تقييم اوبل استرا كوزمو

[Mohyeldin1974]

السلام عليكم ورحمه الله وبركاته
ربنا انعم عليا بفضله واشتريت كوزمو لون اسود (ورايا ورايا) واحب اديكو خلفيه سريعه عن العربيات اللى ركبتها عشان اكيد التقييم بيتاثر بالخبرات السابقه:
اول ركوبه كانت عربيه الوالد ربنا يديله الصحه بيحو ٥٠٥ ثم كورولا عيون ثم كورولا ٢٠٠٦ مع سبارك ثم خارج مصر اوبل كورسا ثم استرا ستيشن
ان شاء الله احاول قريبا انزل صور لكل نقطه موجوده فى التقرير والله المستعان
وكنت بقارن من اكتر من ٨ شهور بين السبورتاج والقشقاى وix35 و XV و 3008 و الاوكتافيا والكورولا وV5 و فورتشنر وحاجات تانيه كتير ولكن رجحت رغبه العقل بناء على الظروف الحاليه والاسعار ودعم الوقود..... واليكم التقيم الشخصى المتواضع

تقييم شخصى لكوزمو بعد ٣٠٠ كم ( التقيم من ١٠)

١-- السعر .......١٠/٦ وكذلك حال جميع اسعار السيارات فى مصر مع العلم انى مخفض فى سعرها ٢٥٠٠جنيه ولكن فى راى best value for money فى هذه الفءه
٢- التكيف......لم يتم تجربته ان شاء الله بعد ١٠٠٠ كيلو وربنا يستر لان عربيتى لونها اسود
٣- الشكل الخارجى....... ١٠/٩.٥ طبعا دى ازواق ولكنها افضل تصميم وشكل خارجى فى فءتها
٤- تحميل الصاج........١٠/٨.٥ ماعدا الاكصدامات بحكم المواصفات الاوروبيه
٥- جوده التقفيل.....١٠/٩ بس ليه ملحوظه وحيده هى ان معظم الاسترا الجديده اللى شوفتها لاحظت ان الاكصدام الامامى مفارق بسيط عن جسم العربيه وكان الكلبسات مش مريحه مكانها
٦- التابلوه والتصميم الداخلى ١٠/١٠ بدون مبالغه وخاصه انوار التابلوه الناريه وان كان كثره الزراير ممكن تكون مشكله لبعض الناس ولكنى متعود عليها بحكم ان كان معايا النسخه estate خارج مصر
٧- الوسع والرحابه الداخليه ١٠/٨ بحكم ان العربيه C segment فطبيعى انها تبقى مش كبيره ولا صغيره بالذات الكنبه الخلفيه
٨- العفشه ١٠/٨ واعتقد الاداء هيتحسن مع الوقت
٩- المحرك ١٠/٨ واعتقد الاداء هيتحسن بعد مايفتح ولكنه مرضى جدا بالنسبالى بحكم انى مش بتاع تسارع وصوته ممتاز
١٠- استهلاك البنزين ١٠/٧ اعتقد ان حكم بدرى شويه لان لسه العربيه بتلين وان شاء الله بعد فتره الاستهلاك بيقل وهى بتعمل متوسط ١٠ لتر/ ١٠٠ كم داخل المدينه
١١- الفتيس ١٠/٧.٥ عندى نفس الملاحظات اللى ذكرها الزملا فى موضوع الرعشه والاحساس بتسقيط النقله فى حاله فرمله عنيفه ولكن اعتقد انها طبيعيه وليست عيب ولكنه احساس غير مرضى فقط وان شاء الله بالتحديث تختفى
١٢- الفرامل ١٠/٨ بحكم انها لسه بتطبع ولكن استجابتها ممتازه الا ان الاحساس الزياده بتساقط النقلات يعطى احساس ان الفرامل بتمسك بقوه ثم اقل ثم اقوى واعتقد انه طبيعى
١٣- الشنطه ١٠/٩ وسع ممتاز وكافى بخلاف امكانيه طى المقاعد
١٤- الاضاءه ١٠/٩ تنوع لقوه واتجاه الاضاءه وكافى جدا بخلاف الشبوره
١٥- الدريكسيون ١٠/١٠ فعلا ماشاء الله بدون مبالغه
١٦- ارتفاع السياره ١٠/٨.٥ مناسب جدا واعتقد التصميم مساعد على ارتفاع السياره من الارض ومحكتش معايا وربنا يستر

