إستفسارات حول شكمان الايبيزا

[egman]

السلام عليكم ورحمة الله وبركاته

[justify]

انا معايا ايبيزا 94 موتور 1400 سي سي وكان عندى علبه الشكمان الى هى علبه البيئة الى بتكون تحت عصاية الفتيس بتعمل زنة ورجه وبقت تخبط فى العربية المهم رحت لواحد بتاع شكمانات المهم غطس تحت العربية وقالى كذا مصطلح ليها وهم الفلتر ده يا بيه عايز يتغير وبعد كده قالى علبه بيئة وبعد كده قالى علبه الشكمان المهم هى مكنها تحت عصاية الفتيس انا علبتى كانت شكلها مميزعن الى ركبت الى ركبها عباره عن معدن مش عارف استانلس او الومنيوم مش عارف وممكن يكون صاج عادى بس محمل واسطوانية الشكل وهى ارفع من الى كانت عندى الى عندى كان شكله مربع وفيها اخرام وحاسس انها افضل المهم ركب الجديدة ما بقتش تخبط فى العربية وانا بدورها وانا بنقل فى الغيارات المهم كام يوم وحسيت بقله فى السحب ملحوظة وكمان وانا على الغيار الخامس وبدوس بنزين العربية ما طلعتش على 120 ولقيت ان موشر الحرارة اتحرك لبعد النص رحت ولما الميكانيكي شاف العلبه الى ركبت قالى انها صغيره وانها هتخنق العربية ده الحوار الى دار والسوال هنا بقى :
[/justify]

1. هل يوجد علبه شكمان مخصصة للايبيزا ؟
   
   
2. هل العلبة ده ليها قياسات معينة ؟
   
   
3. هل ليها ماركة معينة ولا لأ ؟
   
   
4. هل تباع عند بتوع قطع الغيار ولا فقط عند بتوع الشكمانات ؟
   
   
5. هل فعلا لو العلبة صغيرة تخنق العربية وتقلل السحب وتتسبب ان العربية ممكن تسخن ؟
   
   
6. يا ريت لو حد يشرحلنا شكل مكونات الشكمان كله من اول العربية لاخرها والعلب الى فيه ووظيفته لانى ما اعرفش اى حاجة عنه ؟
   
   
7. اية أعطال الشكمان والعلب بتاعته واشكال الاعطال ؟
   
   
8. واية التاثيرات والاضرار الى الشكمان ممكن ياثر فيها على السيارة ؟
   
   
   
9. مين احسن واحد ويكون عنده ضمييييييييييييييييييييييير فى الموضوع ده وشغله نضيف ومصنعيته وعنوانه ؟
   
   
   
10. ما هو سعر علبه الشكمان ده او الفلتر او علبه البيئة ولو كان فية علب تانية فى الشكمان اية هى اسمها واسعارها ؟

جزاكم الله كل الخير ومنتظر رايكم على احر من الجمر لان الموضوع رخم وقالقنى جدا جدا جدا ...............

[ehab_mansour]

و عليكم السلام ورحمة الله وبركاته

أولا : اللي بيعملو شغل شكمانات بلدي كتير و بيعملو بدايل كتير أيضا لذلك اللي حصل عندك ان علبة البيئة ممكن يكون الشكمان عندها كان ملووح او مش مضبوط ومحتاج يتظبط بس في مساره بحيث ميحكش في جسم العربية ولا يخبط فيها أعتقد ان ده كان المفروض هو الحل الأمثل حتي لو بايظة

وممكن أيضا تكون بايظة ومحتاجه تتغير وهو غيرهالك بحاجه اسمها رنان وده بديل لعلبة البيئة عشان يقلل ضغط العادم و يخفض الصوت فقط ولكنه لا يقوم بالوظيفة الأساسية لعلبة البيئة و هي تحويل اول اكسيد الكربون الضار الموجود في العادم الي ثاني اكسيد الكربون

