سؤال بخصوص الرشاشات فى الانوس

[amr_adel00]

يا عمرو باشا انا تحت امرك :)

كل الاعراض اللي بتقول عليها دي بتأكد ان العيب من الرشاشات

انا بس عايز اوضحلك حاجه صغيره
احنا لما بنقول الرشاشات باظت او فيها مشكله او بتأخر الدواره ده بيكون مقصود بيه في الغالب ان في رشاش او اكتر بيسييل , بمعنى انه بيدي نسب بنزين اعلى من النسب الصحيحه وبعد ما الرشاش بيقفل بيسييل بنزين , يعني مش بيقفل بنسبه 100%

وعشان كده لما بتيجي تدور العربيه الصبح ممكن تلقط معاك في لحظه لان العربيه كانت بايته وحتى لو كان في بنزين سال بعد ما بطلت العربيه بيكون طار

لكن لما تدورها شويه او تعمل بيها مشاوريك العاديه وتبطل العربيه بيكون في بنزين زياده خرج من الرشاش وبيفضل زي ما هو كده , تيجي بعدها بشويه تدور تاني تلاقي تأخير في الدواره , لان في بنزين اكتر من المطلوب , حاجه كده زي اللي كنا بنسميها في العربيات القديمه (كأن العربيه شرقانه)
وعشان تتأكد اكتر ان العيب من الرشاشات : لما تيجي تدور وتلاقي العربيه غابت في الدواره ريح رجلك سنه على دواسة البنزين , هتلاقيها دارت في لحظه

ولو في رشاش واحد بيسييل فهو كفيل انه يأخر الدوارة وكمان يقلل من سحب العربيه
لان المفروض كل رشاش بيكون ليه زمن فتح وقفل ونسبة بنزين بتخرج منه , فـ لو في رشاش واحد بيدي نسب اعلى من الطبيعي الكنترول بيبدأ يتحكم في الرشاشات كلها لتقليل النسبه دي , وبينتج عنه ضعف في السحب

يمكن كلامي مش علمي اوي , لكن يارب يكون المعنى وصل :)

dيا شامى مش بقولك انك برنسسسسسس :)
تسلملى يا شامى و تسلم ردودك الغاليه اوى دى

[محمد الشامي]

dيا شامى مش بقولك انك برنسسسسسس :)
تسلملى يا شامى و تسلم ردودك الغاليه اوى دى

انت اللي برنس يابرنس :)) انا مش بعمل غير الواجب والله

بس اهم حاجه انك تسمع لباقي اراء الزملاء , وفي الاخر خالص عشان تقطع الشك باليقين حط العربيه على اسكانر عشان تتأكد من حاله الرشاشات والحساسات

وباذن الله كله خير :)

[amr_adel00]

لمعرفت رشاشاتك تخينه ولا رفيعة هقولك حاجة تقريبية
لو موديل عربيتك قبل عام 2003 الرشاشات بتبقي التخينة اما لو من موديل 2003 الي اخر موديل بيبقي الرشاشات الرفيعة ودي صعب انها تسيل وخلي بالك من كلمة صعب ولكن مش مستحيل

1000 شكر يا طاروووق على المعلومه الكويسه دى :)
عامة انا عربتى جولييت 99 يعنى اعتقد كده رشاشاتى تخينه بقى صح ؟؟
يعنى لو طلت بايزه يا طارووق هركب بقى رشاشات ال بى ام m40 صح ولا ايه يا روقااا ؟

[lanos2004]

انا عندى التخينه والرفيعه والبى ام شوف لو عاوز محل كويس-المتوكل فى الحرفيين -ومحل احمد ميدو لو عاوز رشاشات بى ام -دول ارخص سعر وانضف بضاعه -

[alaafever]

لو سمحتم ازاى اعرف ان الرشاشات bmw الاستيراد سليمه وانا باشتريها وشكرا

[amr_adel00]

لو سمحتم ازاى اعرف ان الرشاشات bmw الاستيراد سليمه وانا باشتريها وشكرا

على فكره انا كنت هستفسر بخصوص السؤال ده فا ياريت فعلا الرد علشان الواحد يبقى عارف و هو بيشترى احسن انتوا عارفين البياعين بقى معندهمش ضمير خااااااااالص و شكرا

[towfeq]

السلام عليكم يا احسن ناس
والله انا بفرح لما بشوف كمية المحبة و الود اللي هنا..و اد ايه الناس بتساعد بعضها و بقول يا رب يبقى حال البلد و الناس دايما كده..
دلوقتي يا استاذ شامي و استاذ طارق سؤال موازي للسياق كده
بالنسبة لانواع الرشاشات البديلة للانوس
BMW و دي جامدة و نظام سحب و اداء
و رشاشات الاكسنت ودى الموفره في اللي بالي بالكو ( البنزين)

وقريت موضوع رشاشات تخينة و رفيعه

بالنسبة لموديل 2002 كوري ده على حسب ما قريت تخين
ينفع يركب له رشاشات الاكسنت ولا لازم البي ام

وهل رشاشات الاكسنت متوفر منها المقاسين الرفيع و التخين ولا ايه
وشكرا يا احسن ناس

[محمد الشامي]

لو سمحتم ازاى اعرف ان الرشاشات bmw الاستيراد سليمه وانا باشتريها وشكرا

على فكره انا كنت هستفسر بخصوص السؤال ده فا ياريت فعلا الرد علشان الواحد يبقى عارف و هو بيشترى احسن انتوا عارفين البياعين بقى معندهمش ضمير خااااااااالص و شكرا

دي بتكون بالاتفاق مع التاجر اللي بيبيع

انت ممكن تشتري الرشاشات من عنده وتروح لحد بينضف بالالترا سونيك , واثناء عمليه التنضيف بيبان لو في رشاش بيسييل , وبناءاً عليه بترجع للتاجر تغيير منه الرشاش اللي فيه المشكله

وفي حل تاني اوفر
ممكن لو ركبت الرشاشات عند التاجر مباشرة , تروح بعدها لحد عنده اسكانر , ويكشفلك على العربيه وعلى الرشاشات , ولو الرشاشات فيها مشكله هاتبان

[محمد الشامي]

بالنسبة لانواع الرشاشات البديلة للانوس
bmw و دي جامدة و نظام سحب و اداء
و رشاشات الاكسنت ودى الموفره في اللي بالي بالكو ( البنزين) :f_eyeb1[1]:

ده كلام زي الفل :)

وقريت موضوع رشاشات تخينة و رفيعه
بالنسبة لموديل 2002 كوري ده على حسب ما قريت تخين
ينفع يركب له رشاشات الاكسنت ولا لازم البي ام
وهل رشاشات الاكسنت متوفر منها المقاسين الرفيع و التخين ولا ايه

حسب معلوماتي الضئيله في النقطه دي رشاشات الاكسنت تركب عادي وبدون اي مشاكل بإذن الله

وحكايه رشاشات الاكسنت هل متوفر منها رفيع وتخين , فأنا بصراحه مش عارف

ان شاء الله الزملاء الاكثر مني خبره يفيدوك :)

[towfeq]

السلام عليكم
الف شكر يا محمد
جزاك الله خير
و يا رب يديم المودة بينا و بين الناس كلها

[محمد الشامي]

وعليكم السلام ورحمه الله وبركاته
انا تحت امرك يا باشا :) وربنا يديم المعروف بيننا جميعاً يارب