دفعت رشاوي الترخيص وخدتها تاني - هههههههه

[Atrees]

صباحكم فل يا سيراتاوية

انا مكنتش عايز اعمل الموضوع لانة مش مهم لناس كتير بس مهم للمبدا والحكومة بتاعتنا وموظفينها

الموقع : مرور مدينة نصر
التاريخ : اليوم
الهدف : تجديد رخصة السنيورة


اولا كلنا عارفين مشوار المرور - وعشان كدة كل واحد بيحاول يزبط الواسطة عشان يخلص بسرعة
المهم السنة دي اغلب القرايب والوسايط بيصيفوا وبالتالي قولت يا واد هوا فيها ايه متروح المرور وترخص بنفسك مره - هههههههه

المهم روحت زي العبيط ودخلت - لا عارف اية المطلوب ولا ايه الورق ولا ايه الخطوات - انا فعلا اول مرة اروح من غير حد يمشي في الاجراءات - بجد صدقوني

عموما - دخلت وارتميت في احضان الشبابيك اسال وادور ومفيش حد عايز يفيد - اللي يقولك اقرا اللي علي الحيط واللي يفتي وهكذا

المهم لقيت واحد بينده عليا - طلع الواد بتاع معرض العربيات صاحب ابويا اللي رخصلي العربية - قاللي جاي تعمل اية - قولتلوا - قالي طيب هات الرخصة واستناني ( هههه الواسطة ورايا ورايا )
المهم جالي تاني وقالي يلا بينا نجيب الورق والملف والحركات - قولتلو - خد 100 جنية وانجز -
فعلا جاب التامين والورق وراح جاب شهادة مخالفات ( قصة تانية نعمل بيها موضوع جديد )

بعد كدة قالي يا باشا خمساتك وعشراتك عشان ننجز وتعالي معايا ( الواد مبيحطش حاجة في جيبة - كله بيدفعو قدامي وبياخد عرقة في الاخر )

المهم دخلنا علي الشبابيك وهاتك يا عشرات وعشرينات واللذي منه - لحد ما جالي وقالي قدم انت الورق دة للراجل اللي هناك دة عشان متخانق معاه ورزل - روحت فعلا واديته الورق ومعاها 20 جنية عشان نخلص من رزالتة - بس هوا خد بالة من الواد اللي معايا وبدا الرزالة - اكتب دي واملا دي ويمشي 3 انفار ويرجعلي - لطعني جنبة بتاع نص ساعة علي مفيش - بصراحة دمي اتحرق - قولتوا يتخلص يا تجيب الملف ومش عايز الرخصة وحعملها بمعرفتي - راح رامي الملف - ساعتها محستش غير وانا بزعق وبقلوا يعني مرتشي وواخد عشرين جنية وكمان بترمي الملف ؟؟؟

وقامت عاركة - المهم برضوا مرجعش الفلوس وكمان محدش من الموظفين عايز ياخد الملف !!!!!


روحت مكلم الواسطة - بدون الخوض في تفاصيلها - بس دي اخر وسائل الهجوم - هههههه

بعتلي واحد من مكتبة جالي بعد نص ساعه تقريبا وراح واخد الملف وداخل علي مدير المرور وقالي خليك معايا

دخلنا لقيت السلامات والاحضان - قالي اية المشكلة حكيتلو - قالي طيب شكلو ايه ؟؟

وتم ضبط واحضار الموظف - شافني وشة لون - المهم اخوكم يسكت ؟؟ لا طبعا روحت قايلو علي كل الرشاوي اللي دفعتها ( طبعا هوا عارف بس لازم ينكر )

الورق خلص هوا والجميل بقي انه قال للموظف اللي رفض الملف يرجعلي ال 20 جنية وكمان ال 40 جنية اللي دفعتهم علي كل الشبابيك وقاله - ابقو لمو من بعض يا حرامية - هههههه


الرخصة طلعت والرشاوي رجعت وخرجت من المرور :)

بس كان نفسي اعملهم محضر رشوه كمان بس قولت كفاية كدة :)

[revel_sony]

ربنا يسترها معانا جميعا ويرحمنا من موظفين الحكومه اللي من العينه ديه ويهديهم ومبروك يا باشا علي الرخصه

