لماذا مواتير الفيات ضعيفة

[فادى]

يا استاذ فادى ال 50 دى بتاعة ال KW يعنى كيلو وات
انما الهورس باور ..يعنى باختصار الانجليزية PS هو اللى 70 الى 80

دى العربية البولو
ال Polo Mk4F
موديل 2005

متزعلش يا أستاذ سيات لافر, د
ده محرك ال1400 موديل 2001-2005
1.4 L straight-4 16-valve petrol, 75 PS (55 kW)
و باين اهوه انو محرك بنزين. و 16 صمام و بيولد 75 حصان.
من نفس الصفحة.
و على فكرة هذا لا يعيب محركات فولكس, لأن قوة المحرك تقاس بمنحنى العزم و ليس القوة القصوى.

[CryptonX]

مش حضيف حاجة علاي الاخوة قالوه .

بس هاتلي موتور 1400 سي سي - 16 صمام في ارقام غير كدة .. كل ال 1400 بيتراوح من 80 الي 95 حصان ( ال 16 صمام )
( مش تربو و لا سوبر - موتور 4 سلتدر عادي جدا )

ابيزا 2008 - 1400 - 85 حصان
كورولا 2008 - 1400 - 95 حصان
نيو اكسنت 2008 - 1400 - 94 حصان
فيات برافو 2008 - 1400 - 90 حصان
فيات جراند بونتو / اينيا - " 8 صباب " - 77 حصان

يعني الفرق بين الابيزا ال 16 صباب ال 1400 و الجراند بونتو ال 8 صباب - 8 حصان ...

ازاي اعتبره موتور ضعيف ؟؟؟ ؟


و طبعا نرجع للتوكيل .

فولكس فرحانين بالموتور ال 120 حصان ال 1400 التربو الي تمنه في الجولف 185 الف

بينما مواتير فيات في الخارج ( ممكن تطلبها علي فكرة خاص - و تمنها ارخص )

جراند بونتو جي تي 1400 - تي جيت تربو - 121 حصان
جراند بونوتو ابارث 1400 - تي جيت تربو - 141 حصان
جراند بونتو ابارث اسينسي 1400 - تي جيت تربو 187 حصان

برافو تي جيت 1400 - 120 حصان
برافو تي جيت سبورت 1400 - 150 حصان

تمن اغلي جراند بونتو مش حيعدي ال 160 الف جنيه هنا

و البرافو ال 150 جصان حتبقى بتمن الجولف تقريبا .

ده غير المواصفات و الكماليات من جنوط 18 " - اي بي اس - 6 ايرابجز - 8 سماعات - بلوتوث - صب ووفر - سبورت مود ( بيزود العزم 50 نيونتن ) - ناقل جركة ديوال لوجيك الشعير .. الخ الخ الخ

[SEATLOVER]

متزعلش يا أستاذ سيات لافر, د
ده محرك ال1400 موديل 2001-2005
1.4 L straight-4 16-valve petrol, 75 PS (55 kW)
و باين اهوه انو محرك بنزين. و 16 صمام و بيولد 75 حصان.
من نفس الصفحة.
و على فكرة هذا لا يعيب محركات فولكس, لأن قوة المحرك تقاس بمنحنى العزم و ليس القوة القصوى.

جميل جداً ...
بس ماتنساش ان دة كان فى سنة 2001 يعنى كان فى وقتها سابق عصرة
مش فى سنة 2008 !!!!!

فى سنة 2008 فى VW فى ال tsi يعنى ال 1400cc فيهم 120 هورس باور

الدنيا بتطور !!

[فادى]

جميل جداً ...
بس ماتنساش ان دة كان فى سنة 2001 يعنى كان فى وقتها سابق عصرة
مش فى سنة 2008 !!!!!

فى سنة 2008 فى VW فى ال tsi يعنى ال 1400cc فيهم 120 هورس باور

الدنيا بتطور !!

هو حضرتك فاكر انو موتورات زمان اتطورت عن دلوقتى؟؟!
الكلام ده ينطبق لو فيه فرق زمنى لا يقل عن 30 سنة, ممكن تقول فيه فرق فى التكنولوجيا.
ثانيا التطور مبيتحسبش بعدد الأحصنة. لأن كما قلت لك عدد الأحصنة مش دليل على تطور المحرك, تقييم قوة المحرك بحاجة اسمها منحنى العزم.
الدنيا بتتطور ديه صح, لكن السيارات لا تتطور بالقدر نفسه.

