الموضوع: هنزل اغير الزيت بكرة ومحتار

المشاركة الأصلية كتبت بواسطة Omar2017

السلام عليكم
الجواب باين من عنوانة انا هنزل بكرة إن شاء الله اغير الزيت اللي عندي في الفيرنا موبيل -XHP- بكاسترول ايدج في دلوقتي 3 درجات لزوجة
-10W-30
-10W-40
-10W-50
اغير بأنهي مع العلم اني مشيي كل في وسط البلد
وادي صورة الكتالوج كمان
http://www10.0zz0.com/2014/10/19/18/862992544.jpg
الرجاء سرعة الرد
شكرا لكم

أحب الناس اللي بتجيب من الآخر وتخلص...
صورة الكتالوج بتجاوبلك علطول..

أولا... لزوجة 10w-30 مش هتنفع في الصيف علشان أقصى درجة حرارة مسموح بيها في الكتالوج هي 40للزوجة دي.

تقدر تستخدم 10w-40 أو 10w-50 في الصيف والشتا بدون أي قلق.

لو عايز توفر شوية في البنزين... خليك في 10w-40.. وهيديلك حماية جيدة جدا للموتور.
لو العربية محملة بأوزان كبيرة أغلب الوقت... فيفضل لزوجة 10w-50

بالنسبة للمشي جوه البلد.. فده مالوش علاقة باللزوجة.. إنما له علاقة بالمسافة أو المدة اللي هتغير عليها الزيت...

وفي الحالة دي حضرتك هتضطر تغير بسرعة شوية.. يعني 5000 كم أو 6 أشهر.. أيهما أسبق... وارجع لجدول الصيانة في الكتالوج للتأكد من المسافة والمدة


...

...

المشاركة الأصلية كتبت بواسطة pepo2011

بالظبط كده الله ينور يا كبير الزيوت اعتقد الافضل هايكون 10-50 لاننا داخلين علي صيف ساخن جداااا ومشاوير وسط البلد يعني صباح السخونةو الحرارة

مبدئيا... درجتين اللزوجة هيشتغلوا كويس جدا.. سواء كانت درجة حرارة الجو 40 أو 50 أو حتى 60 .

الفكرة هنا أساسا مش في درجة الحرارة الخارجية قد ما هي في مدى التحميل على سبايك الموتور وقد إيه إنت بتعمل حماية كافية..

يعني إيه الكلام ده؟؟

خلينا نفكر كده بالراحة شوية...

الموتور لما بيشتغل ويوصل لدرجة حرارة التشغيل الصحيحة.. المفروض إن درجة حرارته ثابتة لإن فيه دورة تبريد شغالة (وهتبقى ثابتة أكتر لو ثرموستات الكوعة موجود وشغال صح)..

طيب هو كده تفرق معايا درجة الحرارة الخارجية؟؟؟؟

في الحالة دي.. تأثير درجة الحرارة الخارجية قليّل (مش منعدم).. ويكاد ينحصر في الأجزاء الخارجية للموتور اللي بيعدي فيها الزيت ويكون ليها تلامس مباشر مع الجو الخارجي (زي غطا التاكيهات أو كارتيرة الزيت).


يبقى في الحالة دي درجة حرارة الجو مش هتفرق قوي في مسألة درجة اللزوجة أثناء التشغيل.



أمال إيه ميزة الزيت الأثقل؟؟

ميزته إنه بيدي حماية أكتر ضد الاحتكاك خصوصا لما يكون فيه أحمال عالية في أغلب أوقات استخدام العربية.

زي إيه مثلا؟؟

زي: تحميل العربية بأوزان تقيلة (أكتر من 200-300 كيلو) ... أو صعود ونزول المناطق الجبلية والمرتفعة .. أو قطر سيارة أو مقطورة (زي مقطورات التخييم بتاعت أوروبا)... أو حتى استخدام السيارة بعنف.


طيب إيه عيب الزيت الأتقل؟؟

أهم عيب هو التسبب في بعض الإعاقة لحركة الموتور.. وبالتالي ده بيسبب مقاومة بتخلي المحصلة النهائية لقوة الموتور أقل (يعني موتور أضعف) .. وكمان بيعلّي استهلاك البنزين (لإنك بتبقى دايس بنزين أكتر علشان تاخد نفس الأداء المعتاد السابق).



لو سواقتك هادية أغلب الوقت وبدون تحميل عالي.. يبقى حضرتك مش محتاج اللزوجة الأعلى.


...