محتاج عربيه ستروين

[Hazem ELsayed]

السلام عليكم
دا اول موضوع ليا في المنتدي
و عايز اقولكم تني اتبهدلت في سوق السيارات لاني عايز اشتري عربيه مخترمه قطع غيارها متوسطة السعر او غاليه بس بتعيش و تبقاش عربيه صغيرة و تكون ثابته علي الطريق متكونش بتحرق بنزين عشان انتو فهمين سعر البنزين كمان سنه مش عارفين حيكون بكام
اللي واجهته التالي
1- عدم منطقيه اسعار العربيات المستعمله علي الانترنت
بمعني ان لو واحد اتجن في دماغه و قال حبيع عربيتي ب 40 عشان واحد عرضها 38 و انا حالتي احسن تلاقي يجي بعد منه واحد من وجهت نظره انه عربيته احسن يبيع ب42 و هكذا بدون النظر لسعر السوق و الحاله دي في الستروين اكسارا اللى كانت 2002 ب37 من تلات شهور و انهاردة الناس بتبيع موديلات 2000 ب45 اللف

2- عدم امانه اللي بيبعو العربيات
يعني يقولك عربيه فبريكه و هو قصده انها مخبوطه بس مرضاش يصلحها عشان ميبقاش اترشت طيب و ايه يعني ماهي مخبوطه او مثلا التابلوه مكسر و كرسي السواق قاعدته مكسور و يقولك مرضتش اغيرهم عشان مبيبقاش عندي حاجة مش فبريكه

3- عدم وجود مراجع و ضوابط صريحة للحكم علي السيارات
يعني مثلا حبيت اجيب سي ثري ستروين قريت علي النت تناقض غريب في توافر قطع الغيار
حبيت اجيب اكسارا 2 2002 كله خوفني من توافر الفوانيس و الاكصدامات
حبيت اجيب اكسارا بيكاسو 2002 ( تحفه ) لقيت تناقض في توافر الفوانيس و دواخل العربيه و الحجات دي

اعمل ايه يا جماعه
انصحوني
انا قدامي تلت عربيات
1- اكسارا وان 2001 ماشيه 148 حالتها محترمه التابلوه بس مكسور من عند فتحه التكيف و كرسي السواق بايظ دراعه و البوهيه بتاعه الشنطه مقشرة بيتكلم في 38500
2- اكسارا 2 2002 ماشيه 245 حاله الماتور ممتاز بس العافشه فها صوت و خبطات في الخارج و الفرش مبهدل شويه التكيف مش شغال شرخ في الزجاج بيتكلم في 33000
3- اكسارا بيكاسو 2002 خربيش في الخارج فانوس ورا و قدام يمين مكسور الشبكه اللي قدام اللي عليها اللوجو مكسورة الفرش متبهدل ماشيه 120 الف بيتكلم في 45
4- ستروين c3 كتير قوي في السوق و خوفوني من توافر قطع الغيار استيراد و ان جديدة غاليه و مثلا الاسكاترا ب15000 جديدة ( ياترى هل في منها مستعمل ) سعر العربيه متوسط 38000

افتوني و يا ريت بذكر الاسباب التاليه
1- ثبات العربيه
2- توافر قطع الغيار
3- اعتماديه قطع الغيار و عمرها
4- متعه القيادة ( للعلم انا مش سواق شاطر لاني دي اول عربيه ليا )

مستني رٍئي اصحاب الخبرة و افيدوني افادكم الله

[Hazem ELsayed]

هي الردود بتنزل امتي ؟؟؟

[solimanss]

من خلال الكيلو متر اللى حضرتك كاتبه انصح بالبيكاسو عربيه محترمه و عاليه اما قطغ الغيار منتشره جدا و خاصتا فى صقر قريش المعادى و الورش كمان و ربنا يوفقك

[Hazem ELsayed]

شكراً للاهتمام و الرد
بخصوص البيكاسو
الناس خوفتني من قطع الغيار زي الفنوس و الاكصدام المرايات بيقولو مش موجودة
و حسب مسمعت الماتور و العفشه حجاتهم متوافرة
اكيد انت ادري بس انصحني من نحيه العربيه بغض النظر عن الكيلو ميترات لاني ممكن ادور علي حاجة ماشيه اقل

[tareksakr]

كل قطع غيار البيكاسو موجوده في الحرفيين بس دور علي حاله نضيفه عشان ماتتعبش في الاصلاح

[solimanss]

مفيش اى حاجه لاى نوع فى دول مش موجود انزل صقر قريش و الحرفيين و الهرم و التوفيقيه واسال بنفسك سيبك من كلام الناس اللى مركبتش ستروين اصلا اما رائى الخاص لو عايز مانوال يبقى بيكاسو لو اتوماتيك اكسارا 2 اما السى 3 خارج المقارنه دى وبالتوفيق تحياتى

[Hazem ELsayed]

شكراً لاهتمامكم و ياريت لو في رقم حد تعرفوه اشوف عنده قطع الغيار

[solimanss]

01223104438 ده رقم المهندس ايهاب جلال اسالو على اى حاجه تخص ستروين عن تجربه وبعد لف على معظم ورش ستروين فى مصر ملقتش فى مهارته و امانته الصراحه و بالتوفيق

