مشكله بسيطه في ال Cd

[Ramy_Tantawi]

السلام عليكم ورحمة الله وبركاته ازيكم يا وحوووووش .

عندي مشكله حصلتلي انهارده بعد الحديث مع أخونا الفاضل استاذ طارق بخصوص انه ركب DVD ربنا يباركله فيه ان شاء الله المهم انا كنت عامل الخطوه دي من زمان وكنت فاصل ال CD Player بتاع العربيه انهارده قلت انزل ارجعه تاني انا كنت مركب MP3 Player pioneer وعشان ماعكش في التوصيلات والكلام ده كنت شاري فيشه ISO عشان تحول فيشة الفابريقه اللي داخله للسيدي الاصلي الى البيونير .........عشان كده قلت انهارده اجرب افصل الفيشه دي وارجع الامور لقديمها تاني وكانت المشكله هنا .

السيدي واصله كهرباء وبينور ودخلت اسطاونه وخرجتها كله تمام المشكله ان مافيش اي كلام على الشاشه فوق ولا اي كونترول على السيدي في صوت Error بيطلع كل مادوس اي زرار لكن الشاشه مش حاسه اصلاً ان الكاسيت قايم او لأ .............قلت يمكن المشكله في الشاشه بس الشاشه عندي فيها درجة الحراره والساعه ظاهرين طبيعي جداً يعني الشاشه شغاله فين المشكله ؟؟؟؟؟؟؟؟؟؟؟؟؟

يا رب مايطلع حصل حاجه للCD Player الاصلي بتاع العربيه لحسن ممكن يجرالي فيها حاجه دي :k41:............ها ايه رأي الوحوش والخبراء في المشكله دي ؟

[ضيف]

إن شاء الله تكون بسيطة

يا ترى الراديو شغااااال و لا بيفصل بعد فترة ولا مش شغال خالص؟

[Ramy_Tantawi]

للأس مافيش اي حاجه شغاله غير انه منور وبيطلع صوت Error في اي ضغطه اعملها........

انا كنت منتظر انه يطلب الكود والكلام ده لكن مش مكتوب اي حاجه على الشاشه فوق مش عارف في ايه .

[farahat]

إنت وصلت الفيشة السوداء فقط ؟ قصة الرنو فيه فيشة سودا و فيشة تانية أعتقد كانت زرقاء و دي إلي بتوصل البيانات للشاشة
راجع كدة كل الفيش تاني و إن شاء الله مفيش مشكلة ، بسيطة

[ضيف]

الحمد لله خير

موضوع فيوز فقط لاغير بيتغير من درج الفيوزات الموجود جهة ركبة السائق من اليسار جهة الباب
بإذن الله مش حاجة تانية

[Ramy_Tantawi]

هو في فيشه تانيه للشاشه فعلاً ؟ ؟
انا على ما اذكر لما ركبت البيونير من سنه تقريبا كانت فيشه واحده بس اللي متركبه سوده و عريضه......انا فعلاً استوقفني ان في مكان لفيشه تانيه في الجهاز نفسه بس دورت على اي وصله كده ولا كده مالفيتش اي حاجه.

حضرتك متأكد يا استاذ فرحات ان في فيشه تانيه لازم تركب غير السوده العريضه دي ؟

[ضيف]

لو الولاعة كمان مش شغالة يبقى فيوز يا باشا

[farahat]

رامي باشا ، البيونير ماكنش بيعرض على الشاشة عشان كدة مكنش محتاج الوصلة دي ، لكن الجهاز الأصلي عايزها عشان يعرف يتعامل مع الشاشة ، و أنا أعتقد الارور دة ناتج من إن الجهز عايز الكود و إنت بتدوس حاجات تانية فعمال يزمر و خلاص ، جرب دخل الكود و إنت مش شايف حاجة على الشاشة هتلقيه إشتغل إن شاء الله
بس عموماً إنت محتاج تراجع موضوع وصلة الشاشة ده ، أنا مش متأكد بالضبط شكلها إيه لأن أنا عملت القصة دي من سنة تقريباً ، بس أنا فاكر إن كان في فيشتين

[Ramy_Tantawi]

سيادة العقيد خالد اشكر مشاركتك وانا بالفعل اول حاجه شكيت فيها هي الفيوزات لكن لقيت كله تمام حتى شلت الفيوز عشان اتأكد 100 % انه مش فيوز والحمد لله قطع مني مياه ونور ........جزاكم الله كل خير يا فندم على المشاركه.

