس مش ملاك للعربية و دول نوعين
أنواع الملك في المنتدى :
إما ناس ملاك جداد أو عندهم استفسارات أو مشاكل
و ناس عندها خبرة بالعربية كويس أو ملاك من فترة و بيحاولوا يفيد من خلال إجابات على الإستفسارات أو نقاط توضيح

أما غير الملاك في المنتدى :
ناس عايزة وبتفكر حتى انها تمتلك العربية دي و داخلة تسأل و تعرف من خبرة الملاك إذا كنت مناسبة ليهم ولا لأ
و ناس محبة للمعرفة و عندها فضول و حب إستطلاع تعرف عن الموديلات و الماركات ، من الأخر عايزين يعرفوا الدنيا فيها إيه .

و دة الحال عموماً في أي منتدى لأي نوع سيارات مش بس رينو ، لأن أي مفيش تصنيف أخر للمشاركة ، يا إما يبقى تضييع وقت للمشارك

سؤال للأخ أبو عبد الله بعد كل الحوارات إلي أنا شايفها بقالي اسبوع أو أكثر .. حضرتك تصنف مشاركاتك تحت أي بند من دول ؟

**أبو عبدالله** · 26-10-2008 02:06 PM

أولا احب لوضح لحضرتك ان ده اسلوب غير صحيح في طريقة الحوار لعدة اساب :
1- ان حضرتك جزمت ان التصنيف اللي حضرتك عملته ده لابد يسري على الكل او انه موثق ومعتمد من الجهات الرسمية وقانون نمشي عليه ........... وهذا اراه خطأ
2- ان حضرتك في تصنيف وده اللي انا بشارك في المنتديات من سنين علشانه ولكن غريبه حضرتك لم تدركه في التوضيح والنقاط بتاعتك
وهو مساعدة الغير وافادة الغير في اختيار العربية المناسبة له وليس المناسبة لغيره
ومش شرط انه يكون مالك للسيارة لعدة اسباب متهيألي معروفة لأن الأمثلة كتير
ومتهيألي اي تاجر عربيات ممكن تاخد خبرته اللي بيشوفها كل يوم في عالم السيارات بدون ما يكون جرب العربيه لأن التجارب الكثيرة على مدى السنين ممكن تكون افضل بكثير من تجربة شخص او عدة اشخاص للعربية لأن تقييمهم ممكن يختلف من شخص لأخر حسب خبراته

3- مش عارف ليه حاسس ان الموضوع فتحه من الأول خصوصا انه موجه لي انه استفزاز ليا
طيب اسال حضرتك سؤال

انا بذكر الناس بأسماءهم هنا في ساحة رينو ..........
يعني لما برد على حد بذكر اسمه وبقول لحد بعينه جاوبني ..... متهيألي لا

يعني انا مش بحجر على راي احد ولا بناقشه فيه
انا لم اتعرض لأي احد من مالكي العربيه لمناقشة رايه وتصريحاته

ليه بقه بيتعمل معايا انا كده
ليه الناس عاوزه تدخل معايا في رايي ........ انا مش فاهمها

يعني مثلا حضرتك يا استاذ فرحات عملت موضوع لسعر اعادة البيع
واتكتب فيه كلام غير صحيح
وانا رديت عليه

حضرتك سيبته وعملتلي موضوع خارج عن كل حاجه لتناقشني في حاجات ليس لها علاقة بالسيارات
وتركت الموضوع الخاص في صلب الكلام عن السيارات

انا مش فاهم والله انتم عاوزين ايه
راي وبقوله وهفضل اقوله لحين يثبت العكس
انا بقه لم اقل لأحد متقولشي رايك بعيد عن هنا
واحمد شاركي نفسه بيدخل يتكلم على الكورولا ويقول ان فيها عيوب
عمري ما قولتله انك مش من ملاكها وروح اكتب الكلام ده بعيد عن هنا ولا الكلام الخايب ده

