النهارده كان لي تجربه جميله و حبيت انكم تشاركوني فيها
انا النهارده رحت المع العربيه في مركز بريدجستون لوران
الحقيقه الموضوع كان اكبر من اللي انا كنت متوقعه بمراحل

انا وصلت الساعه 8 مساء زي الحجز المسبق ما قال و تم تسلم العربيه
ترحيب مش بنلاقيه في اي مكان
و اتعرفت علي احمد و هوه من العائله المالكه لشركه النيل للمشروعات و التجاره اللي هي وكيل بريدجستون شاب يفرح درايه كامله بالمفردات و اخلاق و ( ميني كوبر ) و سفر و حكايات و ترحاب ما بعده ترحاب و عرفت انه عنده 22 سنه بسم الله ما شاء الله

انا مش عايز الحماسه تغلبني و اخرج عن الموضوع

المهم العربيه استلمت من قبل العاملين بالمركز ( كله حالق دقنه ولابس الافرول لسه طالع من الكيس حاجه جامده قوي ) و ببص لقيتهم خالعين المساند بتاعت الراس و لمبه الاستوب اللي ورا و يالا بينا كميه خامات تنظيف تتعدي 7 و كل حاجه وليها حاجه و اللي بقطنه صغيره و اللي بسفنجه كبيره التابلوه بالفرشه الناعمه و المتوسطه و الخشنه و كل الانواع و السقف اسبراي فوم و البيبان و يالا العربيه نورت

و فجاه جينا للكلام الكبير التلميع الاول غسيل بعد كده كومبوند للشروخ و الجروح بالقرص الدوار بعد كده تلميع بملمع لونه احمر في زجاجه تحمل علامه بي ام دبليو بالقطن يدوي و بعدين ملمع شمعي لونه ابيض و بعدين شمع اسبراي في الاخر
فعلا بجد مش كلام في الهوي و كل طبقه ساعه يا رجاله

و بعدين فوط خاصه للبولش النهائي

التكلفه 200 جنيه لكن النتجه 100000000 جنيه

احساسك انك مستلم العربيه و الخوف و القلق كانها جديده
انا طلعت من عندهم اشتريت غطا ب 140 جنيه بس حاسس ان عم مسعد صاحب جاكت البيجامه و اللي بيقوم بعمليه الكحت اليومي للسياره ناوي يضرب عليه اول ما انام

نسيت اقول لكم طبعا الموضوع اخد حوالي 5 ساعات انا لسه راجع حاجه متعبه لكن تستاهل و احمد مدير المركز حكالي قصص عن بريدجستون لكن الظريف انه عطاني شويه هدايا قد كده

النتيجه اختفاء كل الخدوش من السياره تماما ( خدش الكبوت كان فيه ولد راسم علي الكبوت بزلطه و خدش بطول الرفرف الخلفي بلون احمر نتيجه احتكاك سياره و الله اعلم بالاضافه لتاثير المسح الجائر من عم مسعد )

الموضوع يستاهل ان شاء الله ارفع لكم الصور بكره