[SEATLOVER]

هو حضرتك فاكر انو موتورات زمان اتطورت عن دلوقتى؟؟!
الكلام ده ينطبق لو فيه فرق زمنى لا يقل عن 30 سنة, ممكن تقول فيه فرق فى التكنولوجيا.
ثانيا التطور مبيتحسبش بعدد الأحصنة. لأن كما قلت لك عدد الأحصنة مش دليل على تطور المحرك, تقييم قوة المحرك بحاجة اسمها منحنى العزم.
الدنيا بتتطور ديه صح, لكن السيارات لا تتطور بالقدر نفسه.

يا حاج فادى 30 سنة اية بس !!!
30 سنة فى فيات ممكن ..انما برة المهندس اللى بيتعين فى المانيا لازم يعمل حاجة قبل ما يمشى من الشركة !!!!

ومنحنى عزم اية !! .. يعنى تفتكر محرك ال tsi منحنى العزم بتاعة ...مجنح شوية !!

الدنيا بتتطور ديه صح, لكن السيارات لا تتطور بالقدر نفسه

يا راجل !!!!

[Xpert]

طيب معاك يا بيشو
و موتور زي موتور ال 132 ال 2000 الانجكشن ال 122 حصان
و ال 112 حصان كاربيراتير و الكلام دا سنه 77!!!!!
و الموتور ال 2000 سي سي في البرافو الhgt
5 سلندر 25 صباب بقوه 147 حصان سنه 95 ؟؟
يعني فيات لما بتحب تعمل مواتير رياضيه بتعمل
فيات طول عمرها بتعمل مواتير مرنه و عصبيه بدون لتضحيه بالاقتصاديه.

اه بتعمل ..بس اللي بيعمل المواتير دي مش فيات .. اللي بيعمل المواتير دي قسم اللانشيا و الالفاروميو .. و بيحطوها في الفيات الموديلات الرياضيه .. انما مش متصنعه مخصوص للفيات انا عارف انهم كلهم شركه واحده .. بس انا باتكلم علي المبداء نفسه

[hazem_khidr]

اه بتعمل ..بس اللي بيعمل المواتير دي مش فيات .. اللي بيعمل المواتير دي قسم اللانشيا و الالفاروميو .. و بيحطوها في الفيات الموديلات الرياضيه .. انما مش متصنعه مخصوص للفيات انا عارف انهم كلهم شركه واحده .. بس انا باتكلم علي المبداء نفسه

اختلف معاك يا بيشو
فيات هيا اللي بتعمل المواتير دي.
موتور ال 132 من تصميم فيات و موتور البرافو برضه من تصميم فيات.
مواتير الفا مثلا فيها تقنيه مختلفه زي التوين سبارك مثلا و دا مش موجود في فيات اصلا.
و غير كده فيات عندها فرعها الرياضي (ابارث) لتعديل سيارتها
و لا ننسي 131 اسطوره راليات السبعينات .و اللانشيا ستراتوس المعتمده ايضا علي تقنيه فيات

[Xpert]

ابارث شركه خارجيه و ليس فرع بالمصنع .. زي البينا و هارتج في البي ام .. قطع الغيار بتتباع في التوكيل بس الشركه حاجه تانيه غير المصنع ...

[Mzeid]

فيات مبتعملش محركات ضعيفة هي حكاية عزم زي الأخوة ما بيقولوا ..
و البرافو فيه نسخة منها 1400C T-JET 150 حصان دة ( سوبر + تيربو ) تشارجر و دي بتنزل بالطلب ..
الإستلام في حدود 3 شهور ..
:):)

[فادى]

اه بتعمل ..بس اللي بيعمل المواتير دي مش فيات .. اللي بيعمل المواتير دي قسم اللانشيا و الالفاروميو .. و بيحطوها في الفيات الموديلات الرياضيه .. انما مش متصنعه مخصوص للفيات انا عارف انهم كلهم شركه واحده .. بس انا باتكلم علي المبداء نفسه

فيات هى الى بتعمل محركات كل من لانسيا و ألفاروميو, و لانسيا هى شاسيهات و محركات فيات و ألفاروميو كذلك فى معظمها, لكن مع بعض الاضافات عشان يحافظوا على تميزها.
حاليا مفيش مراكز تطوير لألفاروميو أو لانسيا لأن فيات سيطرت تماما على الشركتين دول.
فيات بس بتحاول تحافظ على تميز ألفاروميو خصوصا لأنها أغلى من فيات و لانسيا و بتنافس مرسيدس و بى ام, عشان كده التقنيات المتطورة معظمها بتنزل فى ألفاروميو الأول, لكن ده مش معناه انها من تطوير ألفاروميو.

