الموضوع: يوميات محدث اوتوماتيك

الموضع ده انا كتببت او ما جبت العربية النيسان من حوالى 8 شهور تقريبا ومكانش المنتدى ده لسة ابتدى

لما اعدت قراءته ضحكت عليه فقلت اضحكم عليا شوية:

21-3-2007

الأيام دى انا عايش فى دور محدث النعمة،
رغم انى سقت الاوتوماتيك كثير فبل كدة (اول سيارة اوتوماتيك قدتها كانت 131 اوتوماتيك بتاعه شركة انا كنت شغال فيها وكانت قديمة موديل 1978 والكلام دة كان سنه 1996 وكنت بعمل عمايل سودا وادوس على الفرامل برجلى الشمال وفضايح)

لكن دى اول سيارة اوتوماتيك امتلكها، دا غير انى كان بيعدى عليا بالشهور مش باسوق اوتوماتيك على ما تيجى فرصة اسوق عربيه حد

المهم اننى برغم انى الحمد لله متملك من العربية الى حد كبير بس بتحصل معيا فصول تفطس من الضحك

اولا انا فضلت لمدة يومين حاسس انى سايق اتوبيس نظرا لفرق العرض والطول بينها وبين الشاهين، ورفعت الكرسى على الآخر ولزقته فى الديريكيسون علشان احس ان العربية مش كبيرة وبرضه مافيش فايدة، العربية كبيرة أوى وانا تايه جواها
بس بعد يومين ابتديت املك العربية شوية وحاليا انا انتقلت من مرحلة الأوتوبيس الى اننى حاسس انى سايق مينى باص ....أهه فيه تقدم

الحاجة التانية انى كل ما اهدى العربية رجلى الشمال تطير تدور على دبرياج غير موجود، وإيدى اليمين تجرى تدور على راس العصاية، بس طبعا رجلى اليسرى تعود بخيبة املها بعدما لا تجد غير دواسة السيارة، اما يدى اليمنى فبعد ما تتلمس العصاية وتصاب بصدمة لللملمس الغريب للعصاية تتتذكر ان الدنيا هنا توماتيكى توماتيكى وان الماكينة بتنقل لنفسها، بس بحس بنوع من الحسرة كدة كل مرة تحصل الحكاية دى لأن ببقى برمجت نفسى انى هانقل وبعدين منقلتش

لما اأجى اعدى من مطب صناعى رجلى اليمين متعودة انها تاخد feed back (إعلام)من إيدى اليمين ورجلى الشمال ان انا اديت الغيار الواطى خلاص قبل ما ادوس بنزين علشان العربية متكركرش،لكن اللى بيحصل حاليا انى لما بعدى مطب مبنقلش حاجة وبالتالى ما فيش feed back راح لرجلى اليمين، فمش بترضى تدوس بنزين غير لما تستشيرنى الاول، وانا بعقد افكر شوية على ما افتكر ان الماكانه توماتيكى وان من حق رجلى اليمين انها تدوس البنزين بدون الإعلام المذكور

على آخر المشوار بحس ان رجلى الشمال اصابها الصدأ لانها مش لاقية حاجة تعملها، وبما ان الفاضى يعمل قاضى فهى عمالة تعاكس رجلى اليمين وسايقة العبط طول المشوار

الطامة الكبرى بقى حصلت لما ركبت إمبارح سيارة رينو 5 تخص احد الزملاء وطبعا ذات نقل يدوى، كل شوية الموتور صوته يصرخ وانا مستغرب هو بيصرخ ليه العبيط ده، وألاقى زمبلى بيقوللى إنقل يا عم إنقل، او ندخل على مطب وألاقى الموتور بيكركر، ماله ده فيه إيه وألاقى زميلى بيقوللى يا عم دوس دبريااااج

اما ثالثة الأثافى فقد كانت حينما حاولت انى اجيب بيها الخامس، ادوس دبرياج وانقل ماتنقلش، أجى الديها الخامس مش عايز ييجى، انا تحسرت على نفسى وقلت خلاص يا سبعاوى راحت عليك ومابقيتش تعرف تسوق ،فى النهاية صديقى سالنى هو أنت بتعمل إيه، قلتله عايز أجيب الخامس ومش عايز ييجى، قاالى ولا عمره هاييجى، قلتله ليه، قالللى علشان العربية دى أربعة غيار بس...................

انا خلاص بقيت فى قمة اللخبطة


كان هذا منذ شهور مضت امل الآن فالحمد لله انا لما بكون سايق عربية مش باخد بالى اصلا إذا كات مانيوال وللا اوتوماتيك