تقرير مصور عن البرافو 120 بعد 45 الف

[ahmad_starac]

معايا فيات برافو موديل 2011 تى جيت 120 حصان فقولت اعمل تقرير عنها بعد 45 الف عشان اللى مش عارف العربيه او اللى عايز يعرف حاجه عنها او اللى عنده حاجه عايز يضيفها عن العربيه عشان الناس كلها تستفاد وطبعا مجموعة الصور دى فى منها لعربيتى وفى منها جايبه من على النت.

التصميم

نبدأ الاول بشكل العربيه وتصميمها اللى انا شايف انه من مميزات العربيه لانه هادى وفى نفس الوقت تحس كده انه هجومى ومش من العربيات اللى انت فى الاول تحس ان شكلها خرافى وبعدين تحس انو عادى وبعدين تزهق منه زى الالنترا او السيراتو او الانسر....لأ دى الاول تحس ان شكلها عادى وبعدين تغرم بيه يعنى كده تحس ان تصميم العربيه مفيهوش افتعال كده وتحس بتانسق غريب بين شكل العربيه من ورا ومن قدام... ودى شوية صور للعربيه من بره




















العربيه تحس انها عاليه شويه من ورا وباين من تحته كده الكاوتش العريض بصراحه شكله جميل اوى
الشكل من الداخل
من الداخل العربيه متقلش حاجه فى روعتها عن الخارج والخامات الداخليه المستخدمه ممتازه والتابلوه متناسق جدا والكاربون اللى داخل فى التابلوه مخلى شكله شيك جدا ومديه طابع رياضى كده والعدادات كبيره وواضحه وحروفها مطليه بالكروم ولاضاءه البرتقالى اللى ماليه العربسه شكلها جميل اوى والكروم داخل فى حاجات كتيره كده مدى احساس بالفخامه ودى صور للعربيه من جوه

دا المفتاح هو بعافيه شويه بس لانه وقع منى كتير على الارض وسألت على الكفر بتاعه قالولى ب 250 جنيه قولت هو كده شيك اوى اصلا






ودى صوره لمساحة الشنطه اللى هيا 400 لتر وهى كويسه جدا





المحرك والاداء والفتيس

معروف عن فيات ان محركاتها نشيطه وعصبيه ودا اللى واضح جدا فى البرافو المزوده بمحرك تى-جيت T-Jet 1400 سى سى 120 حصان ومزود بتربو صغير يعمل ابتداء من السرعات المنخفضه للمحرك.
ويولد المحرك عزما قدره 206 نيوتن-متر عند 1800 لفه/دقيقه وقوه 120 حصان عند 4500 لفه/دقيقه.
وهومحرك ممتاز بلغة الارقام وكذلك على ارض الواقع حيث ان وزن السياره 1205 كجم ولذا فان قوة المرك بالنسبه للوزن ممتازة جدا.
ودا بيدى للسياره تسارع ممتاز وتصل السياره لسرعة 100 من الثبات فى 9.6 ثانيه وهو توقيت ممتاز جدا بالنسبه لسيارات هذه الفئه.

الفتيسdual logic ودا انا شايفه اختراع يا كوتش بصراحه لانه بيدى تسارع ومتعة المانيوال وسهولة الفتيس الاوتوماتيك رغم ان الفتيس دا سمعته مش كويسه فى مصر من ساعة ما تويوتا نزلت الفتيس الmmt بس الموضوع مختلف تماما مع فيات لانها اول شركة ابتدعته ومنزلاه من سنة 99 فى العربيه الفاروميو 156 سليسبيد.

