الموضوع: شيل هيلكس ألترا ليس أفضل من موبيل 1

توجد مواضيع كتير فى المنتدى بتتكلم عن ان زيت شيل هيلكس ألترا أفضل من موبيل1 بكتير و إن موبيل وان ده سيىء للغاية و ناس كتير بتشتكى منه و إن شل هيلكس ألترا بيهدى صوت الموتور و موبيل1 بيعلى صوت الموتور جامد و لزوجته بتروح بدرى و بيسود بسرعه و حاجه و حشه جدا وكمان شيل ألترا أرخص و ...........إلخ



المهم أنا بحط فى عربيتى من و هى زيرو موبيل 1 بقالى 70000كم و معملش معايا أى مشاكل و أداؤه زى الفل و مكانش بيسود قوى زى ما الناس بتوصف ولا حاجه و لكن من كتر كلام الناس قررت أجرب شيل ألترا وأشوف يمكن الموتور فعلا ينعم و أحس بالفرق اللى كل الناس بتقول عليه.................!!!



المهم حطيت شيل ألترا و غيرت الفلتر طبعا بواحد أصلى و إليكم ملاحظاتى:


1-بيقولوا على شيل ألترا انه أرخص من موبيل1
الملاحظة: الأتنين بنفس السعر بالضبط دلوقتى

2-بيقولوا على شيل ألترا إنه مستورد و متعبى بره
الملاحظة: شيل ألترا اللى موجود دلوقتى واللى أنا حطيت منه (صنع فى مصر) زى موبيل1 بردو

3-بيقولوا على شيل ألترا انه بيعمل فرق ملحوظ فى هدوء و نعومية الموتور و أداؤه
الملاحظة: محستش بأى فرق فى الأداء أو صوت و نعومية الموتور

4-الأتنين زيوت تخليقية 100% و درجة أداؤهم SM

5-بيقولو إن لونه مش بيغمق و يسود بسرعه زى موبيل1 (مع ان لى تحفظ على النقطه دى وهى ان الزيت اللى بينضف الموتور كويس لازم لونه يغمق)
الملاحظة: بدأ لونه يغمق بنفس درجة ملاحظتى للموبيل1 بالنسبه للكيلومتر.

6-الموبيل1 فى منه كتير مضروب و ده حقيقه و ليا ناس أعرفهم شربوا المقلب ده قبل كده و لكن الحمد لله محصلش معايا عشان انا بجيب الموبيل1 من Mobil1 Center معتمد من إكسون موبيل و فى محطة محترمه و بتعامل معاه من زمان قوى من أيام عربيتى القديمه بدون مشاكل وكمان بعد ما بيحطلى الزيت بيخرم الجركن بالمفك قبل ما يرميه.
الملاحظة: ممكن شيل ألترا يتغش هو كمان خصوصا اليومين دول بعد ما بدأ يبقه مطلوب و لا سيط.

7-الموبيل1 هو الأشهر عالميا.

8-يوجد فارق جوهرى بين الإتنين وهو ان درجات اللزوجة أصبحت الآن مختلفة بين موبيل1 و شيل ألترا اللى موجود دلوقتى لصالح الموبيل1
الملاحظة: شيل ألترا 5W-40 أما موبيل1 5W-50 وده معناه ان كفائتهم واحده فى البرد و حماية المحرك فى الجو البارد و لكن موبيل1 أفضل فى الحر الشديد و بيستحمل السخونية أفضل(بس الفرق مش كبير و الإتنين يستحملوا طقس لغاية 50 درجة مئوية)

9-عشان محدش يفتكر إنى متحيز للموبيل1 أنا هستمر على شيل لأسباب تانية غير موضوع جودة الزيت وهى انى بحترم شركة شيل عن موبيل بسبب البنزين و دايما جودة بنزين محطات شيل أفضل من موبيل و عشان كده هشجعهم بإنى أحط الزيت بتاعهم خصوصا و إنه مش أقل من موبيل1

الخلاصة انه إحتمال يكون بعض كلام الناس اللى اتكلموا قبل كده على زيت شيل يكون مضبوط و لكن شيل اللى موجود دلوقتى مختلف و مصنع فى مصر و ليس مستورد.

ونصيحه للى عاوز يحط موبيل1 (زيت ممتاز و متسمعش الإشاعات و الكلام الغير علمى عنه بس خلى بالك ان فيه منه مضروب وهو ده مكمن المشكلة فيه و لكن ممكن يتجاب من مكان موثوق فيه أو معتمد أو من توكيل العربية نفسه لو بيجيب موبيل1)