الموضوع: إستفسار بخصوص رينو فلوينس

المشاركة الأصلية كتبت بواسطة yasser100

اهلا بك عضو فى اسرة الرينو :)

1- اعتمادية العربيه ما تقلقش منها . الفلوينس دلوقتى بتجمع ما بين الاعتماديه متمثله فى الموتور و الفتيس انتاج مشترك ما بين نيسان و رينو و الفخامه متمثله فى شركة رينو و الفرنساوى عموما . حتى الموديل السابق من الفلوينس ما فيش مشاكل تذكر حاجات كلها عاديه .

2- مصنع رينو تركيا من اقدم المصانع يمكن من سنة 70 او قبلها كمان و بتنتج فيه موديلات لفرنسا نفسها و اوروبا . كل العربيات النهارده بتتجمع بره بلدها . السيفيك و الكورولا تركى و الجيتا مكسيكى و الاسترا بولندى و الباسات فى التشيك .

3- كارت رينو من امتع انظمة تشغيل السيارات حتى الان و اعلى نظام تأمين و تشفير ضد السرقه على مستوى الفئه دى و طبعا لازم يتحافظ عليه لانه غالى مش رخيص .

4- قطع غيارها عاديه و قد تكون ارخص من مثيلاتها من نفس الفئه و التوكيل جيد بالمقارنه بتوكيلات تانيه .

5- بييجى معاها كرتين تشغيل و الاستبن و الكوريك و الاريال و طفاية سجاير و حديده لقطر العربيه فى حالة الاعطال و الكاتالوجات طبعا .

6- مش هاتفرق كتير تستلمها من الوكيل او معارض كبيره محترمه . بلاش المعارض الصغيره علشان الكارت و تشفيره .

و بالتوفيق :)

أخى العضو المحترم ا/ ياسر ، شكرا جزيلا على رد حضرتك و على مجهودك الرائع فى مساعدة الأعضاء داخل قسم رينو.
الحمد لله ، أنا الآن مقتنع تماما بالسيارة و خصوصا بعد مشاهدة المزيد من المشاركات الإيجابية من أعضاء المنتدى و على رأسهم حضرتك طبعا.

و لكن ما يثير السخرية هو أن ما يقلقنى الآن من السيارة هو نظام تشغيلها ب RENAULT card !!!
(خصوصا عندما رأيت مشاركة لأحد الأعضاء يقول فيها أنه يفضل شراء الفئة E2 ليتجنب إستخدام الكارت)

لذلك قمت بتنزيل نسخة pdf من دليل المستخدم الخاص بالسيارة لكى أتعرف عليها عن قرب ، و لكنى للأسف شعرت بشىء من التعقيد فى إستخدام RENAULT card .

# ما الفرق بين وجود الكارت فى ال card reader و وجوده فى ال passenger compartment ؟
# و إن لم يكن هناك فرق فلماذا يوجد card reader أصلا ؟
# أم هل وظيفته هى أنه لو نفذت بطارية الكارت فإن السيارة لن تعمل إلا بوجود الكارت نفسه داخل ال card reader (حيث أنه لا يوجد مكان لإستخدام ال integrated key الموجود داخل الكارت) ؟
# و هل وظيفة ال integrated key هى دخول السيارة فقط ؟

المشاركة الأصلية كتبت بواسطة yasser100

مش عارف ليه حضرتك حامل هم استخدام الكارت للدرجه دى ههه . اول واحد اشوفه بصراحه حامل هم الموضوع ده قوى كدا .

1- اولا صديق حضرتك اللى اشترى الفئه التانيه علشان هيه بمفتاح مش كارد . هو بس معاهوش فرق الفئه التالته اللى بتغرق حوالى 20 الف جنيه :) .

2- التشغيل بالكارت ده من اكتر الحاجات المميزه للرينو فى الفئه دى و من سنة 2004 من ساعة موديل الميجان ما نزل و الاكتر امان فى كل العربيات . عايز اقول لك الفلوينس مش ممكن تتسرق و ﻻ تتفك الشفره بتاعتها بعد ما بتركنها و تقفلها و كله طبعا بامر ربنا .