السلبيات من وجهه نظرى

١- عدم وجود فتحات تكييف للكنبه الخلفيه
٢- الاستبن صغير ومش نفس مقاس الجنط السبور
٣- عدم امكانيه غلق المرايه عن طريق الريموت مع الازاز ( لو حد يعرف يقلى) وكمان جسم المرايه مش بيلم كله يعنى بحس ان لسه المرايه مقفلتش للاخر
٤- السياره مجهزه للبلوتوث ولكن غير موجود
٥- مع كل دواره بلاحظ ان الزرار الخاص بادخال الهوا من خارج السياره بيكون off معناه ان لازم مع كل فتحه كونتاكت اشغل الزرار عشان ميدخليش هوا من بره ( بردو لو حد يعرف ازاى اخليه على طول on يقلى)
٦- الفتيس بياخر هسه فى قراءه النقله يعنى مثلا من d ل r و العكس يعنى مش تنقل وتدوس اكسريتير لا لازم تصبر لما الفتيس يقرا الحركه ويحولها ودى بتاخد جزء من الثانيه وعلى فكره كانت معايا النسخه المانيوال بره مصر ومان لازم بردو اصبر على الفتيس جزء من الثانيه عشان ياخد النقله ولكن هو مش عيب هو تكنولوجيا مختلفه والله اعلم.
٧- صندوق التابلوه مفيهوش تلاجه
٨- الاريال تركيب قلووظ مش fixed يعنى لو ركبته مش هتلاقيه
٩- فرامل اليد ودى عن تجربه شخصيه وهو موضوع ممكن يبقى ايجابى عند بعض الزملا وهو ان فرامل اليد كهربا يعنى لو مشدوده والعربيه واقفه ودورت وزودت بنزين على nاو p عادى الفرمله تفك نفسها اوتوماتيك حتى لو طلعت بالعربيه وهى مشدوده هى بتفك نفسها اتوماتيك عادى ونصيحتى هنا لبعض الاخوه اللى ممكن يسيبوا اولادهم يقعدو يلعبو فى العربيه لبعض الوقت ان فى حاله الدوس على الاكسراتير والعربيه معشقه الفرامل هتقرا انك عايز تتحرك وهتفك نفسها اتوماتيك وممكن لاقدر الله تبقى العربيه فى منزل وتعمل مشكله.
١٠- قفل الباب مش بيقفل اتوماتيك بعد العربيه مابتتحرك ( لو حد يعرف يقلى) يعنى لازم ااقفل اللوك يدوى من الزرار

ان شاء الله مع الوقت اعمل تحديث للمعلومات وانزل صور
حاولت اوجز قدر الامكان واتمنى ان اكون قد افدت الكل...... وتقبلوا تحياتى ونسالكم الدعاء

[Mzeid]

الف مبروك العربية
و ربنا يبارك لك فيها

بالنسبة لزرار دخول الهوا لو هو على off يبقى كدة مش بيدخل هوا من الخارج ولا ايه ؟

[Mohyeldin1974]

الف مبروك العربية
و ربنا يبارك لك فيها

بالنسبة لزرار دخول الهوا لو هو على off يبقى كدة مش بيدخل هوا من الخارج ولا ايه ؟

ربنا يخليك
لا الموضوع معكوس يعنى الزرار وهو مش منور يدخلك هوا ولما تدوس عليه بتاكتفه وبتمنع دخول الهوا عارف انت نظام نفى النفى اثبات

[reda elgohary]

ربنا يبارك لك فيها وان شاء الله تكون فاتحة خير عليك وتكون عن حسن ظنك .

[Mohyeldin1974]

ربنا يبارك لك فيها وان شاء الله تكون فاتحة خير عليك وتكون عن حسن ظنك .

اللهم امين وشكرا لحضرتك

[m.farouk]

علشان الابوب تعمل معاك لوك لوحدها اول لم تتحرك هتلقى زرار فى التبلوة config ثم اختار اخر اختيار وانزل لحد لم تلقى door look او حاجة مشبة لكده هتلقها off غيرهاon معلش انا مش فى العربية فالمسميات مش قدامى بالظبط وبالنسبة لموضوع فتحة الهواء بتاعة التكيف كانت عندى نفس المشكلة بس حلتها بس مش فاكر ازى بس من نفس المكان برضوا وبرضوا تقدر تخلى العربية لم تفتحا بالريموت تنور النور الواطى لمده 30 ثانية زى المرسيدس

[dede_dodo88]

أنا كان عندي في الأول الأبواب بتقفل أول ما أنقل الفتيس للـd من غير حتى ما أتحرك, و تفتح تاني أول ما أجيب p.. بس مش عارف أيه حصل بعد أخر صيانة و بقيت لازم أتحرك لحد سرعة 10 أو 15 تقريباً عشان الأبواب تقفل.. و مبقتش تفتح تاني لما أجيب p فلازم أفتحها بنفسي..
و مش لاقي أوبشن أزاي أرجعها زي ما كانت!!