وعشان الرنان ده مش اوريجينال مصنع اي حاجه بدون مواصفات قياسية فبالتأكيد بيؤثر علي ضغط العادم و بيؤدي الي حبسه اكثر من اللازم وبذلك يؤدي الي ضعف السحب وارتفاع حرارة العربية و المحرك

اهم حاجه انك تكون أخدت العلبة الأصلية اللي هو شالها قبل متمشي ؟؟

ثانيا :- مكونات شكمان السيارة من بعد الحرك مباشرة
1- فرن الشكمان و ده المربوط علي جسم المحرك مباشرة عند فتحات خروج العادم
2- المشترك وده جزء عبارة عن ماسورة بتركب بين الفرن و بين علبة البيئة و أوقات و في بعض السيارات بيكون في وسطها سوستة لتقليل اهتزاز الشكمان مع اهتزاز المحرك
3- علبة البيئة ودي تسمي catalytec converter وسبق شرح وظيفتها
4- علبة شكمان أولي silencer 1 ودي العلبة الأولي لتقليل صوت اندفاع العادم وتهدئته وتهدئة ظغطه
5- علبة شكمان ثانية silencer 2 وده أيضا لتقليل الصوت والضغط و في نهايتها ذيل الشمكان

ودي صور توضح الشرح

دي صورة المشترك و علبة البيئة

Uploaded with ImageShack.us
ودي صورة ال العلبة الأولي

Uploaded with ImageShack.us
ودي صورة العلبة الأخيرة


Uploaded with ImageShack.us

و طبعا العلب بتختلف علي حسب سعة المحرك و كوده
بالنسبة لمشكلتك دي لو كان الموضوع تخبيط بس ولكن صوت الشكمان كويس ومافيش فيه مشكلة وناعم يبقي تحتاج الي ضبط فقط و تغيير كوتشة تثبيت و تربيط جيد للشكمان ووصلاته
منتظر ردك عشان نعرف ايه المشكلة الأساسية وكيفية الحل
والله الموفق

[egman]

اولا انا بشكرك على الشرح الاكتر من وافي

تانى حاجة انا مشكلتى دلوقتى بعد تغيير العلبه ده الاتى :


1- ان السحب قل عن الاول جدا .

2- حرارة العربية بتعلى عن الطبيعي فى السرعات العالية .

3- اما موضوع التخبيط ده كان فى الاول وانتهت المشكلة وهو فعلا قالى انا لماسورة كانت ملوحه وهو عدلها وربطها .

المهم بقى ان الراجل لم يعطينى العلبه القديمة بحجة انه دخلها فى الجديدة واخد 100 جنية وطبعا علشان انا اول مرة شكمان فضحك عليا بسهولة وانا مش عارف التصرف يكون ازاى والمشكلة ده حلها ازاى ..........

[ehab_mansour]

اولا انا بشكرك على الشرح الاكتر من وافي

تانى حاجة انا مشكلتى دلوقتى بعد تغيير العلبه ده الاتى :


1- ان السحب قل عن الاول جدا .

2- حرارة العربية بتعلى عن الطبيعي فى السرعات العالية .

3- اما موضوع التخبيط ده كان فى الاول وانتهت المشكلة وهو فعلا قالى انا لماسورة كانت ملوحه وهو عدلها وربطها .

المهم بقى ان الراجل لم يعطينى العلبه القديمة بحجة انه دخلها فى الجديدة واخد 100 جنية وطبعا علشان انا اول مرة شكمان فضحك عليا بسهولة وانا مش عارف التصرف يكون ازاى والمشكلة ده حلها ازاى ..........

مرديتش علي سؤالي الأساسي... هل الشكمان كله كان صوته العام مثلا جيد معاك ومش عالي ولكن كل المشكلة انه اوقات كان بيخبط بس ولا كان صوته سييء و بيخبط كمان ؟؟؟؟؟؟؟؟؟
وهل لما كان الصوت سييء كنت حاس انه مصدره العلبة اللي اتغيرت ولا من علبة أخري ؟

موضوع انه أخدها دي حاجه مؤسفة جدا لأن علبة البيئة بيعاد (بضم الياء) ملئها فحم و تنظيفها و تغيير مكوناتها الداخلية ووبيقفلها و بيرجع يشغلها تاني

وثمنها جديده يقارب او يزيد عن ال 1000 جنيها

منتظر ردك وهل تقدر تجيبها منه تاني وترجعله حاجته ولا لأ ؟

[egman]

لأ الشكمان كله كان صوته طبيعي جدا جدا هو بس الخبط ده والصوت كان مصدره العلبة وهو بعد ما فكها قعد يلحم فيها كام حاجة كده وقالى مش هتشتغل كويس من كتر اللحمات الى هعملها فيها ..............

