الموضوع: شراء رينو ميجان بالاسكندرية. رجاء المساعده

المشاركة الأصلية كتبت بواسطة hany saad

نصيحة من أخ ليك
الميجان بالذات دور على عربية لسه بحالتها، صيانتها بفواتيرها كلها معموله فى التوكيل و ادفع لصاحبها اللى هو عايزه حتى لو انت شايفه ازيد من سعر السوق و طبعاً ده ميغنيش ابداً عن كشف التوكيل قبل دفع اى مبلغ علشان تبقى عارف انت داخل على ايه
مشكلة الميجان صيانتها بره و عك الصنايعية و فيشة مهزوزة و كبل محمص و الكلام ده كله هيخليك تزهق من حياتك و علشان ترجعها بحالتها هتصرف عليها ارقام كبيرة
سيبك من شكل الدوكو و رشه و لا لأ....مش ده اللى يعيب الميجان أبداً....أنما اللى يعيبها هو صيانتها هل معمولة صح فى التوكيل و العربية حالتها مشدودة كميكانيكا و لا لأ
متشتريش مستعمل و تروح تصلح، انا لما بعت عربيتى الميجان موديل 2006 مكنش فيها الهوا و كل الأوبشنز شغالة بكفاءة 100% و سلمتهاله معمول صيانة ال ٨٠ الف فى التوكيل بالفواتير من ساعة الشراء و كنت مغيرله قواعد موتور وقواعد فتيس فى التوكيل تمنهم حوالى 1500 جنيه مع انى عارف انى ببيع و اللى هيشترى مش هيقدر و لا هيدفعلى اكتر...... و لغاية دلوقتى بيكلمنى و يشكرنى و يقولى كل اللى بيشوف العربية مستغرب من الحاله و كل القطع اللى فيها أصلية حتى البطارية كانت رينو و فى خلال سنه مغيرش غير بطارية

متستعجلش خالص، لو وقعت فى واحدة حالتها نضيفة هيبقى معاك ركوبة bmw بسعر فرنا انما لو لا قدر الله وقعت فى واحدة ملعوب فيها، هتصرف دم قلبك عليها و هتقرفك اعطال و هتقفل منها و من كل الميجان و تبيعها بأى تمن
تحياتى

متشكر يا باشا على اهتمامك وردك كل الفكره ان العربيه دى بتاعة واحد زميلى وحبيبى هوه جايبها من سنه ونص ومش بتحصل معاه مشكله غير الفيشه الى بتتهز بتاعة الماتور وبصراحه العربيه شكلها نضيف جدا ومش متهانه لان هوه يعتبر تانى يد من بعد اول مالك الى هيا واحده ست . بس انت عارف بقى اول لما الواحد يقول ميجان فى مصر تسمع ما قاله مالك فى الخمر , عشان كده الواحد دماغه عماله تودى وتجيب مع انى معايا لوجان بس الميجان حاجه تانيه خاااالص .
اه حاجه تانيه هوه برضه من حوالى شهرين وعلى ايدى سير الدينامو اتقطع وغيره بواحد جديد . لكن العربيه كوصلات وفيوزات افتكر انها زى الفل.
بس فلما عرفت انه عايز يبيع لانه عايز يجيب اوكتافيا ولان الميجان تعتبر ضيقه نوعا على اسرته لان عددهم كبير انا استخسرتها بصراحه . وحبيت اخدها .
فمره تانيه هل لو ودتها التوكيل وعملت كشف كامل كمبيوتر وميكانيكا حيعرفو يقولولى حالة كل حاجه فيها وهيا محتاجه ايه ومش محتاجه ايه ؟ . السؤال التانى هل كل قطع غيارها الاصليه موجوده فى التوكيل ولا لا ؟ السؤال التالت بقى العربيه متركبلها زينون فهل التوكيل حيقدر يشيله ويرجع النور فابريكه ؟ لانى مقتنع ان الزينون والكلام الفاضى بياثر بالسلب على كهربة العربيه وعلى وصلات الكهربا الى فيها . وشكرا ليكو

الميجان زي الزميل ما قال ممنازه و أنا فعلا" نفسي زيك أشتريها و لكن علامات استفهام كثيره حول السياره....

أذا كنت متأكد منها توكل علي الله بعد الكشف طبعا" . و ياريت تقول لنا عملت ايه...

و تمنياتي لك بالتوفيق.......