[zegna]

علشان الابوب تعمل معاك لوك لوحدها اول لم تتحرك هتلقى زرار فى التبلوة config ثم اختار اخر اختيار وانزل لحد لم تلقى door look او حاجة مشبة لكده هتلقها off غيرهاon معلش انا مش فى العربية فالمسميات مش قدامى بالظبط وبالنسبة لموضوع فتحة الهواء بتاعة التكيف كانت عندى نفس المشكلة بس حلتها بس مش فاكر ازى بس من نفس المكان برضوا وبرضوا تقدر تخلى العربية لم تفتحا بالريموت تنور النور الواطى لمده 30 ثانية زى المرسيدس

متاكد من موضوع فتحة الهوء التكييف دة انوة بيتعمل؟؟ لاني حاولت بكل الطرق ومفيش فايدة ودخلت علي config climate control mode وجربت كلو محصلش حاجة تقريبا لازم تدوس علي الزورار كل ماتشغل العربية هيا شغلانة انا معاية اوبل استرا gtc الجديدة لو حد يعرف بيتعمل ازاي يقولنا

[Mzeid]

ربنا يخليك
لا الموضوع معكوس يعنى الزرار وهو مش منور يدخلك هوا ولما تدوس عليه بتاكتفه وبتمنع دخول الهوا عارف انت نظام نفى النفى اثبات

تمام وصلت

[esam123]

مبروك عليك وربنا يحفظهالك وياريت ملاحظاتك والصور اول باول

[janagabr]

٣- عدم امكانيه غلق المرايه عن طريق الريموت مع الازاز ( لو حد يعرف يقلى) وكمان جسم المرايه مش بيلم كله يعنى بحس ان لسه المرايه مقفلتش للاخر
٥- مع كل دواره بلاحظ ان الزرار الخاص بادخال الهوا من خارج السياره بيكون off معناه ان لازم مع كل فتحه كونتاكت اشغل الزرار عشان ميدخليش هوا من بره ( بردو لو حد يعرف ازاى اخليه على طول on يقلى)
٩- فرامل اليد ودى عن تجربه شخصيه وهو موضوع ممكن يبقى ايجابى عند بعض الزملا وهو ان فرامل اليد كهربا
١٠- قفل الباب مش بيقفل اتوماتيك بعد العربيه مابتتحرك ( لو حد يعرف يقلى) يعنى لازم ااقفل اللوك يدوى من الزرار

تسلم ايدك علي التقرير المفيد
1- موضوع غلق المرايا دة شلني بصراحة كان لازم يعملوا في الريموت زرار غلق المرايا لان كل مااركن العربية واقفلها وامشي افتكر ان المرايا مفتوحة فارجع تاني افح العربية واقفل المرايا من جوة لحد ما بقيت انفض واسيب المرايا مفتوحه ( الكسل حلو مفيش كلام )
2- موضوع الهوا السخن اللي بيخش العربية دة في الاول جنني كنت بافتكر ان العربية بتسخن لدرجة الهوا السخن بيخشلي جوة فكنت باقف افتح الكبوت مالقيش حاجة لحد معرفت حوار الزرار اللي بدوس علية عشان يقفل الفتحة
3- اما فرامل اليد دة جايبلي عقدة نفسية عشان متعود ان لازم ارفع العصايه لما اقف اما الزرار بحس بالدلع زيادة عن اللزوم يعني تحطة لواحدة بنت او ست بتمشي علي ملها ورايقة انما اا كل شويه بنمشي ونقف ونسيب العربية شغالة عقبال ما تجيب حاجة من كشك فبخاف علي الزرار تحس انه بيسحب كهرباء من بيتنا بفلوس الموضوع حالة نفسية بحتة او تعود ( المصري معروف بجبروتة )
4- القفل بيقفل لوحدة بعد ماتمشي بالعربية وتعدي سرعة عشرة العب في السيتنج ولما تشيل المفتاح من الكونتاكت يفتح القفل لوحدة

[zegna]

علي فكرة زورار فرامل اليد دة خلاص كل العربيات الجديدة نازلة بية معدوش هيستعملو اليد تاني البنتلي و الرانج روفر والمرسيدس الجديدة دة حتي الامبروجيني افينتدور فيها زورار

[omar-saad]

علي فكرة زورار فرامل اليد دة خلاص كل العربيات الجديدة نازلة بية معدوش هيستعملو اليد تاني البنتلي و الرانج روفر والمرسيدس الجديدة دة حتي الامبروجيني افينتدور فيها زورار

طيب الوحد يخمس ازاى بس بعد كدة !

[zegna]

معنتش هتعرف تخمس دة بعد كدة هيشيلو الفتيس لو بصيت علي المرسيدس a الجديدة مش هتلاقي فيها فتيس الفتيس في اليد مكان يد المساحات + شيفتات في الدركسيون يعني يد الفتيس دي خلاص قريب هتتشال هيا كمان

[dramir1]

الف مبروك العربية