وهتلاقى فيه انه شبه الاوتوماتيك فى حاجات كتير زى الكيك داون وتأخير النقله عن طريق الكيك داون بس مختلف فى حاجات زى انك لازم تدوس بنزين عشان العربيه تطلع مش لما تسيب الفرامل زى الاوتو العادى وبتميز عن الاوتو العادى انك تقدر تتدخل فى اى وقت فى النقلات صعودا ونزولا ودا مش موجود فى الاوتو العادى دا غير انك لو كبست بنزين فجأه الفتيس بيسقط نقله او انتين او تلاته حسب الموقف عشان تاخد عزم عالى ودا ميزه كبيره مش موجوده فى الاوتو اللى بيسقط نقله واحده بس! وممكن تسوق انت مانيوال تماما عن طريق الضغط لاسفل )+( او لاعلى (-) وفى موود Ae دا عشان استهلاك البنزين بيدى نقلات على طول يعنى ممكن يدى السادس وانت ماشى على 70.
طبعا الفتيس فى اول التعامل معاه هتحس انه غريب ورخم وهتلاقى العربيه بتنتش منك بس لما تتعود عليه هتحس انه جميل جدا وهتحس ان العربيه بتتفاعل معاك وفاهماك وكل دا من دوستك على البنزين.
والفتيس دا تركيبه تماما زى الفتيس المانيوال الا ان السياره بتدوس دبرياج بالنيابه عنك عن طريق الكنترول ودا انت بتحسه فعلا.
ودا شكله من داخل السياره وحواليه نور برتقالى كده شكله تحفه



الكمالييات

حدث ولا حرج عنها:مثبت سرعه-زجاج فاميه-blue&me-طاره ملتى-نقل الفتيس من الطاره-follow me home-cornering lights-تلاجه كده بين الكراسى ممكن تاخد ازازة ميه-تكييف تاتش ديول زوون اوتوماتيكى-جنوط 16-نور شبوره امامى وخلفى-4 ايرباج-abs-ebd
اما النظام الصوتى فتتجلى قدره الصانع الايطالى فى الرخامه على مالكى السياره لان منفذ اليو اس بى مرتبط بنظامblue&me فلازم التحكم فى الاغانى اللى على الفلاشه التحكم فيها يكون من الطاره فقط ولازم تكون العربيه دايره والاسوء ان اسم الاغنيه مبيطلعش على شاشة الكاسيت.
اما غير كده فالصوت جميل والكاسيت مدمج تماما فى الطابلوه وشكله شيك جدا.
والblue&me هو نظام بلوتوث خاص لشركة فيات مطور مع مايكروسوفت تقر من خلاله تجرى اتصلاتك وتقرا المسجات والاسماء والرسايل وبيدعم الاوامر الصوتيه.
الامان
وهو من نقاط القوه فى العربيه لانها مزوده ب 4ايرباج و8 فى الفئه الاعلى وabs وebd العربيه واخدة 5 نجوم فى اختبارات التصادم الاوربيه وتتميز السياره بهندسة شاسيه متميزه بتبعد الصدمات عن الكابينه.
اما الثبات فهو ممتااااااااز بمعنى الكلمه تحس كده ان العربيه لازقه فى الارض حتى فى المنحنيات وعلى السرعات العاليه وده انت بتحسه بنفسك لما تركب العربيه ورغم كده العفشه مش ناشفه خالص بعكس عربيات كتير اللى الثبات عندهم= عفشه تكسر الضهر ودا بفضل مركز ثقل العربيه المنخفض جدا و تصميم العربيه الذكى.
الخلاصه
نجحت فيات فى تصنيع عربيه ممتازه ذات طابع رياضى وكماليات كثيره وصالون مريح وفخم.
تقييمى الشخصى
المميزات:

1. موتور ممتاز على كل السرعات ونشط وتسارع ممتاز. الدرجه 10/10
   
2. فتيس ممتاز.الدرجه 10/10
3. صالون فخم ملىء بالكماليات وجوده الخامات ممتازه. الدرجه 9/10
   
4. العزل جيد جدا.الدرجه9/10
   
5. ثبات جبار.الدرجه9/10 عشان حفظ حق السيارات الاعلى
   
6. تصميم رياضى غير متكلف(اذواق) الدرجه9/10
   

العيوب:

1. تنقصها بعض الكماليات مثل فتحة السقف
2. توكيل سيىء للغايه وبصراحه بحس انهم مش فاهمين فى العربيه اصلا
3. اسعر مرتفعه لقطع الغيارفى التوكيل
4. سعر اعادة البيع سيىء
   

الموضوع من مجهودى الشخصى ارجو انى اكون اديت فكره شامله عن العربيه واعذرونى لاى نقص فى الموضوع........