ليه بقه المعامله مش بالمثل

سبحان الله

كلمه اخيره صدقني ولو لقيت ما اراه حسن في اي عربيه او اراه سوفي اي عربيه
صدقني واقسملك بالله هقول
لأن ليس هناك عداء بيني وبين رينو يعني مكنتش من بقيت عيلتي ولا من اعدائي

**Sharky** · 26-10-2008 02:57 PM

أبو عبدالله ما شاء الله مشاركاتك فى قسم رينو زادت و أصبحت أكتر من أى قسم أخر
لكن هل ترى بعد هذه المشاراكات أن حب الأعضاء لك زاد أم قل ؟

**limo** · 26-10-2008 03:13 PM

المشاركة الأصلية كتبت بواسطة sharky

لكن هل ترى بعد هذه المشاراكات أن حب الأعضاء لك زاد أم قل ؟

لازم يا جماعه تفصلوا بين الكلام فى العربيات والعلاقه بيننا
يعنى مش علشان انا بحب الرينو اكره اى شخص بتكلم عن الرينو بطريقه وحشه
ده فى الاول والاخر ده عربيه المفروض احنا الى بنحركها مش هيه الى بتحركنا
معرفه الانسان لاخيه الانسان اغلى من مليون عربيه

**farahat** · 26-10-2008 03:16 PM

سيدي الفاضل
أحب أوضح توضيح بسيط إن الموضوع دة أنا فتحته عشان النقاش في المواضيع الغير خاصة بحجة فنية ، لأن كل المواضيع الأخرى فيها اسئلة فنية و مش عايز أسطو على اصحابها بموضوع لا يمت لأسئلتهم بصلة .

بدون الدخول في تفاصيل النقاط الفلسفية الحوارية إلي حضرتك حاططها دي كلها ، أنا كنت عمل تصنيف لأنواع المستخدمين بشكل قد يكون موضوعي من وجهة نظري ، لأن المفروض الأمور تكون مقننة مش مرسلة كدة و إلى كل واحد يقول أي حاجة و نبقى عملنا ذي برامج الحوار بتاعة التليفزيون المصري :)

واضح من كم و طول المشاركات بتاعة حضرتك إن حضرتك تتمتع بدرجة علي من رفاهية توافر الوقت و إلي يفتقدها كثير مننا للأسف :( ، ربنا يبركلك في وقتك .
و عشان ضيق الوقت أنا مش هطول عن كدة و اتمنى إن حضرتك تتقبل الكلام بصدر رحب ، و اتمنى من أعضاء قسم رينو إن كل المناقشات الغير فنية و ذات الطابع الفلسفي أو الحواري حول أراء معينة تنتقل إلى هنا بدلاً من الحوار داخل مواضيع ذات طبع فني أو بها اسئلة و استفسارات للحفاظ على موضوعية المنتدى ، و شكراً للجميع

تحياتي

**human** · 26-10-2008 03:22 PM

موافق
و لا تعليق

**Sharky** · 26-10-2008 03:26 PM

المشاركة الأصلية كتبت بواسطة limo

لازم يا جماعه تفصلوا بين الكلام فى العربيات والعلاقه بيننا
يعنى مش علشان انا بحب الرينو اكره اى شخص بتكلم عن الرينو بطريقه وحشه
ده فى الاول والاخر ده عربيه المفروض احنا الى بنحركها مش هيه الى بتحركنا
معرفه الانسان لاخيه الانسان اغلى من مليون عربيه

يا باشا فيه فرق إن واحد داخل يقول رأيه إللى مبنى على أسس علمية و تجربة فعليه و أخر داخل يقول إن ملاكها بيقولوا كلام خيالى و لما يلاقى عضو عنده مشكلة و بيتنجد بالأعضاء يخش فى موضوعه و يقول ما هى دى إعتمادية رينو و يندمه إنه إشتراها و هو دا نظام التوكيل إللى بيقولوا عليه حلو ملاكها