3- الكارت ده شفرته لكل عربيه مش موجوده فى التوكيل حتى . لما بيحصل له حاجه لازم يبعتوا لفرنسا تبعت واحد جديد على نفس الشفره و بياخد وقت اسبوعين . مش زى توكيلات تانيه بتتسرق من عندهم الشفرات . اعلى نظام تأمين . علشان تتفك شفرة العربيه و تشغلها انت عايز واحد محترف يقعد جنب العربيه اسبوع بكومبيوتر و يقعد يجرب و لو اتحط فيها كارت مضروب و اشتغلت العربيه بتمشى مسافة 200 متر و تحس انه الكارت مضروب و بتقطع بنزين .

4- انت بتشغل العربيه و الكارت فى جيبك ما بتطلعوش اصلا و بعد ما بتنزل منها برضت ما تطلعوش من جيبك يكفى انك تمشى بعيد عنها و هيه هاتقفل لوحدها .

5- فيه slot فى التابلوه تحت الكاسيت بتحط فيه الكارت فقط لما تكون بتحب تسمع الكاسيت من غير ما تدور العربيه او عايز مجرد تعمل تشيك على كمبيوتر العربيه .

6- لما تحب تدخل العربيه برضه ما بتطلعوش من جيبك بتدوس بس على زرار البصمه فى الباب او تدوس على زرار الفتح فى الكارت .

7- ال integrated key . اللى فى الكارت علشان الطوارئ لو بطارية الكارت خلصت و عايز تفتح الباب . اما تشغبل العربيه و بطارية الكارت خلصانه هنا بقا ها تحتاج تحطه فى ال slot و العربيه هاتحس به عادى و تشتغل عادى . و له مكان داخل الكارت بيطلع و يدخل فيه .

ما تقلقش من الموضوع ده . ده فيه ناس بيشتروها مخصوص علشان موضوع الكارت ده :) .

و بالتوفيق .

المشاركة الأصلية كتبت بواسطة hany saad

لا فض فوك يا ياسر بيه
شرح كامل وافى

بالنسبة للزميل العزيز، كارت رينو الذكى من أجمل و أأمن الأنظمة الموجودة....أنا شخصياً بقالى بستخدمه من2006 لما كان عندى الميجان ii و مش متخيل أزاى أركب عربية جديدة دلوقتى مفهاش نظام رائع زى كده

لا تقلق بتاتاً من نقطة الكارت دى خالص...بل بالعكس، دى ميزه رهيبة من ناحية الأمان و سهولة الأستخدام اليومى.

تحياتى

المشاركة الأصلية كتبت بواسطة heeshooheeshoo

ماذا أقول بعد كل ماقيل .. خلص الكلام على يد الإخوة الأفاضل أ. ياسر وأ. هانى جزاهم الله خيراً

كل الذى أستطيع أن أضيفه فى الموضوع أن نظام الكارت فى هذه الفئة ومابعدها من أبدع وأمتع الأنظمة ولا أروع ولا أسهل .. الكارت مابيخرجش من جيبى إطلاقاً ومابيخرجش من جرابه إلا نادراً لما أركن فى جراج بالليل وناسى مكانها .. أو لو نسيت حاجة فى السيارة أو الشنطة بتحكم فى فتح الصالون أو الشنطة وأنا واقف فى الشباك من مسافة لاتقل عن 20 أو 25 متر

أهلاً بك فى قسم رينو وربنا يوفقك لما فيه الخير
وتقبل تحياتى ،،،

شكرا على الردود القيمة من الأعضاء المحترمين.

أنا بصراحة لم أسمع عن أى شكوى بخصوص كارت رينو منذ ظهوره مع السيارة ميجان ، و لكنى كنت أظنه مجرد رفاهية زائدة من شركة رينو ، و لذلك كان الغرض من سؤالى هو التأكد من أنه سهل الإستخدام و عملى كالمفتاح العادى ،
و ردود حضراتكم أثبتت لى أنه أفضل من المفتاح العادى.

أنوى بإذن الله شراء السيارة خلال الأسبوع القادم (للإستفادة من عرض الوكيل بخصم 5000 جنيه من سعر السيارة) ،
و لكنى سمعت اليوم عن موضوع تخفيض الجمارك على السيارات الأوروبية (و من ضمنها سيارات رينو) إعتبارا من أول يناير القادم ،
فما رأى حضراتكم ... هل أشترى الآن أم أنتظر إلى بداية العام الجديد ؟ هل ستكون قيمة التخفيض فى الجمارك (بعد أسبوعين) مساوية للخصم الموجود فى عرض الوكيل (الآن) ؟