الموضوع: أخيرا بقيت فلوانساوى ههههههههه

المشاركة الأصلية كتبت بواسطة hany saad

الف مبروك العربية و اللون الموكا تحفة عليها
معلش حضرتك نقلت نقلة تكنولوجية ضخمة من نيسان سوبر صالون الى فلوانس هاى لاين، فيه فرق أجيال بين العربيتين فهتحتاج وقت بسيط و بعدين هيبقى الموضوع ولا أسهل
الفلوانس فيها حساسات خلفية فقط و مفهاش أمامية
انت مش محتاج تفتح الكونتاكت علشان تشغل الفوانيس او الكاسيت...الاتنين دول بيشتغلوا بدون فتح كونتاكت
بس الازاز الكهربا و فتحة السقف هما اللى محتاجين فتح كونتاكت و ده بيتم عن طريق الضغط على زر الأستارت بدون الضغط على بدال الفرامل
لما تبعد عن العربية العربية بتقفل لوحدها
لما بتقرب لازم تضغط على الزر الأسود اللى فى أكرة الباب علشان تفتح السنترلوك بتاعها...يعنى مش بتفتح لوحدها لما تقرب
ممكن كمان تقفل العربية من نفس الزر الأسود: دوسة يفتح السنتر و دوسة أخرى يقفل السنتر
دوستين متتاليتين ورا بعض يقفل السنتر و يرفع الأزاز المفتوح كله و يغلق قتحة السقف

تحت امرك فى اى استفسار

تحياتى

باشمهندس هانى انا مش عارف اشكرك ازاى على ذوقك واسلوبك المهذب قبل نصيحتك ومشورتك الفنية وبجد ارجو انك تقبل شكرى وتقديرى المتواضع
انا فعلا ماسك الكتالوج وبذاكر فيه وبعد ما قريت فيه كتير حسيت ان يبقى احسن لو قريت فيه وانا فالعربية علشان فعلا زى انت ماقلت بالظبط فيه فرق تكنولوجى رهيب بين الصنى والفلوانس رغم انى كنت مبسوط ومرتاح لأداء الصنى وخصوصا الشكل القديم عربية بجد قوية ومش وحشة ,, بس فعلا موضوع الكارت ملخبطنى جدااا ومش متعود عليه وبكره هاجرب الكلام اللى انت قلته رغم انى فاكر كويس جداا انى لما نزلت من ساعتين علشان ألف بالعربية شوية وقفت جنب العربية والكارت كان فى ايدى كمان ودوست على الزرار الأسود فى الباب وشديت المقبض والعربية مافتحتش ورجعت دوست عليه دوسة اطول شوية وبرضه مافتحتش واضطريت افتحها من الكارد ,, عموما بكره هاجرب اكتر واشوف بس استحملنى انت بس واستحمل أسألتى يومين بالعدد هههههههههه

المشاركة الأصلية كتبت بواسطة Hany Saad

كده وضح السبب :)
لو حضرتك قفلت العربية من الكارت يبقى لازم تفتحها تانى من الكارت فقط و الزر الأسود مش هيشتغل فى هذه الحالة
لو عايز تستخدم الزر الأسود، دور العربية و اطفيها و بعدين اقفلها من الزر الاسود او ابعد عنها....هنا فقط تقدر تفتحها تانى من الزر الاسود
الكارت هو ال master و الزر الاسود هو ال slave
التخليص: علشان تستخدم نظام الفتح و الغلق التلقائى يبقى تقفل منه او تبعد عن العربية و ترجع تفتح منه تانى
انما استخدام الكارت بيلغى عملية الفتح و الغلق التلقائى و يجب الفتح و الغلق من الكارت
للعودة لنظام الفتح و الغلق التلقائى دور العربية و اطفيها و قفل الباب من الزر الاسود او ابتعد عنها


للسهولة: الكارت حطه فى جيبك فقط.......لا تفتح منه و لا تقفل منه و لا تدور العربية بيه....كل اللى عليك تعمله انك تحطه فى الميدالية بتاعتك و تخليك دايماً شايله معاك فقط و بس......هتلاقى العربية مفيش أسلس من كده

تحياتى

يعنى مش ضرورى احطه فى ال card reader ؟؟ واقدر أدور العربية واستخدم استخدم ال settings and setup والحاجات دى كلها ؟؟