[scaniax]

01223104438 ده رقم المهندس ايهاب جلال اسالو على اى حاجه تخص ستروين عن تجربه وبعد لف على معظم ورش ستروين فى مصر ملقتش فى مهارته و امانته الصراحه و بالتوفيق

يص يا باشا المهندس ايهاب عنده عربية واحدة و معندوش تانى و مستحيل تجيب للبيكاسو حاجة من اى حته و اراحنك لو لقيت سلك بنزين فى اى حته خالص و بالنسبة للاكستدارا تو قطع غيارها غالية جدا و صنايعيتها غالين علشان الشغل فيها صعب انا م. كانت معايا اكسارا وان و بقولك خليك فى الون موتورها بيستحمل و قطع غيارها رخيصة جظا و متوفرة فى الحرفيين بكثرة و بملاليم و اثولك مؤمن عنده و شعبان عنده و كل الناس عندهم و اى استفسار
انا تحت امرك و سيبك من الردود اللى هتوحلك

[Hazem ELsayed]

شكراً للرد و الاهتمام و الله بصراحه انا مستريح اكتر للاكسارا ون عشان كلام الناس عنها كتير و بيقولو موجودة
و كمان زي مقولتلكم هي حالتها حلوة و فيها شغل بسيط بس افتيني سعرها المناسب ممكن يكون كام لو سمحت

[scaniax]

شكراً للرد و الاهتمام و الله بصراحه انا مستريح اكتر للاكسارا ون عشان كلام الناس عنها كتير و بيقولو موجودة
و كمان زي مقولتلكم هي حالتها حلوة و فيها شغل بسيط بس افتيني سعرها المناسب ممكن يكون كام لو سمحت

اكسارا ون سعرها بيتراوح من ٣٣٠٠٠ لحد ٤٠٠٠٠ و حسب الحالة العامة طيعا و الكماليات اللى شغالة و اداء العربية طبعا فى عيوب فى كل العربيات منها الدنجل الخلفى او العفشة الخلفية فى الاكسارا عموما بتوطى و دى بتترفع بسهولة مش عيب جوهرى انما فى الاول و الاخر هتلاقى كتير فى عربيه كنت شوفتها لزاحد صاحبى كانت معروضة على النت خطيرة بس اختلفنا علشان صاحبى كان عاوز يدفع جزء و يبقى جزء و الراجل مرضيش عايز اقولك ان فى عربيات اكسارا لسة حلوة قوى و حالتها حلوة و ماتقلقش من الكيلوات الاكسارا مكتوب فى كتالوجها المتور صالح احد مليون كيلو متر المهم الحالة العامة

[Hazem ELsayed]

اولا كل سنه و انت طيب
و شكرا علي مشاركتك دي
طيب متبعتلي لنك العربيه دي ابص عليها و هي كانت مشيه كام و معروضه بكام

[virse]

الاكسارا 1 عربيه محترمه جدا انا قدامي واحدة حلوة بس عايزة شويه شغل صاحبها عايز 35 الف وانا ربنا يسهل ممكن اخلصها ب 32 او 33 ولا حاجة ادعولي وتصرف كمان 3 او 4 الاف وتبقي عروسه ان شاء اللهبس بجد عربيه جميله وثابته وبتجري وناس كتير جدا بتشكر فيها

[Hazem ELsayed]

الاكسارا 1 عربيه محترمه جدا انا قدامي واحدة حلوة بس عايزة شويه شغل صاحبها عايز 35 الف وانا ربنا يسهل ممكن اخلصها ب 32 او 33 ولا حاجة ادعولي وتصرف كمان 3 او 4 الاف وتبقي عروسه ان شاء اللهبس بجد عربيه جميله وثابته وبتجري وناس كتير جدا بتشكر فيها

مبروك يا ريس انا نويت ان شاءالله اخلص مع الراجل بتاع الاكسارا وان بعد بكرة بس هو ماسك علي ٣٨ ماشيه ١٤٨ و فيها التابلوة ماكسور و كرسي السواق الدراع اللي بيرفعه بايض محدش يعرف يكلف مام الدراع دا و هل السعر مناسب ولا لاء

[fepsceasar]

مبروك يا ريس انا نويت ان شاءالله اخلص مع الراجل بتاع الاكسارا وان بعد بكرة بس هو ماسك علي ٣٨ ماشيه ١٤٨ و فيها التابلوة ماكسور و كرسي السواق الدراع اللي بيرفعه بايض محدش يعرف يكلف مام الدراع دا و هل السعر مناسب ولا لاء

رايي الاكسارا 1 ثم البيكاسو
انا اشتريت العربية وبعتها وما كنتش عارف حاجة عن الدرا اللى بيرفع الكرسي
معرفش ينفع تجيب الدراع بس ولا لا لكن الكرسي كامل موجود فى الوكالة
التابلوه مكسور؟؟ ولا الهواياات او الفريم بتاع زراير الازاز؟؟
الهوايات والفريم بيتباعوا لوحدهم ومش العيب الجوهري
لو العربية مافيهاش مشاكل تانية اتفاهم مع الرجل وربنا يوفقك