استفسارات عن بونتو 2001

[KoDaK_Gti]

السلام عليكم

قدامى عربية بتاعة واحد صحبى بونتو 2001 الاكصدامات سودا مش بلون العربية
العربية اول يد من الزيرو فابريقة بالكامل بره وجوة طبعا السقف لونه رايح شوية من الشمس
العربية كمالياتها ايه ؟؟؟
دى تكييف و 2 زجاج كهربا امامى وسنتر فقط
مفيهاش باور ولا سيتى باور وده اللى انا مستغربله جدا !!!
عاوز اتأكد من النقطة دى كويس جدا ضرورى
وعدادها 126 الف والحالة العامة جيدة جدا
تعمل فى حدود كام ؟؟

[mohmdomar]

عادي ان مايكنش فيها باور فيها موديلات من غير باور
او ممكن الباور بايظ ودا ممكن تتأكد منه لو فيه علامة دركسيون حمرا بتفضل منورة في التابلوه
وممكن تركبها باور عادي وحتتكلف 1000 جنيه
حتجيب ماتور الباور وتركبه في القطمة
وخلي بالك الباور بتاعها كهرباء مش زيت يعني مش بياخد من الماتور وملوش سير
والاكصدامات اغلب الظن انه مغيرها بأكصدامات تايواني اللي بتنزل لون واحد (اسود)
العربية تعمل في حدود 35 طالما فابركية ومن غير باور

[KoDaK_Gti]

هى العربية نازلة فابريقة باكصداماتها كده
هى نفس اللون والشكل زى اللى فى اللينك ده بس فيها جنوط سبور 14

http://www.car100100.com/cardetails.php?car_id=15248

وبما ان معاك العربية دى اخبارها ايه على الطريق والسفر واخلى بالى من ايه اكشف عليه كويس لو فكرت اشتريها
وبتبقة كام حصان

انت بتقول الباور بتاعها كهربا مش ده خطر شوية على الطرق السريعة ولا ايه ؟
والسيتى باور بيتكلف كام لو ركب ؟؟

شكرا ليك

[mohmdomar]

الماتور بيتجاب استيراد وسعره زي ما قلتلك, جديد بيعمل 5000

[KoDaK_Gti]

مكررة سورى

[mohmdomar]

العكس يا باشا, الباور الكهربا بيبقي أأمن علي الطريق السريع عشان هو بيقل كل ما تزود السرعة وبيفصل تماما عند سرعة ال 100, ودا طبعا بيديك ثبات اكتر علي الطريق, غير كدا بيبقي اخف من الباور العادي علي السرعات العادية

السيتي باور بيجي مع الماتور انت بس محتاج تجيب الزرار بتاعه وتحطه في التابلوه

واعتقد والله اعلم انت كمان محتاج تغير الكنترول عشان تجيب الباور

هو بيعمل 1500 جديد ممكن تجيبه استيراد حيبقي اقل من كدا

العربية 60 حصان بس بتحس كأنها 100 حصان وماتورها جامد فعلا وصوته يكاد يكون معدوم
والثبات علي الطريق ممتاز لحد 130

لو كان فيها باور كنت هقلك اكشف علي الباور لأنه اكتر حاجة بتبوظ لكن هي مفهاش

غيير كدا العربية فعلا محترمة واصيلة وماتقلش ابدا عن البولو والابيزا بالعكس ماتورها اقوي وقاعدتها اريح

[KoDaK_Gti]

هو مغيرلها كنترول عند 100 الف فى التوكيل

[mohmdomar]

ماهو الكنترول دا انواع
فيه منه بيركب عليه باور
ومنه من غير باور

انت غير الكنترول بواحد تاني بيركب عليه باور وفي نفس الوقت يمشي مع ماتورك

عايز اقلك ان الكنترول دا حساس شوية ممكن يبوظ لو محافظتش عليه.. يعني:

ماتغسلش الماتور بالمياه
ماتركبش لا انذار ولا وحدات رفع ولا زينون والكلام دا لو الصنايعي مش شاطر لأن اقل غلطة تضيعلك الكنترول

وعلي فكرة الكلام دا يسري علي اي عربية شغالة كمبيوتر وحساسات يعني مش عيب في البونتو ولا حاجة

[KoDaK_Gti]

طيب منا كده هجيبها ب 35 واغير كنترول واجيب باور هتبقة بحوالى 38 الف !!!
يبقة اشوف وحدة 2002 كاملة مانوال افضل ؟

[mohmdomar]

طيب منا كده هجيبها ب 35 واغير كنترول واجيب باور هتبقة بحوالى 38 الف !!!
يبقة اشوف وحدة 2002 كاملة مانوال افضل ؟

مانت حتجيبها ب 38 بردو ويمكن ازيد لو فابريكة

طالما دي عربية صاحبك وانت ضامنها يبقي خليك في المضمون

واحتمال كبير الل حتجيبها كاملة دي حتلاقي الباور بتاعها بيودع لأن ليه عمر افتراضي( علي حسب الاستخدام لو بيفتح السيتي باور كتير ) , يعني كدا كدا حتضطر تغيره

يبقي خليك في دي احسن واضمن

ولو قررت تدور تاني حتدور كتير لأن دي عربية شبابي وقليل لما تلاقي واحدة مش متهانة

[mohmdomar]

خلي بالك ان حكاية الكنترول دا انا مش متأكد منها
عشان تتأكد اسهل حاجة انك تكلم الكيلاني في التليفون وتسأله علي ماتور الباور بكم غالبا حيقلك مش موجود. بس هو موجود بس غالي وبيورده بس للتوكيل او للعربيات اللي في الضمان , وبعدين اسئله انا محتاج اغير الكنترول بردو ولا لأ

[KoDaK_Gti]

طيب تمام
الف شكر ليك وتعبتك

المشكلة انى بشوف اسعار غريبة ليها يعنى اقل حاجة ب 40 الف فأنا قولت العربية دى اكيد سعرها كويس هو بيتكلم فى 37 وانا قولتله سعر ومنتظر رده وربنا ييسر الامور ان شاء الله

[mohmdomar]

سيبك انت من الاسعار دي في الاخر بتنزل
انا عربيتي كانت برا وجوا ماعدا الاكصدامات ورفرف وكانت كاملة بعتها ب 37 وموديل 2002 بس كان ماتور الباور بيودع