المشاركة الأصلية كتبت بواسطة hany saad

حطه فى جيبك او معاك فى الميدالية فقط لا غير، كل حاجة بتتعمل من غيره، متستخدموش علشان ميلغبطكش إلا لو العربية حبت تتعرف على الكارت و ساعتها هتطلعك رسالة بتطلب منك وضعه فى ال reader لحظياً و ده نادر الحدوث
عدا ذلك اعتبره ايقونه فى الميدالية بتاعتك بتكون معاك دايماً و لكن ليس لها استخدام فعلى
تقدر طبعاً تستخدمه لو راكن مثلاً فى جراج ضخم و نسيت عربيتك راكنه فين، ساعتها بتدوس على علامة الكشاف هتلاقى كشافات عربيتك نورت علشان تعرفك هى فين.....مع فلوانس مش هتقدر تغمض عينك

تحياتى

اشكرك ياباشا على المعلومة وده مش معناه انى خلاص كده ،، هوه يادوب فاصل ونواصل وزى ماقلت لك استحملنى يومين بس وهتلاقينى تلميذ نجيب هههه

المشاركة الأصلية كتبت بواسطة heeshooheeshoo

ألف ألف مبروك
ربنا يبارك لك فيها ويحفظك ويحفظها من كل شر وسوء

نفس الحدث التاريخى والنقلة الحضارية مررت بها شخصياً عندما إنتقلت من صنى سوبر صالون 2010 إلى فلوانس هاى لاين .. علشان كده عارف شعورك كويس جداً .
مش عارف ليه ناس كتير لما نزلت من الصنى الشكل القديم كان إختيارها الفلوانس ومنهم زملاء عديدين بالمنتدى .. الظاهر الموضوع له علاقة بنظرية النشوء والإرتقاء .. حاجة كده زى التطور الطبيعى للحاجة الساقعة .. وللا يمكن علشان فيه جينات وراثية مشتركة مابين نيسان ورينو !!

المهم .. اللون الموكا ده من الألوان الجميلة الشيك وبتعجبنى جداً درجة الموكا بتاعة الفلوانس والقاشقاى ، وفعلا كل ما تيجى تركب عربيتك حتلاقيها بلون مختلف حسب درجة سطوع الشمس وزاوية ميل الضوء ، ولكن محتاج منك عناية ونظافة مستمرة فى الجو المترب بتاعنا .

موضوع الرينو كارد ده بالنسبة لى الآن من أبسط وأمتع المميزات فى السيارة .. وعيبه الوحيد أنك مش حاتعرف تستغنى عن السيستم ده لو نويت تغير وتركب أى سيارة ثانية . وطبعا الأخ المحترم الباشمهندس هانى أفاض فى شرح إستخدامه وصعب الواحد يضيف من بعده نص كلمة (أستاذ ورئيس قسم).

موضوع فهم وإستيعاب وظائف وطرق تشغيل الأجهزة محتاج منك فى الفترة الأولى أن يكون الكتالوج قريب منك فى شنطة السيارة بصفة دائمة ، ومحتاج منك أيضاً أن يكون موبايلك فى جيبك بصفة دائمة .. لأنك كل ماحتخرج بالسيارة فى أى مشوار صغير (حتى لو بتشترى عيش) حتلاقى نفسك راجع بعد ساعتين ثلاثة ، وحتلاقيهم فى البيت بيتصلوا بك : إنت رحت فييييييييين .. حتقول لهم : قاعد فى السيارة بذاكر !!!

مرة ثانية .. ألف مبروك وإنشاء الله تستمتع بالسيارة وأى سؤال نحن معك .

وتقبل تحياتى ،،،

استاذ هشام اشكرك جدااا وربنا يخليك على ذوقك ونصايحك المؤثرة ههههه على فكرة احنا كده كنا زى بعض بالظبط ،، انا كمان سيارتى كانت صنى سوبر صالون الشكل القديم 2010 واوعدك انى هاجتهد واذاكر الكتالوج كويس بس انتوا بصراحة احسن من مليون كتالوج وفعلا فيه حاجات عرفتها هنا مش فالكتالوج زى مثلا النهارده وانا بظبط ضغط الكاوتش ،، قعدت ادور فالعربية كلها على المكان المكتوب فيه ضغط الكاوتش ومعرفتش اﻻقيه وبعدين افتكرت ان كان فيه رد للباشمهندس هانى هنا على احد المشاركين وقاله ان اﻷطارات اﻷمامية 32 والخلفية 29 وفعلا عملته كده