[waleedelpiloot]

ليية يا عتريس الرشوة
والله وانتا رايح بس المرور تكون حاطط من جواك ان الرشوة حرام و انا مش هدفع اى حاجة هوة عشان ارخص عربية ربنا يلعنى؟؟؟
الحمدالله انا عملت كدة فى عربيتى اما جيت ارخص و خلصت فى نص ساااااعة بس ومن غير ولا جنية واحد غير بس الواد الى بيركب النمر برة حلاوة العربية

[heha]

ليية يا عتريس الرشوة
والله وانتا رايح بس المرور تكون حاطط من جواك ان الرشوة حرام و انا مش هدفع اى حاجة هوة عشان ارخص عربية ربنا يلعنى؟؟؟
الحمدالله انا عملت كدة فى عربيتى اما جيت ارخص و خلصت فى نص ساااااعة بس ومن غير ولا جنية واحد غير بس الواد الى بيركب النمر برة حلاوة العربية

++++++++++1

[Atrees]

انا معاك تماما - وده مبدائي وعشان كدة كتبت في الاول ان الموضوع مبدا
بس طبعا ده شيئ ميفهموش الناس دي - وحلني بقي


عموما هيا مرة ومش رايحها تانيييييييي :))))))))))))))

[NoRmAl]

بترشى بأرباح الشركه يا عتريس :)
مبروك يا باشا على الترخيص

[BOOGIE]

حصل الموقف دا مع ولدى الراجل الى فى الشباك بعض ما اخد الفلوس خلاص لطعنا ساعة لحد م الحج شاف شغلو معاه و مسح بكرمتة الارض و دخلنا لرئيس الوحدة بس الحج مرداش يقول ان الراجل خد فلوس قال لرئيس الوحدة ان الموظف متعنت و مش راضى انو يقوم بعملة
راح رئيس الوحدة بعت معانا عسكرى خلص كل حاجة

[Atrees]

بترشى بأرباح الشركه يا عتريس :)
مبروك يا باشا على الترخيص

ههههههه يعني بنقول رشاوي - حتفرق يعني تهمة النصب - كله من الارباح المنهوبة - ههههه

والله انا خايف اقابلكم القيكم فعلا مصدقين ان معايا اباح - ههههههههههههههههه

[ghost1900]

المشكلة أنك أنت اللى مصدق أن مفيش ههههههههههههههه .

[ALSHARIEF]

نفس إللى حصل معايا بس فعلا أنا كنت رايح و حاطط فى دماغى و نيتى إنى مش هدفع مليم رشوة علشان حاجتى تخلص إنما ممكن أدفع الحلاوة بعد ما المصلحة تقضى و قد كان أشتغلت الخناقات و الصوت العالى بس أنا يوميها كنت رايح ضارب طقم غامق و مكشر و لابس النظارة الغامقة و مش هاممنى حد حتى رئيس الوحدة و عزمت إ‘نى مش هظهر الكارت إللى معايا إلا فى حالة إنهم يقبضوا عليا هههههههههههههههههه .

لدرجة إن فيه واحد أفتكرنى مباحث و لقيت راجل كبير فى السن جى بيقوللى ممكن يابنى تبعت معايا حد يخللصلى المخالفات أو حتى تيجى معايا إنت أصل سامع واحد بيقول إنك مباحث

ساعتها أنا ضحكت و قولتله أنا لا مباحث و لا حاجة بس على مين زعل أوى و قاللى خلاص أنا مش هتحايل عليك براحتك طبعا مرضتش إنه يمشى زعلان و رحت معاه لرئيس الوحدة إللى هوه أتعرف عليا بعد ماوصله صيتى و عرف إللى أنا عامله و الحمد لله بعت العسكرى بتاعه خلصهاله و هو عنده فى المكتب .

