محتااااااااااار - ارجو المساعدة وبسرعة !!

[Eng_Keen_162]

السلام عليكم ورحمة الله تعالى وبركاته
انا مبسوط انى بكتب اول مشاركة ليا فى المنتدى العملاق ده
وبحمد ربنا سبحانه وتعالى انى اتعرفت على المنتدى بمحض الصدفة وبقالى اكتر من شهرين بتابع يوميا كل حاجة فيه ( بس مكنتش لسه سجلت !! )
انا اسف لانى هرغى كتير شوية بس فعلا انا محتاج مساعدتكم وخبراتكم اوووووووووووووى

انا على قدى فى السواقة والعربيات - يعنى اول مرة اسوف كانت فى 2011
بس الحمد لله قدرت اتعلم بسرعة وربنا يسرهالى انى جيبت عربية جديدة ( شيفروليه نيو سبارك 2011 )
بفضل الله سبحانه وتعالى حاسس انى سوقت كويس فى فترة سريعة - طبعا مش شطارة منى بس ربنا بيسهلها لعبيده
والحمد لله العربية اللى معايا مش مزعلانى بالعكس انا بموت فيها مووووووت وحاسس انها - لا مؤاخذة كدا بالبلدى - مراتى التانية
لدرجة انى الحمد لله بسافر بيها كتير وعشان تتخيلوا بس انى دلوقتى وصلت بيها ل 75,000 Km والحمد لله ربنا ميسرها ومخليها مطيعة ليا واخر حلاوة لدرجة انى رحت بيها شرم الشيخ ورجعت وزى الفل بفضل الله ( نسيت اقولكم انى من بورسعيد )

بس طبعا الحلو مش لازم يكمل كالعادة
هى صغنونة حبتين وانا كنت عارف كدا طبعا وانا بشتريها بس قولت اهى هتقضينى انا ومراتى وابنى
بس الحمد لله ربنا رزقنى الحمد لله بابنى التانى - ربنا يباركلى فيهم الاتنين - فطبعا العربية بدأت تديق !!

المهم عشان انا عارف انى طولت اوى - بس حبيت اوضح ليكم الصورة كاملة

عشان كل اللى فات ده بقى - بدأت اخد قرار انى لازم ابتدى ادور على عربية اكبر عشان تبقى نقله كويسة وربنا يارب يوفقنى باذن الله

المهم قعدت اتفرج يمين وشمال
طبعا فى حاجات الواحد ما يبصش عليها احسن - زى المرسيدس والبى ام وكل الالمانى واللزى منه -
قولت اروح اشوف اليابانى - اجارك الله من اسعارهم - فاكيد جيبت ورا
مع العلم طبعا انى مش هركب غير زيرو حتى لو عجلة واحدة محسوبكم خبرته فالميكانيكا زيررررررررو !!

المهم بعد ما شوفت الكلام ده كله - بدات ايأس وقولت الحمد لله وتبارك الله فيم رزق واهو الحمد لله الواحد احسن من غيره كتير - على الاقل معايا اللى يودينى ويجيبنى !!

وبعدين وانا ع النت بدأت اشوف المنتدى هنا وبدأت احاول اقرى كتير فيه - بصراحة قمه فى المتعة والاعضاء قمه فى الاحترام

نيجى بقى للنقطة المهمة
بدأت اشوف تقارير العربيات واكتر تقريرين شدونى كانو ل :

عربيه M11 للاستاذ hemaa_82 f بجد مشكووووور الف سكر ليه على مجهوده الرائع

والتانية لل BYD للاستاذ أبو ياسمين قمة فى الروعة وقمة فى الخبرة الهايلة

وانا بقى بدأت احتار وبدات راسى تميل لل BYD اوووووووووووووى
لدرجة لما بلاقى عربية ماشية والله بفضل ماشى وراها حتى لو غير اتجاهى بس عشان اتفرج عليها
بس للاسف محسوبكم خجول شوية ما اقدرش اسأل اللى جواها
كمان اتصلت سألت التوكيل قالولى مش موجودة دلوقتى ولازم اروح احجز وممكن كمان يدينى العربية من غير مقدم !!
المهم انا خلاص هجيب نهاية الموضوع
انا نفسى حد يشور عليا اعمل ايه واجيب ايه !!
وانا هحاول اقولكم ظروفى والظروف اللى تسمح انى اجيب بيها العربية