اما عن رجوع العلبه ده صعب

وبعدين التصرف هيكون عامل اية وازاى وهل علبه البيئة ده بتتباع فين ومنين ومواصفتها اية ؟

[windofchange]

الله ينور ياايهاب وبالنسبة لعلبة البيئة اعتقد هتلاقي بديل ليها زي ما البشمهندس قال اسمه الرنان وده عند ابواليزيد بيتباع وعنده تقريبا علبة البيئة برده بس غالية جدااااااا واعتقد لو مش هتركب بيئة ممكن تستبدل الرنان بماسورة نفس القطر بدلا من علبة البيئة او الرنان بقلك يابشمهندس الصور دي من etka؟

[egman]

مين ابو اليزيد ده يا باشا وعنوانه فين وده بيبيع شكمانات أصلا وبيركب شكمانات وكده ولا بيبيع قطع غيار وهل له تليفون .

• انا كنت عايز اعرف سواء جبت علبه بيئة وده لو سعرها فعلا كده 1000 جنية اعتقد انى مش هقدر وهجيب رنان عايز اعرف اية المقاس او لما اروح اجيبة اقولة عايز اية ومواصفاته اية بتكون كبيرة قد اية وماركتها اية ولا ملهاش ماركة وسعرها فى حدود كام وهل اشتريها من عند بتاع ورشة الشكمان ولا بتباع فين فى محلات قطع الغيار مثلا ولا اية ؟

• فى حالة فكرة انى اركب ماسورة نفس قطر ماسورة الشكمان هل ده هيمنع الحرارة وهيحسن السحب مرة تانية بما ان الرنان الى راكب اكبر من قطر الماسورة اكيد وبيعمل حرارة وقله سحب فهل لو ركبت الماسورة هتمنع الكلام ده يعنى ؟

• ملحوظة : علبه البيئة الى كانت راكبه كانت اقصر من الرنان الى راكب دلوقتى ولكتها ذات قطر او عرض اكبر .......

على فكرة يا رجالة انا كده بعتبر ان الراجل الى عملي الشغل ده نصاب معدوم الضمير ولازم اقول اسمه علشان ما حدش يقع فى الى انا وقعت فيه هو اسمه محمد لفي ده فى شارع الجمعية الزراعيه عين شمس هوشارع متفرع من جسر السويس كده حسبي الله ونعمى الوكيل حسبي الله ونعمى الوكيل .


وليا سوال اخر بشكل عام هل الشيء الى بيميز علبة البيئة انها بتحول العادم الى ثانى اكسيد الكربون فقط وباقى الوظائف تقدر تقوم بيه اى علبه اخرى او رنان اخر يكون مناسب للعربية يعنى اقصد لو ركبت رنان مناسب للعربية ومنع قله السحب والحرارة ده اقدر اعتمد عليه ومش مهم علبه البيئة الى بتفرق بس فى موضوع تحويل العادم ، وهل العادم الغير محول الى ثانى اكسيد الكربون ده هل فية ضرر على الموتور او العربية فى شي ولا هو ممول بس علشان يمنع ضرر البيئة ؟

طيب يا ترى معظم العربيات وخاصة المتسعمله او ذات موديل قيم زي حالتنا كده بتكون شغالة على علبه البيئة ولا مش بالضرورى والناس عادى مكن تغير للعلبة العادية وده إجراءا غير مضر وبديل ناجح ؟

[windofchange]

