تقرير مفصل لمشكله الفتيس بالتفصيل

[google2010]

السلام عليكم ورحمه الله وبركاته

هنا انا هقولك ان شاء الله ايه الى تم بتفصيل اكبر

طبعا انا كنت عملت موضوع وحكيتلكم عن مشكلتى الى حصلت فى الفتيس وانا مسافر وده لينك الموضوع

مشكله فى الفتيس وربنا يستر

وبعد لف ومشاورات واتصالات ونصايح

وكان الاغلب الله يكرمهم يقولو كنترول فتيس المهم انا قررت انى ابتدى بالزيت بس مش كانت دى المشكله

المشكله كانت فى الاكتشاف والصدمه ده بالنسبالى انا بس بالنسبالكم مفيش صدمه ولا اكتشاف ولا حاجه

سافرت امبارح وروحت التوكيل وبضعت شويه حجات للعربيه

1 - تيل خلفى
2- فلتر زيت
3- عدد 5 زيت فتيس acdelco

دول كده لوحدهم ب 1400

وبعدين روحت جبت طقم دلايات ب 45ج
وجبت طقم غطيان برمبو ب 50ج
وجبت كافر للريموت ب 15ج
وجبت 2 علبه زيت باكم Dot 4 ب 80ج

[google2010]

انا غيرت الزيت المره الى فاتت وكنت بشدد فى الكلام دايما على كلمه ان نوعيه زيت الفتيس لازم تكون ديكسون 6
فضلت اقول ديكسون 6 وانا طلعت جايب ديكسون 3 وطبعا ده انا اكتشفه بالصدفه وانا بجيب قطع الغيار والزيت شوفت زيت فابيا نفس النوع الى كنت حاطه قبل كده فقلت ابص عليها بصه

بقرأ الكلام الى عليها لقيت مكتوب ديكسون 3 قلت فى عقلى لمصيبه ليكون الزيت الى فات كان كده وانا ماخدتش بالى
اول ما رجعت من السفر دخلت ع الجراج وطلعت علبه الزيت القديم وملقتش مكتوب عليها حاجه صورتها وطلعت البيت وبدأت ادور ع النت بكود العلبه توصلت فى الاخر ان الزيت ده atf-dexon3

طبعا كده انا استوعبت ليه الزيت مستحملش معايا وعمل الى عمله ده وبقيت مرعوب ليكون حصل مشكله فى الفتيس بسبب النوع الغير متوافق معاه ده

وطبعا بدأ يدور فى بالى ان فى عمليه تغير زيت الفتيس بينزل جزء ويتبقى جزء فى القربه مش بيتغيرو فده عادى فى الاوضاع الطبيعيه

لكن فى حالتى هتبقى كارثه لو غيرت بالطريقه دى

فضلت سهران بدور على طريقه تغير الزيت بالكامل وفعلا توصلت لطريقه هى مغامره لكن كان لابد منها

وهى انك تصفى الزيت وبعدين ترجع تزود العربيه بالكميه الى نفصت وبعد كده تفتح دوره التبريد الى خارجه من الردياتور مش الداخله .

وتدور العربيه لحد ما الزيت القديم الموجود فى القربه والسربنتينه يخرج ويطلع الزيت النضيف وبعدين تبطل وترجع تزود وتضبط مقاسك

وفعلا ده الى انا عملته وبصراحه كنت مرعوب وانا بعمله وعمليه خروج الزيت اثناء الدواره استمرت 8 ثوانى بالضبط

النتيجه بعد تغير الزيت : العطل اختفى والفتيس فرق كتير جدا وبقى ناعم فعلا انا مش عارف انا كنت مستحمله كده ازاى

الحمد الله ع كل حال بس فعلا العربيه دى عربيه محترمه لانها قدرت تنبهنى وقدرت تحمى نفسها فى الوقت المناسب

ونصيحه منى اى علامه تظهر فى العربيه افهم ان العربيه بتستنجد بيك وبتقولك الحقنى واول حاجه توقفها فورا وتستنى لما تبرد قبل ما تقوم باى تصرف

وربنا يكفيكم جميعا شر الاعطال المفجأه ع الطرق

وهرفعلكم فيديو بالطريقه الى شوفتها وعملت زيها

[google2010]

https://www.youtube.com/watch?v=MsdPAadc9fY#t=437

[hardmind_doc]

ربنا يحميهالك ان شاء الله وشكرا ع الافادة

[john55]

الحمد لله انا كنت قلت لحضرتك ان ممكن الزيت اللي كان محطوط ميكوتش متوافق معاه الحمد لله ان حضرتك اخذت بالك وربنا يوفقك وشكرا

[ahmed elsherif]

الحمد لله ان المشكله اختفت اشتريت زيت الفتيس بكام من التوكيل

[S O P H O S]

الحمد الله علي الحل وانها جت سليمة
والعربية حذرتك

[hossam_elwani]

تمام الله ينور


الزيت لوحده بكام اللتر الواحد ؟؟


والدلايات دى اصلى ؟؟


وايه طقم الغطيان ده ؟؟

[BraveHeart_13]

أولا مبروك حل المشكلة وربنا يباركلك فيها
ثانيا أرجو إنك تقولنا جبت منين الزيت ده لأنى قريت موضوعك بعد ما غيرت زيت الفتيس بتاعى وللأسف إكتشفت نفس اكتشافك وهو إنى حطيت ديكسرون 3 مش 6 .. تانى يوم قعدت أدور على الزيت اللى انت حطيته ودوخت عليه مش لاقيه .. أرجو إنك ماتبخلش بالرد وتقولنا جبته منين بالظبط وبكام؟ ..
سؤال آخر: إيه غطيان البريمبو دى؟
رجاء الرد سريعا لأن الفتيس عندى اتخنق وجزاك الله كل خير

[google2010]

جبته من التوكيل وسعره العلبه لوحده ب 94 تقريبا وجيبت 5 ب 420 ج