و فى الأخر زى ما إنت قلت معرفة الإنسان لأخيه الإنسان أغلى من مليون عربية
فا ياترى دا بيحصل ؟؟

**أبو عبدالله** · 26-10-2008 03:41 PM

المشاركة الأصلية كتبت بواسطة farahat

سيدي الفاضل
أحب أوضح توضيح بسيط إن الموضوع دة أنا فتحته عشان النقاش في المواضيع الغير خاصة بحجة فنية ، لأن كل المواضيع الأخرى فيها اسئلة فنية و مش عايز أسطو على اصحابها بموضوع لا يمت لأسئلتهم بصلة .

بدون الدخول في تفاصيل النقاط الفلسفية الحوارية إلي حضرتك حاططها دي كلها ، أنا كنت عمل تصنيف لأنواع المستخدمين بشكل قد يكون موضوعي من وجهة نظري ، لأن المفروض الأمور تكون مقننة مش مرسلة كدة و إلى كل واحد يقول أي حاجة و نبقى عملنا ذي برامج الحوار بتاعة التليفزيون المصري :)

واضح من كم و طول المشاركات بتاعة حضرتك إن حضرتك تتمتع بدرجة علي من رفاهية توافر الوقت و إلي يفتقدها كثير مننا للأسف :( ، ربنا يبركلك في وقتك .
و عشان ضيق الوقت أنا مش هطول عن كدة و اتمنى إن حضرتك تتقبل الكلام بصدر رحب ، و اتمنى من أعضاء قسم رينو إن كل المناقشات الغير فنية و ذات الطابع الفلسفي أو الحواري حول أراء معينة تنتقل إلى هنا بدلاً من الحوار داخل مواضيع ذات طبع فني أو بها اسئلة و استفسارات للحفاظ على موضوعية المنتدى ، و شكراً للجميع

تحياتي

برضه موصلتش لحاجه
وبقت الحجه دلوقتي الوقت
صدقني انا وقتي ضيق جدا
مش معنى اني النهارده فاضي وكتبت في المنتدى
ان ده يبقى معناه اني فاضي بمعني كلامك

وشكرا لمداخلتك ولتوفير بعض من الوقت للرد على رسالتي
وان كنت اظن ان لو حضرتك مشغولومعندكشي وقت يبقى متشغلشي بالك من الرد عليا

-------------------
استاذ ليمو لك جزيل الشكر وصدقني انا لا اشيل لأحد
لأن مسالة الشخصيات في الحوار لا تهمني
انا ردودي كلها عن العربيات ولا اهتم بالكلام على شخص احد
ولكن للأسف هناك من يحول الكلام الى شخصنه عندام لا يجد حل امامه في الرد

وشكرا ولك مني جزيل الشكر

**محمد عز** · 26-10-2008 03:48 PM

انا متابع منذ فترة النقاش الدائر بينكم ، الحقيقة انا هقولكم نصيحة وراى ممكن تاخدو بيه او لا ، المناوشات الجانبيه ممكن تسبب ضرر للعلاقه ما بينكم ، حتى لو انتوا نفيتوا الموضوع ده ، انا عارف ا نكم على قدر كبير من الاحترام ، لكن ممكن حد اعصابه تفلت فى لحظه ، ومع تراكم تلك المناوشات ، كل ما احتمالات الاحتكاك ما بينكم بتزيد ، فانتوا احسن حاجة تقفلوا الباب ده على الشيطان وزى ما بيقولوا اللى انكسر عمره ما بيتصلح ، انتوا لحد دلوقتى قادرين تعملو كنترول ، لكن محدش عارف فى المستقبل ممكن يحصل ايه ،اعذرونى لو تنسيق الكلام مش مظبوط او لازق فى بعضه لانى بواجه مشكله فى تصفح المنتدى بصورة صحيحية