فتحة سقف أو لا فتحة سقف؟؟

[ahmed_salah]

انا و انا بدور على ميجان دايما بدور فى البانوراما لان ببساطة مفيش فرق سعر مش زى الانسر مثلا و بالتالى مدام كدا كدا هشترى و هدفع فى حاجة كويسة طب ايه المانع انى اجيب حاجة كويسة و بفتحة سقف ؟

كمان عشان لما تيجى تبيع هتلاقى شريحة عريضة جدا بيفكرو نفس التفكير و ممكن العربية يكون مفيهوش غلطة بس مفيهاش فتحة سقف تقوم تهبط عملية البيع

للأسف يا باشا الحقيقة غير كدة...
اللي بيحاول يبيع ميجان بانوراما بيغلب جامد في بيعها حسب ماشفت على مواقع بيع السيارات في مصر...

[ahmed_salah]

فتحة السقف ظريفة اه لكن هى مش مهمة لينا قوى للاسباب الاتية ..

-معظم شهور السنة بيكون الجو حار ..يعنى حتكون قافل فتحتة السقف و كمان قافل الشيش عشان ضوء و حرارة الشمس متوصلش لداخل المقصورة .

- لو حتفتح الزجاج و تشغل التكيف العربية حتستهلك بنزين اكتر عشان التكييف يعادل الحرارة جوة المقصورة .و فى الاخر برضو حتقفل الشيش عشان حرارة الشمس القوية .

- مش حتفتح الفتحة على الاخر عشان حتدخلك هواء كلة اتربة و غبار و حتكتشف بعد شوية انك محتاج تنظف المقصورة من كميات اتربة و رمال كتير دخلت جوة و مشكلة فى تنظفها بعد كدة .

- ممكن الفتحة بعد فترة من الاستعمال يبداء الغلق بتعاها يكون مش تمام و يبداء بيسرب اتربة و ماء .

- من ناحية الامان ..الفتحة مش امنة قوى " مش زى الصلب بتاع جسم السيارة " فى حالة اى حادث لا قدر اللة "انقلاب السيارة مثلا " , و بتقلل من قوة سقف السيارة بنسبة مش قليلة .

- فتحتة السقف بتقلل بنسبة ما العزل الصوتى داخل السيارة حتى لو مغلقة لان الزجاج مع الشيش مش عازل للصوت زى الجسم الصلب بتاع العربية .

الخلاصة ان فتحتة السقف مش مناسبة لبلد زى مصر ..الحرارة مرتفعة فيها و التلوث فى اعلى مستوياتة ..حتلاقى معظم اوقات السنة الفتحة مغلقة و غيرمستعملة .

الفتحة مناسبة اكتر بكتير للبلاد الباردة و التى يمكن الاستمتاع فيها بصفاء الطبيعة و الهواء و هى الدول الاوروبية و ماثيلاتها .

جزاك الله خير يا باشا...
هو دة الكلام المنطقي العلمي اللي كنت عايز أعرفه...