فيرارى و مازيراتى تبع ادارة مستقلة الى حد كبير, لكن برضوا السبلاير الأساسى بتاعهم فيات.
فيات عندها شركة اسمها ماجنيتى ماريللى, و دى شركة فيات هى الى أسستها, و هى شركة زى بوش كده, متخصصة بتطوير التقنيات المتقدمة زى الانجيشكن و علب التروس الذكية و الأبحاث العلمية للمحركات و غير ذلك.
المهم انو الشركة دى هى الى بتزود كل سيارات المجموعة بما فيهم فيرارى و مازيراتى بالتقنيات المتطورة, و مثلا علبة السيلسبيد الى كانت فيرارى تستخدمها فى الفورمولا واحد من تطوير ماجنيتى ماريللى يعنى من تطوير فيات. و كذلك نظم الحفاظ على الثبات و كل ما يمكن تخيله.
و كمان لازم نشير انو القوة الحصانية صحيح بتدى تسارع أفضل, لكن على أساس انك بتجيب السرعة القصوى على كل نقلة, و ده طبعا غير واقعى فى معظم الأوقات, انما العزم الأكبر هيخلى التسارع أفضل فى السرعات الطبيعية للمحرك, لأن التسارع من 0-100 بيتحسب على أساس انك بتجيب أخر النقلة, لكن طبعا محدش بيسوق كده, و عشان كده ممكن تلاقى الفيات بونتو ذات ال77 حصان مثلا بتجرى فى السواقة العادية أكتر من عربية 90 حصان.

بس عايز أشير الى تعليق الأستاذ سيات لافر الظريف,
حقيقة لم أفهم قصدك ايه بموضوع كل مهندس ألمانى لازم يبتكر حاجة؟!!
يعنى كل مهندس يزودله حصان و يمشى و لا ايه؟:D

[فادى]

ابارث شركه خارجيه و ليس فرع بالمصنع .. زي البينا و هارتج في البي ام .. قطع الغيار بتتباع في التوكيل بس الشركه حاجه تانيه غير المصنع ...

لا يا أستاذ بيشو أبارث موقفها مختلف عن ألبينا و هارتج. لأن أبارث دى شركة فيات تمتلكها و مبقاش ليها كيان مستقل, لكن فيات حافظت على الاسم لأن له وقع طيب على محبى فيات, لكن حاليا و على حد علمى كل سيارات أبارث هى سيارات فيات معدلة بواسطة فيات أيضا.

[Mzeid]

يا حاج فادى 30 سنة اية بس !!!
30 سنة فى فيات ممكن ..انما برة المهندس اللى بيتعين فى المانيا لازم يعمل حاجة قبل ما يمشى من الشركة !!!!

ومنحنى عزم اية !! .. يعنى تفتكر محرك ال tsi منحنى العزم بتاعة ...مجنح شوية !!

يا راجل !!!!

هههههههه إيه يا بشمهندس عمرو الكلام الكبير دة مجنح و ألماني إيه بس ..
بالنسبة للأخ كريم اللي أنا أعرفه في جميع السيارات إن ال SPORT MODE دة بيبقى علشان ناقل الحركة ينقل على عدد لفات محرك عالية علشان يعطي أفضل عزم و تسارع .. مش كدة و لا إيه .. ؟!
أنا سمعت بقى حاجة في التوكيل بتاع فيات من مسؤول المبيعات هناك إن شواحن التيربو الخاصة بسيارات الفيات سهلة الفك و التركيب يعني ممكن مالك السيارة يفك التيربو بيده ينظفه و يركبه تاني إيه رأيكم برضه في الكلام دة .. ؟!
:):)

[Xpert]

انا عارف حكايه فيات و لانشيا و الفاروميو دي عارفها .. انما ابارث دي بقي ممكن .. معلش اصلي مش دايس في الفيات (سايبينه للحج سبعاوي الكبير :d )