بس كله كوم و المراجع اللى كان عند الشباك كوم الواد إللى كان مبعوت معايا من المعرض ككادو علشان يرخص هو و أنا مستريح شبه عساكر الخدمة بالضبط و بالتالى ثبت الأشاعات عليا إنى مبببببببببببببباحث و هو بيدى المراجع الملف حطلوا فيه 15 جندى راح الراجل بصصله بإشمئزاز و قاله خد ماينفعوش ....... طبعا أنا مش واخد بالى لقيت الواد جى بيقولى هات 20 جنيه و حكالى إللى حصل ... المهم جت فى بالى فكرة جهنمية إديته الفلوس و رحت وقفت وراه و هوه بيديله الرشوة أول ماخدها و عجبته بصتله لقيت للأسف فى وشه زبيبة الصلاه قمت مناديله و قلتله : حلوة أوى الزبيببة إللى فى وشك ديه و ساعتها حسيت إنه هيموت و لقيت كل الناس إللى واقفين على الشباك ده و باقى الشبابيك بصصولى بإستغراب شديد و كأن لسان حالهم بيقول فينك من بدرى ده عالم مابتشبعش و بتقبل على نفسها و بيوتها و أهلها الحرام .

المهم أسف للإطالة بس بجد ربنا يستر ما يحطكش فى دماغهم أصل ديه عالم مؤذية ...... ربنا يستر

[M7amD_7amDy]

الكوسة حلوة برده

وناعمممممممممممممة :))

[santacruz]

هو دة التظبيط

[alzwawy]

ههههههههههههههههه حلوه الكوسه جي يا عم عتريس و دايما كده عامل مشاكل هههههههههه يا ابني اهدي شويه بطل بعزقه من فلوسنا بس شوفت ربنا رجعهالنا تاني ازاي ربنا عارف انك بتبعزق من فلوسنا قام مرجعهالنا تاني هههههههههه ده انت هتتحبس يوم المقابله ان شاء الله بسبب الارباح دي

[د.محمود صلاح]

اتصرفت صح ... كله بيخلص بالمعارف .. حتى طابور العيش

[م. حاتم السباعي]

اولا_ مبروك علي التجديد يا عتريس باشا
ثانيا_ انا مبسوط جدا من انك حكيت لنا علي القصة الجميلة دي وحاسس ان الموضوع كان ممكن يعدي ومتحكيش لو محصلش معاك الموقف بتاع الموظف المتعنت (المرتشي زي زمايله ) علي اساس ان الموضوع اصبح عادي جدا ان ده اللي المفروض يحصل انه يجب ان ( ينجز بعد اخذ الونجز ) وتحضرني مداخلة للشيخ وجدي غنيم وهي عن ( إنف المعصية ) بمعني اننا كمجتمع اعتدنا ان نعطي الفلوس لمن يؤدي عمله كي يقوم بواجبة (ولا اقصدك طبعا يا عتريس) وانما معظم المجتمع الا من رحم ربي كما اعتاد من هم في الغرب علي رؤية العرايا في الشوارع والميادين وعلي الاعلانات فلما سافر الشيخ لامريكا لالقاء محاضرة هناك هاله الامر وظل يقول لا الله الا الله ويغمض عينية وهو ماشي (فقال له من استقبله في المطار وطبعا هو شيخ ايضا يا شيخ وجدي انتا لسه شفت حاجة ده شئ عادي جدا هنا) اذكر ان الشيخ وجدي رد وقال خلاص ياخويا انا مش هقعد هنا _وفعلا من لا يريد ان يرشي الموظفين بيحاول انه يجيب واسطة كي ينقضي الامر بسلام وحتي الواسطة حرام في الاديان جميعا ولو انها اخف الاضرار والله اعلي واعلم ما اريد قوله اننا يجب ان نحارب الرشوة والاكرامية المفروضة وكل انواع الغش والتدليس ونحاول ان نفضح الشخص المرتشي بعد اصراره طبعا وبعد ان يرفض الانصياع للعمل بدون الونجز وعسي ان يتوب الله علي الموظفين المرتشين قبل ان يدركهم الموت ويصلح لهم شأنهم ولا يضعنا جميعا في مواقف من بتاعة (يتدفع ييتوقف حالك)
بسم الله الرحمن الرحيم
(وَمَنْ يَتَّقِ اللَّهَ يَجْعَلْ لَهُ مَخْرَجاً(2) وَيَرْزُقْهُ مِنْ حَيْثُ لايَحْتَسِبُ )


م.حاتم السباعي