[fisha]

ربنا يحفظهالك انا بحب العربية و فعلا تحفة فى كل حاجة بس البلد هنا مش مهتمين غير بى الكورى حتى و اغلى فى السعر o_O

[blazer]

عربية ممتازه ربنا يبارك ليك فيها
هل فية اخبار انهم ينزلوا شكل جديد منها؟
وايه سعرها مستعمله
يعنى لو موديل 2010 او 2011 سعر ال 120 حصان كام وال 150 حصان كام لو حالة ممتازه

[S O P H O S]

تسلم ايدك
تقيم حيادي ..

[hugan]

تقرير ممتاز

[Mohab.Nabil]

تقرير ممتاز و شامل

و البرافو مظنش ان كان فى تقرير ليها هنا من احد مالكيها

ربنا يبارك لك فيها يا باشا

و كان عندى سؤال بعد اذنك هى العربية تاخد بنزين 92 عادى و لا لازم 95 ؟

[samyyousef]

تقرير جميل
ربنا يباركلك فيها
سؤال
هل هناك صعوبة في ركن السيارة في مكان ضيق بين سياراتين؟؟؟ بمعنى أنه في الفتيس الاوتوماتيك تكاد لا تستعمل البنزين و تعتمد على الفرامل, و في السيارات المانويل بتسند بالدبرياج...لكن مع هذا النوع من الفتيس يجب الضغط على البنزين فهل يسبب مشكلة في الركن في الاماكن الضيقة؟؟؟

تحياتي

[monamize4]

تقرير ممتاز ... مفيش اخبار عن الشكل الجديد؟

[mshmshm3]

المفتاح هو بعافيه شويه بس لانه وقع منى كتير على الارض وسألت على الكفر بتاعه قالولى ب 250 جنيه قولت هو كده شيك اوى اصلا



]

الكفر اصلا حرام

[mshmshm3]

تقرير ممتاز و العربية دي فعلا جميلة جدا بس التوكيل زي قلته ربنا يباركلك فيها ياباشا

[ahmad_starac]

يعنى لو موديل 2010 او 2011 سعر ال 120 حصان كام وال 150 حصان كام لو حالة ممتازه

ال150 معنديش فكره بصراحه بس لو ال 120 اعتقد هتكون فى رنج 115-125 حسب الحاله

و كان عندى سؤال بعد اذنك هى العربية تاخد بنزين 92 عادى و لا لازم 95 ؟

حسب اللى مكتوب فى الكتالوج ف المفروض مش اقل من 95 بس طبعا بتاعتى متعرفش شكلوا ايه فمقدرش اقولك الفرق فى الاداء هيكون عامل ازاى بس على ال92 مش حاسس بأى مشكله

هل هناك صعوبة في ركن السيارة في مكان ضيق بين سياراتين؟؟؟

لأ عادى خالص :D

مفيش اخبار عن الشكل الجديد؟

على حسب معلوماتى المتواضعه لأ و 2013 نزلت وpk6 عليها خصم 9 الاف جنيه

تقرير ممتاز

اشكر اهتمامك وردك

[lion_h]

باشا ده رقم موبيلي رن عليا بعد اذنك وانا هاكلمك هاوز اعرف معلومات عنها امامي عربيه برافو وعاوز اشتريها
٠١٠٠٥٣٩٤٦٥٦

مع الشكر

[ahmedsiyam]

تقرير ممتاز و ربنا يباركلك فيها
المميزات انا متفق معاك فيها كلها
نضيف للعيوب ان تكلفة التشغيل عالية من حيث المصنعيات فى التوكيل و ثمن قطع الغيار

[Land_Cruiser]

تقرير ممتاز و محايد جدا و ربنا يبارك لحضرتك فيها. هى اللى محتاجاه ان التوكيل يتعدل بس و الناس هتقبل عليها اكتر من كده بكتير. من الحاجات اللى لفتت نظرى فيها قوى انها بالرغم من انها هاتشباك إلا ان شنطتها ما شاء الله لا تقل عن السيدان و دى لاحظتها و انا كنت مسافر بيها مع صديق لى للساحل و اخدت الشنط بتاعتنا كلها عادى و صاحبى كسب الرهان :)

[SYD]

تقرير ممتاز وعربية رائعة في التصميم والأداء
ربنا يحفظهالك ويباركلك فيها