ابواليزيد اللي اعرفه انه بيصنع شكمانات لعربيات فمصر وبتنزل العربيات دي بشكماناته زي هيونداي وجيب وكذا حاجة تانية مش فاكرها وعنده برده شكمانات امريكي علب زي والكر وكده ,وهو شركة كبيرة مش محل وليه فرع فاحمد سعيد والمصنع فاكتوبر وليه برده فرع فالحرفيين,علبة البيئة بتحافظ عالبيئة ده اللي اعرفه لكن تبوظ الموتور ده لو ركبت حاجة حجمها اصغر منها مثلا وقطر مواسيراها اقل من المواسير الاصلي للشكمان عندك تكتم الموتور كده وتعمل backpressure وده مضر للموتور اكيد وللاسف ناس من اللي شغالة فالشكمانات شغالة بالفهلوة مش بالعلم يعني تقله يكتم الموتور يقلك ازاي يابيه؟ اي هبل فالجبل وحسبي الله ونعم الوكيل وربنا ينور الناس وينقذهم من الجهل اللي معشش وقلة الضمير

[SYD]

اولا بتاع الشكمانات ضحك عليك واشتري العلبة البيئة بثمن بخس
ثانيا كلام المهندس ايهاب مظبوط 100 في ال100
انصحك تروح لأبو اليزيد وتسأل علي العلبة ومؤقتا ركب الرنان وحاول تتصرف في اقرب وقت وهات البيئة الأصلي والله يعوض عليك لأنها بجد هتفرق معاك في صوت العربية والسحب والحرارة

والله المستعان
،
،

[SYD]

ابواليزيد اللي اعرفه انه بيصنع شكمانات لعربيات فمصر وبتنزل العربيات دي بشكماناته زي هيونداي وجيب وكذا حاجة تانية مش فاكرها وعنده برده شكمانات امريكي علب زي والكر وكده ,وهو شركة كبيرة مش محل وليه فرع فاحمد سعيد والمصنع فاكتوبر وليه برده فرع فالحرفيين,علبة البيئة بتحافظ عالبيئة ده اللي اعرفه لكن تبوظ الموتور ده لو ركبت حاجة حجمها اصغر منها مثلا وقطر مواسيراها اقل من المواسير الاصلي للشكمان عندك تكتم الموتور كده وتعمل backpressure وده مضر للموتور اكيد وللاسف ناس من اللي شغالة فالشكمانات شغالة بالفهلوة مش بالعلم يعني تقله يكتم الموتور يقلك ازاي يابيه؟ اي هبل فالجبل وحسبي الله ونعم الوكيل وربنا ينور الناس وينقذهم من الجهل اللي معشش وقلة الضمير

111111111111+

كمان هما بتوع لحامات اكتر منهم بتوع شكمانات

والله المستعان
،
،

[egman]

طيب علبه البيئة الاصلي بتتباع فين وهل حد سال عن علبة البيئة الاصليه بتاعه الايبيزا وسعرها كام بالضبط ؟

او لو فية تليوفن لفرع احمد سعيد يا ريت يكون افضل ؟

وهل يوجد لهم فرع فى مدينة نصر ؟

طيب يعنى يا جماعه لو ركبت الرنان حتى عند ابو اليزيد برده مالوش لازمة ولا برده شغال والسحب هيرج تانى زي الاول والحرارة مع السرعات الاعلى تقل وهيكون فى حدود كام عند ابو اليزيد الرنان ده واية مواصفاته ولا هو هيعرف اية الى هيكون ماسب للايبيزا ؟

[ehab_mansour]

السلام عليكم حسين بيك
لا تقلق نفسك نهائيا اللي حصل حصل وخلاص وربنا يعوض عليك
حضرتك هتنسي نهائيا موضوع علبة البيئة وهتروح تركب رنان (بديل علبة البيئة ) عند ابو اليزيد وهو ثمنه كان أخر مرة وانا عندهم ب 250 جنيه تقريبا وكنت مركب عندهم في المصنع بالسادس من اكتوبر وعلي فكرة بتاخد فاتورة منهم ومعاك ضمان سنة علي الشغل اللي بتعمله يعني لو فيه حاجه بيترجعلهم بيصلحوها تاني من غير فلوس