[sab3aawy]

تابعت الموضوع باهتمام كبير جدا وبصراحة الموضوع مشوق جدا وتبادل وجهات النظر فيه سمح بطرح كمية كبيرة جدا من المعلومات

يمكن فيه معلومة صغيرة بس انا حابب اضيفها لأنها ما اتطرحتش فى المناقشات

المشكلة ليست فى فيات ولا فولكس فاجن ولا حتى فى جنرال موتورز او كرايسلر

المشكلة فينا احنا، ليه باه

بلدنا ذات طبيعة متفردة الى حد كبير وبالتالى كان المفروض فى عصر التطور التكنولوجى والاهتمام بالتفاصيل الصغيرة ان بلد زى بلدنا يكون لها تمصميمات خاصة بها، لكن ده طبعا حلم غير واقعى لان حجم سوقنا الصغير جدا لا يسمح بأن شركة تعدل مسمار واحد فى سيارة من السيارات علشان خاطرنا(المرة الوحيدة فى التاريخ اللى حصل فيها الكلام ده كان تعديل اتعمل فى العربية 128 المجمعة محليا لتناسب الطبيعة المصرية وهو اضافة فلتر هواء اضافى يعتمد على زيت ، ومثلها كانت الريجاتا المجمعة محليا، هذا الفلتر غير موجود فى نفس الموديلات فى اوروبا)
ولذلك احنا بنشترى سيارات مصنوعة لتناسب اسواق غير اسواقنا،
ففيات مثلا تصنع سياراتها لتباع فى ايطاليا بالدرجة الاولى واوربا بالدرجة الثانية، فقط لا غير، كل الأسواق خارج اوروبا هى اسواق هامشية بالنسبة لفيات، وبالتالى السيارة الفيات مصممة اساسا لتناسب طبيعة الأرض الأوروبية، درجة حرارة منخفضة لا تحتاج لمجهودات كبيرة فى التبريد، ارض غير مستوية تحتاج لعزوم عالية على حساب القدرة الحصانية(مكابس عريضة ومشاوير قصيرة)، وبالتالى نجد المحركات بالفعل عصبية لكن آخرها سرعات غير عالية بالمقارنة بالسيارات المماثلة من نفس الفئة، ، ضرق ضيقة تحتاج لامكانيات عالية جدا فى المناورة ولذلك نجد العفشة الرياضية هى الأساس فى موديلات فيات ،ارتفاع فاحش فى اسعار الوقود يحتاج الى تصميم مواتير اقتصادية وسيارات خفيفة الوزن لتوفير الوقود، وحيث ان فيات غير متواجدة فى السوق الامريكى مثلا سوى من خلال سياراتها الفاخرة كالفيرارى ، فان تصميم سيارتها الاقتصادية لا يهتم بالسوق الامريكى، وبالتالى لا يأخد فى الاعتبار امور مثل ارتفاع حرارة الجو والاحتياج لسرعت عالية على طرق مستوية
فى حين نجد ان شركات اوروبية اخرى كالفولكس فاجن لها مساحة تواجد لا بأس بها فى السوق الأمريكى وخصوصا لسيارتيها الجولف والييتا، ولذلك نجد ان هذة السيارات تأخد فى الأعتبار متطلبات السوق الامريكى فنجد السرعات المرتفعة وعدم وجود مشاكل السخونة، ولكن بالطبع على حساب فرق السعر الواضح عن مثيلاتها من الماركات الاقتصادية كالفيات والرينو والستروين مثلا
لو نظرنا الى الناحية الاخرى من الكرة الأرضية فسنجد الأسيويين قد صمموا سياراتهم بالأساس للبيع فى السوق الأمريكى ولذلك فأن سيارتهم بنيت طبقا للمتطلبات الامريكية
ولذلك استطاعت هذة السيارات ان تسحب البساط من تحت اقدام السيارتا الامريكية فى معظم دول الخليج لتشابه الطبيعة الخليجية مع طبيعة الأرض الأمريكية الى حد ما، ومع ذلك فإن الخليجيين كانوا من الحصافة وتوافر الإمكانيات لوضع مواصفاتهم الخاصة فى السيارات التى تباع لهم، كما نجد ان مبيعات الماركات الاوروبية لاتزال متواضعة فى الخليخ ، لأن السيارة ذات المواصفات الخليجية لا تزال بعيدة عن السيارة ذات المواصفات الواوربية مما يتطلب مجهودات كبيرة فى اعادة التصميم، بعكس السيارة الأسيوية التى تتطلب تعديلات بسيطة جدا لكى تكون خليجية

