صوت غريب فى الفيات 128

[rprd3]

اهلا وسهلا بالشباب
انا محمد امين من الاسكندرية
مهندس بترول
معايا 128 مو 84 4 سرعات ايطالى
العربية جميلة بس طلع لها صوت اثناء الجري بيها زي صوت ونة كدة بالامام و ذي ماتكون بتتنطط و الصوت عالى أوى المهم روحت للحداد قالى مافيش حاجة ممكن العجل يكون عشان نسر مطبع من الوقفة رحت شاري فردتين ماليزى جديد و لكن المشكلة مازالت قائمة

كمان أعلى نورها الامامي ازاي و هل يوجد للفرامل و الفتيس تنك للزيت كل على حدة ام ماذا

و جاد شكرا على ردكم على حيث ان العربية نظيفة و اريد ان احافظ عليها

[Eng_Mostafa_89]

بص ياباشا
اولا الف مبروك على العربية واهلا بيك معانا فى المنتدى
وبخصوص موضوع صوت الونة دة ممكن يكون حجات كتير بس خلينا ناخدها بالتدريج
اول حاجة نشيك على بلى العجل هتجيب الكوريك وترفع العجلة الامامية شمال لوحدها بس وتكون محمل العربية كويس
وتدخل تدور العربية وتدى غيار العجلة المرفوعة هتلف لوحدها هتسمع صوتها لو ناعم يبقى البلية دى مفيهاش مشاكل والحمد لله.
بعد كدة تنزل العربية وترفع الاعجلة الامامية يمين ونفس القصة العربية تتحمل كويس وتدخل تدور وتدى غيار وتسمع الصوت ناعم برضة يبقى تمام
وهكذا مع كل عجلة بس طبعا العجل الخلفى هتلفة بايدك لانة حر الحركة

هتفضل حضرتك تعمل كدة لغاية لما تعرف انهى عجلة هى اللى فيها صوت الونة دى وتغير بليتها (طبعا عفشجى اللى هيعمها)
البلية الايطالى الجديد من 30 الى 35 جنية ولو لقدر الله الصرة كمان بيظة تقريبا بتعمل فى حدود مش متذكر بصراحة بالظبط بس هى فى رينج من 50 الى 80
(دى مشكلة عفشة ممكن توديها لعفشجى يكون كويس)


النور الامامى لو حضرتك قصدك ان نورة ضعيف وانت عيزة يبقى قوى ولا اية
لو هو دة قصد حضرتك يبقى هات لمبتين شداد كان فى نوع المانى كويس ب 20 جنية اللمبة كانت اضائتة ممتازة بس مش فاكر كانت كام وات

لو قصد حضرتك ان الاضاءة ضربة فى الارض وحضرتك عايز ترفعها علشان تنور امامك
اولا هتضغط بايدك على الفوانيس وتتاكد انهم ركبين كويس فى اماكنهم
لو مش ركبين هتضغط عليهم هيباتوا فى مكانهم
لو كانوا ركبين كويس بس برضة لسة ضربين فى الارض
هتعمل التالى
هتروح فى حتة ارض وسعة وتوقف العربية وتفتح الكبوت هتلاقى الفوانيس من جوة ليها زى عصفورتين (زى صمولة وليها ايدين طوال)
بتبقى تكتين هى هتلفها لفوق او لتحت وتشوف مستوى الاضائة عندك
اخبارو اية
لو متظبطش العصافير دى ركبة على مسمار المسمار دة بيتربط وبيتفك ابتدى حضرتك اظبطة لغاية لما تلاقى الاضائة بقت تمام
(المشكلة دى مشكلة كهرباء وممكن حضرتك توديها لكهربائى)

الفرامل ليها علبة زيت غالبا بتبقى موجودة بجانب البطارية (علبة بلستيك صغيرة ونازل منها خرطومين )

زيت الفتيس بيبقى موجود جوة الفتيس وصعب انك تشوفة لان لية طبة موجودة فى جسم الفتيس نفسة وصعب ان حضرتك توصلها لانها بهدلة شوية ونوم تحت العربية (ممكن حضرتك توديها لاى واحد بتاع تغير زيت وهو يكشفلك علية)

انا شرحت لحضرتك ازاى تعملها بنفسك لو تحب
وبرضة قلت لحضرتك مين اللى يعملها

اتمنى اكون افدت حضرتك

[rprd3]

شكرا يا بشمهندس مصطفى على الرد السريع
هظبط الحاجات دية ان شاء الله بس انا عاوز اعرف هو انا لازم لما أغير الرومان بلي لابد ان اغير التيل و الطنابير ولا مش لازم

[Eng_Mostafa_89]

لالالا ياباشا التيل والطنابير دى حاجة والبلية حاجة تانى

[Eng_Mostafa_89]

بس علشان توصل للبلية لازم تحل الخزنة بتاعت الفرامل وتفك الاتيال
هى شغلانة بسيطة مش كبيرة متقلقش

وان شاء الله المشكلة تكون بسيطة

معلش سؤال هو حضرتك لسة جايب العربية جديد؟

[rprd3]

بقالها معايا حوال 6 شهور بس انا بسافر معظم الوقت
فلازم احافظ عليها علشان بحتاجها اول منزل من الشغل فبظبط فيها حاجة كل فترة
فلو عندك اراء علشان اكون دايما صاينها ياريت النصيحة

[Eng_Mostafa_89]

ربنا يباركلك فيها يا باشا
انا كنت بسأل علشان لو انت شاريها جديد
فى حجات لازم تعملها
تغيير سير الكتينة تغير الزيت والفلتر وتغير كمان طقم الكهرباء (كوندنسر وابلاتين وبوجيهات) وكمان فلتر البنزين ونضف الكربيراتير بالمرة
وتشيك على اتيال الفرامل
وبكدة ان شاء الله العربية تبقى مية مية معاك
وربنا يملهالك بركة ويديلك خيرها ويكفيك شرها ويكفيك شر العين

[rprd3]

لافادة الجميع
انا غيرت البلى للعجلتين الاماميين البلية الواحدة ب 45 جنيه
و غيرت الكبالن الواحد ب 60 جنيه
و غيرت زيت الماتور ب شل الاحمر ب65جنيه مع فلتر ب 20
وزودت ال مشاحم و زيت الفتيس ب 20

و العربية رجعت فلة..............................................