انا ركبت عندهم من اكثر من سنتين علبتين شكمان للابيزا ولكر فرنساوي جديد ب 650 و كانو زي الفل لمده السنتين دول واحتجت بعدها اني احطلهم سليكون حراري عند الوصلات ورحتلهم وعملوه بدون اي مصاريف وانا عارف مدير الفرع في اكتوبر وهو عارفني شكلا

وان شاء الله هتروح كل المشاكل بعد ده
وعلي فكرة ليهم فرع في مدينة نصر تقريبا في شركة النصر لصناعة السيارات علي حسب ما افتكر
وده رقمهم في اكتوبر 38334090
وربنا يوفقك وييسرلك أمورك ان شاء الله

[egman]

الله يكرمك يا ابهاب باشا على صبرك معايا

1. انا كلمت فرع 6 اكتوبر فعلا ودخلت على الموقع بتاع الشركة على الانترنت وعرفت انا لفرع بتاع اكتوبر ه هو المصنع الرئيسي واعتقد انى هميل انى اعمل الموضوع ده عندهم هناك هناك هيكون افضل ولا اية ؟
   
   
2. انا سالته وقالى انه لازم يشوف العربية ومارديش يدينى اى معلومة فى التليفون على السعر او النوع وعرفت انهم بيستقبلوا العربيات من الساعه 9.30 الى 5.30
   
   
3. طيب والاداء بعد التركيب يا ابهاب كان عامل ازاى هل السحب فرق معاك واتحسن وهل الحرارة ما بقتش تعلى فعلا ؟
   
   
4. وهل فعلا هما لازم يشوفوا العربية وبعدين هما من نفسهم هيعرفوا العلبة المطلوبة ولا انا برده لازم اكون واخد بالى من حاجات معينة ولا يكفى انى اقوله انى لسة مغير العلبة وبعد التفيير العربية بقت تسخن والسحب ضعف وهما هيعرفوا المطلوب ؟
   
   
5. يا ترى خدت وقت قد اية فى التركيب وهل هما بيشتغلوا الجمعه والسبت لانى نسيت اسألهم عن ايام العمل ؟
   
   
6. طيب حضرتك تقصد اية بالــ 650 جنية دول دول للعلبتين معاً وهل العلبة الخلفية تفرق فى السعر عن الامامية وانت فعلا ركبت علبه الرنان ده عندهم ولا انت ركبت عندهم البيئة هل الوالكر الفرنساوى ده تقصد بيها بلد صنع علبه الرنان ؟
   
   
7. وكان ليا استفسار مهم اوى يا ايهاب هل هما ممكن يكشوفلى على العلبه الخلفية ويقوموا بتنظيفها او عمل اى صيانه لها ولا هما فك وتركيب وبس ؟

تحياتى الخاصة لك يا ايهاب لانك فعلا حاسس بيا انى قلقان لدرجة انى قاعد على المنتدى من ساعه ما رجعت من الشفل ،،،

[ehab_mansour]

الله يكرمك يا ابهاب باشا على صبرك معايا

1. انا كلمت فرع 6 اكتوبر فعلا ودخلت على الموقع بتاع الشركة على الانترنت وعرفت انا لفرع بتاع اكتوبر ه هو المصنع الرئيسي واعتقد انى هميل انى اعمل الموضوع ده عندهم هناك هناك هيكون افضل ولا اية ؟
   أعتقد انه أفضل انا شخصيا بميل دايما أورح المصنع هناك لأن كل شيء موجود و التعامل مريح وبيكشفو وبعدين يقولولك محتاجه ايه والتكلفة ايه قبل البدأ في العمل
   
2. انا سالته وقالى انه لازم يشوف العربية ومارديش يدينى اى معلومة فى التليفون على السعر او النوع وعرفت انهم بيستقبلوا العربيات من الساعه 9.30 الى 5.30
   شيء طبيعي لأنهم لازم يكشفو فنيا ويعرفو ايه المطلوب
   