1- طبعا زيرو
2- مساحتها مناسبة وواسعة من جوا
3- شنطتها تبقى كبيرة وتملى العين
4- اتوماتيك - حاليا انا عربيتى مانيوال بس عايز اريح عقلى بقى -
5- الامان - يعنى ABS وكدا
6- حركات من جوا - زى دى فى دى و تابلوت وطارة اوبشن وكدا
7- القسط لغاية 2500 ج لمدى 5 سنين - وباقل مقدم ممكن - وبصراحة يا ريت يكون بدون مقدم عشان مش عايز ابيع حبيبتى السبارك !!

ياريت تفيدونى وانا بتأسف جدا انى طولت عليكم كتير بس ده فقط لثقتى فيكم وانكم هتقدروا تفيدونى

والسلام عليكم ورحمة الله تعالى وبركاته

[Eng_Keen_162]

اممممممممممممممم!!!!!!!!!!!
113 مشاهده مفيش رد واحد يوحد ربنا ؟؟؟؟؟

[aw2100]

انا شايف انك تصبر شوية وتجيب عربية كويسه ممكن لانوس او افيو الأكبر من عربيتك شويه وبلاش الصينى طالما مالكش خبرة فى العربيات لو عاوز زيرو ومبروك مقدما !!!

[Eng_Keen_162]

انا شايف انك تصبر شوية وتجيب عربية كويسه ممكن لانوس او افيو الأكبر من عربيتك شويه وبلاش الصينى طالما مالكش خبرة فى العربيات لو عاوز زيرو ومبروك مقدما !!!

شكرا يا باشا على ردك - وارجوك بلاش احباط
بالنسبة للانوس كانت قدامى نفس سعر عربيتى بالمليم -
بس طبعا عمرى ما هركبها لانى حاسسها موديل السبعينات !!!
الافيو جميلة - بس برضوا مش دماغى لانى بصراحة عايز اغير من شيفروليه لانى تعبت مع التوكيل بتاعهم

عامة الف شكر على تضامنك - وادعيلى اوفق فى اختيارى

[ARKOON]

شيفي أفيو اوتو فل اوبشن ب 106 .

[ARKOON]

وممكن متسوبشي أتراج ب 113 اوتو فل اوبشن .

[m2rizk]

لو عاوز حاجة واسعة و كويسة ... ممكن التيجو الجديدة

[Eng_Keen_162]

لو عاوز حاجة واسعة و كويسة ... ممكن التيجو الجديدة

طيب بالنسبة لامكانياتها ووسائل الامان فيها وثباتها ع الطريق ؟

على فكرة انا مش داخل سباق يعنى - اخرى اخرى 140

[mif]

140 تجيب لانسر زيرو

[Eng_Keen_162]

140 تجيب لانسر زيرو

شكرا يا باشا على ردك
بس انا مكنتش اقصد 140 الف
كنت اقصد 140 كم / س

[Islam Dolaify]

انا شايف ان بي واي دي كويسه وسعرها معقول جدا وامكانيتها زي ما انت حابب خاصة المودي الجديد اللي اسمه ال3 بصراحة تحفة ووسائل الامان فيه عالية والاوبشن كمان وسعرها 99 الف اتوماتيك ستيبترونيك ووكيها يتعب شوية بس اسعار قطع غياره معقولة

[mth3000]

ياريت حضرتك تقول لنا عملت ايه وجبت ايه وايه هو انطباعك علي اللي اشتريته وشكراً