نعود الى طبيعة ارضنا المصرية التى لا هى خليجية امريكية ولا هى اوروبية ولا توجد ايه سيارة مصممة لها ولذلك فنحن نستعمل السيارات المصممة للآخرين
فبلادنا ارضها مستوية لا توجد بها كمية المطالع والمنازل التى توجد فى الأرض الاوروبية، كما اننا لا نستعمل المقاطير(الكرفانات او الللانشات الخ) وبالتالى لا نشعر كثيرا بميزة ارتفاع عزم المحرك ، وبلدنا حارة صيفا لكن ليست بحرارة الخليج وبالتالى فان سيارات الفيات التى لا تصمد فى الخليج تصمد فى بلدنا وتعبر ايام الصيف ببعض التعثر لكن بدون اصابات ، كما ان طبيعة طرقنا الغير ممهدة تصمد فيها السيارات الاوروبية الصغيرة اكثر من مثيلاتها الأسيوية، لكن السيارات الأوروبية الصغيرة ليست مريحة كتلك الأسيوية ، كما انه ليست لدينا طرق مفتوحة نستطيع فيها ان نجرب السرعات القصوى العالية التى تصل لها السيارات الأسيوية الاقتصادية،وهكذا، المقصد انه فيما عدا السيارات الفاخرة التى تأخد كل شئ فى الاعتبار وتصلح للعمل فى اى مكان فى العالم لأنها مصممة بسخاء يقابله ثمن باهظ للسيارة، فانه لا توجد سيارة مناسبة تماما لطبيعة ارضنا، لابد لكل سيارة من ان تفتقد شيئا ما، لأننا لسنا على خريطة مصممى السيارات

[Ahmed Taha]

.
تعالى نحلل محرك الجراند بونتو مثلا.
النسخة الموجودة فى مصر 1400 سى سى تولد 77 حصان و عزم قدره 115 نيوتن عند 3000 أربى ام.
الأحصنة منخفضة بعض الشىء لأن السرعة التى يأخذ عندها المحرك عزمه الأقصى هى 3000 أربىام فقط, و لذا فان محرك الفيات بونتو مرن جدا و قوى و يستطيع تجاوز العوائق بسهولة و سلاسة.
تجد سيارات أخرى مثل السيارات الكورية و اليابانية عزمها : 115 نيوتن متر عند 4800 أر بى ام مثلا, و هذه سوف تجد قوتها الحصانية مرتفعة جدا, و رفع سرعة المحرك ليست تقنية صعبة, بل هى سهلة جدا و معتادة منذ زمن, و لكن لماذا لا تحبذها السيارات الأوروبية؟
لسبب بسيط و هو أن رفع سرعة العزم الأقصى يعنى أن السيارة سوف تفقد الكثير من عزمها على السرعات المنخفضة, و هو ما سيتسبب بقلة مرونتها و خاصة فى حالة وجود عوائق طبيعية و كبارى أو ظروف التحميل, و الأهم من هذا و ذاك, أن عمر المحرك سوف يقل بصورة درامية, لذا فان الشركات الأوروبية تفضل دائما المحافظة على العزم عند سرعة منخفضة, بدلا من التباهى الأجوف بعدد الأحصنة المتولدة من المحرك.
و أود أن أضيف فقط أن فيات استطاعت ابتكار محرك ربما هو أول محرك بترول فى التاريخ, ذو حجم 1400 سى سى و يولد عزمه عند سرعة منخفضة جدا 1600 أربىام, و المحرك هو 1.4 تى جيت, و يولد 120 حصان لأنه مزود بشاحن هواء تربو, و هو انجاز تقنى من فيات على صعيد المحركات.

+10000000000000000000000

و بردو في محرك Vw الجديد 1400 سي سي (تيربو تشارجر + سوبر تشارجر) 140 حصان عند 1600 لفة بالدقيقة.

أما المحركات الموجودة في سيارات فيات بمصر فهي إختيار الوكيل و ليس لأن فيات مبتعملش إلا المحركات دي.