استاذ فرحات . جزيل الشكر يا باشا على المداخله ..... مش عارف ليه انا بدأت اجمع ان ممكن فعلاً يكون في فيشه تانيه لان ليها مكان في الجهاز واستغربت ان مكانها فاضي.......عموماً واضح فعلاً انه زي ما حضرتك بتقول تفسير الزماره الدائمه دي انه محتاج الكود المشكله ان الكود عندي بيدخل بطريقه غريبه لازم افضل بالبكره اللي في Steering Control اقلب لغاية ما الرقم الصحيح ييجي........وده طبعاً يستحيل اعمله والشاشه مش جايبه حاجه ..........املي الوحيد اني افك الجهاز تاني من مكانه وادور على الفيشه التانيه دي وربنا يكرم ان شاء الله والاقيها.

شكراً يا استاذ فرحات مره اخرى وجزاكم الله كل خير طمنتوني والله بجد.

[farahat]

إن شاء الله تطلع مشكلة بسيطة و تتحل قريباً ، و لو في حاجة محتاجة تدخل أنا تحت أمرك
و ابقى طمننا متنساش

[ضيف]

سيادة العقيد خالد اشكر مشاركتك وانا بالفعل اول حاجه شكيت فيها هي الفيوزات لكن لقيت كله تمام حتى شلت الفيوز عشان اتأكد 100 % انه مش فيوز والحمد لله قطع مني مياه ونور ........جزاكم الله كل خير يا فندم على المشاركه.

لا شكر على واجب و ياريت تطمنا كلنا قريب جدا
(أرجوك بلاش سيادة العقيد و مشيها خالد بس علشان أحس إني أخوك فعلا...و الكلام للكل في رينو إخواني كلهم)
بالتوفيق إن شاء الله

[Ramy_Tantawi]

السلام عليكم .....

الحمد لله عملت ال سيدي زي ما استاذ فرحات جزاه الله خير قال بالظبط في فيشه تانيه للشاشه بس تقريباً حصل عندي حول فني امبارح وماشفتهاش وانهارده برده لقيتها بصعوبه الحمد لله محشوره محالتها صعبه لكن الحمد لله شغاله .............

الحمد لله مافيش مشاكل وكله تمام السيدي اشتغل والامور طبيعيه جداً .

جزيل الشكر لاستاذ فرحات وسيادة العقيد خالد وجزاكم الله كل خير .

[ضيف]

اللهم أدمها علينا نعمة

اللهم أدم علينا نعمة التعاون و الإطمئنان على بعض
الحمد لله إنها بسيطة و دايما مبسوط
أضم صوتي لحضرتك لشكر الأستاذ/ فرحات و كل من يتعاون ليفرج عن أخيه
دائما في المقدمة يا وحوش رينو

[farahat]

ألف مبروك يا رامي باشا ، الحمد لله إن كله بقى تمام
و يا سيدي لا شكر على واجب أنا معملتش أي حاجة ، أنا إلي أعرفه قولته ، و بعدين احنا هنا كلنا إخوات ، ولا إيه ؟؟
و شكراً خالد باشا الى كلامك الرقيق ، كلك ذوق يا فندم ، و احنا فعلاً نعتز بيك أخ لينا ، و أنا شخصين بعتز بكل وحوش رينو لأنهم فعلاً إخوة أفاضل ، وحوش على حق :)