3. طيب والاداء بعد التركيب يا ابهاب كان عامل ازاى هل السحب فرق معاك واتحسن وهل الحرارة ما بقتش تعلى فعلا ؟
   انا اللي كان بايظ عندي العلبتين الوسطي والخلفية ومغيرتش عندهم علبة البيئة لأنها فضلت كويسة لحد ما بعت العربية وطبعا العربية بتحس بفرق كبير لأن صوت الشكمان بيحسسك بضعف المحرك ولما بيختفي بتسحب بدون صوت فبتحس انها أفضل بكتييييييير
   
4. وهل فعلا هما لازم يشوفوا العربية وبعدين هما من نفسهم هيعرفوا العلبة المطلوبة ولا انا برده لازم اكون واخد بالى من حاجات معينة ولا يكفى انى اقوله انى لسة مغير العلبة وبعد التفيير العربية بقت تسخن والسحب ضعف وهما هيعرفوا المطلوب ؟
   شوف لازم في اي مكان تكون عارف انت عاوز ايه وتبص معاه وهو بيكشف وتقتنع بالكلام اللي بيقوله وانت بتقول ان الشكمان كان كويس فقط التخبيط و اللي حصل انك غيرت علبة البيئة ببديل أثر علي العربية يبقي اللي انت محتاجه فقط هو رنان لو فيه شيء تاني اتأكد قبل التغيير واقتنع أولا ومتسمعش كلام اي حد وخلاص مهما كان محترف
   
5. يا ترى خدت وقت قد اية فى التركيب وهل هما بيشتغلوا الجمعه والسبت لانى نسيت اسألهم عن ايام العمل ؟
   مش عارف بيشتغلو امتا ولكن انت حظك في الوقت و بالدور لو رحت لقيت قبل كتير بالتأكيد هتنتظر كتير وربنا ييسرلك
   
6. طيب حضرتك تقصد اية بالــ 650 جنية دول دول للعلبتين معاً وهل العلبة الخلفية تفرق فى السعر عن الامامية وانت فعلا ركبت علبه الرنان ده عندهم ولا انت ركبت عندهم البيئة هل الوالكر الفرنساوى ده تقصد بيها بلد صنع علبه الرنان ؟
   انا ركبت علبة وسطي وخلفية و مغيرتش علبة البيئة أصلا نهائيا وفيه فرق في السعر بين الوسطي والخلفية واكن الاتنين كانو ب 650
   
7. وكان ليا استفسار مهم اوى يا ايهاب هل هما ممكن يكشوفلى على العلبه الخلفية ويقوموا بتنظيفها او عمل اى صيانه لها ولا هما فك وتركيب وبس ؟

مافيش حاجه اسمها تنظيف علبة شكمان هما لو فيها مشكلة وقت الكشف وانت اقتنعت و سمعت الصوت بنفسك هيقلك عايزه تتغير مثلا هيغيرها وبس ولكن مافيش صيانة لعلب الشكمان

تحياتى الخاصة لك يا ايهاب لانك فعلا حاسس بيا انى قلقان لدرجة انى قاعد على المنتدى من ساعه ما رجعت من الشفل ،،،

الله الموفق و المستعان وربنا ييسرلك أمورك وتنتهي من المشكلة دي علي خير وابقي بلغني عملت ايه انا هكون في اكتوبر بكرة ان شاء الله رايح مصنع هناك الصبح و عندي شغل و هتأخر يمكن للعصر ابقي عرفني عملت ايه

[egman]

انا ان شاء الله ناوى اروح على يوم الجمعه او السبت على حسب ما هما يكونوا شغالين فى احد اليومين دول .

وان شاء الله هبلغك بالأخبار باذن الله .

• بس يا ترى تتوقع كده الرنان ده هيكون عامل كام سعره بالتقريب لو هو مستورد مثلا والكر او حاجة مستورة تانية امريكي او فرنساوى ولو من مصانعهم ممكن يكون فى حدود كام علشان عايز اعمل حسابي بالتقريب وانا رايح باذن الله ؟