الحقوني .... الياريس بتسخن ومش لاقي حل

[mahmoud_dev]

السلام عليكم

معايا ياريس 2008 اوتوماتيك

الصبح لقيت اللمبه بتاعه الحراره نورت ركنت شويه علي ما العربيه بردت وبعدها مشيت وهكذا لحد ماوصلت شغلي اللمبه تنور اقف بيها شويه وامشي وهكذا
بعد الشغل روحت للميكانيكي زود المياه واخد هوا وكده ولقيت المروحه شغاله والمايه نقصه شويه صغيرين المهم مشيت من عند الميكانيكي حصل نفس المشكله وروحت لواحد تاني وعمل نفس الكلام وبردو العربيه لسه بتسخن
انا هاتجنن المايه مش بتنقص الا شويه صغيرين ومش لاقي اي حاجه بتسرب وكمان المروحه شغاله وبتفصل ورغم كل ده العربيه بتبقي مولعه وسخنه واللمبه بتنور
اعمل ايه ؟؟؟ الميكانكي في الاخر قالي روح نضف الردياتير وقالي ممكن الترموستات تكون عايزه تتشال وان في عربيات كتير بيشولا منها الترموساتات

اسف علي الاطاله بس بجد الموضوع متعب جدا ومش عارف اعمل ايه انا ركنت العربيه وماردتش امشي بيها لحد ما اسئلكم

[mr_green]

حاجة من 2 :

1- تروح التوكيل و تشترى دماغك
2- هاتغير الترموستات و لازم تجيبها أصلى عشان متبوظلكش الدنيا

--------

إنت لما بتسخن فتحت الكبوت و بصيت المروحة شغالة ولا لأ ؟؟

لو شغالة يبقى حيره و أفضل تروح التوكيل
لو مش شغالة ممكن تكون بتعلق حبه و حبه أو الترموستات بيعلق و الله أعلم

الحرارة هى عدو الموتور خلى بالك

[mahmoud_dev]

المروحه بتشتغل وصوتها عالي جدا كمان واضح انها بتشتغل علي اعلي سرعه
بالنسبه للترومستات الميكانيكي قالي لو الترموستات بايظه كان هايبقي الماتور من فوق سخن ومن تحت بارد او العكس وطبعا العربيه بلاقي كلها سخنه

[Abo_Mazen]

أولا ..أنا لو مكانك هعمل الآتي ..هروح للميكانيكي هخليه يشيل ثرموستات الكوع ..ثانيا ..لو المشكله ضبطت يبقى كده ثرموستات الكوع كان فيه مشكلة ولازم يتجاب غيره ...لو المشكله ما ضبطتش يبقى ننتقل للخطوه التانيه ...وهي إنك تخلي العربيه سخنه واللمبة منوره بتاعة الحراره هتشوف المياه في القربه فايره وواصله لغاية أول القربه أو عموما فايره في القربه ولا لأ ..وبعدين تعمل إختبار كبس الهوا على المياه ..وده تعمله بإنك تخلي العربيه بايته من إمبارح بارده ..وبعدين تقوم مالي الريداتير على الآخر ..يعني تخلي المياه توصل للفوهه ..وبعدين تقوم مدور العربيه .لو لقيت المياه نطت لفوق ..يعني عملت jump..يبقى كده فيه تنفيس من وش السلندر على دورة المياه ..إختبار الكبس ده يتعمل وإنت شايل الثرموستات لإنك كده أو كده هتشيلها وهتشوف النتيجه ..لو لقيت مفيش jump للمياه من الريداتير وبرضه فيه حراره يبقى تطلع على بتاع ريداتير علطول وقوله سيخ الريداتير ..وخلي بالك في فرق بين سيخ وبين إغسل ..أنا بقول الريداتير يبتسيخ ....خلي بالك ..لو المكنه عندك المونيوم ما تمشيش بها كده عشان البلوك عندك ما يقفعش ...لسه قاري مشاركه لواحد البلوك عنده قفع عشان كان ماشي بالعربيه وهي سخنه مده ..جرب وطمنا

[mahmoud_dev]

انا جربت اسخن العربيه وانا شايل غطاء المياه اللي واصله للراديتير (الياريس فيها قربه بلاستك بغطا وفيها كمان غطاء اللمياه اعلي الماتور) ولقيت بيحصل فوران بسيط يعني نقط كده صغيره اوي علي شكل رغاوي
وبالنسبة للأختيار التاني هي المياه بتعملي jump لكن في حاله اني اشيل الغطا مره واحده والعربيه سخنه واعتقد ان ده طبيعي لكن لو الغطا متشال والعربيه سخن المياه مش بتعمل jump

انا كده اول حاجه عاهلمها هانضف الرادتير لأن كده كده تنضيفه مهم وبعدها هاشيل الترموستات لو المشكله لقتها لسه موجوده

[Abo_Mazen]

انا جربت اسخن العربيه وانا شايل غطاء المياه اللي واصله للراديتير (الياريس فيها قربه بلاستك بغطا وفيها كمان غطاء اللمياه اعلي الماتور) ولقيت بيحصل فوران بسيط يعني نقط كده صغيره اوي علي شكل رغاوي
وبالنسبة للأختيار التاني هي المياه بتعملي jump لكن في حاله اني اشيل الغطا مره واحده والعربيه سخنه واعتقد ان ده طبيعي لكن لو الغطا متشال والعربيه سخن المياه مش بتعمل jump

انا كده اول حاجه عاهلمها هانضف الرادتير لأن كده كده تنضيفه مهم وبعدها هاشيل الترموستات لو المشكله لقتها لسه موجوده

ياباشا أنا قلت لحضرتك تخلي العربيه سخنه وغطا الريداتير مقفول وتبص على القربه ..حضرتك عملت العكس تماما ..أنا عاوزك تطمن بس مش أكتر إن الهيد عندك مش بينفخ هوا ...وبعدين قبل ما تنضف الريداتير شيل ثرموستات الكوع ..لإن الظن الأول والأكبر بيروح للثرموستات قبل الريداتير وخصوصا لو حضرتك معندكش صدا في الريداتير أصلا ..وما تمشيش بيها وهي بتسخن

[mahmoud_dev]

تمام انا لما بتفح القربه والعربيه سخنه مش بيعصل حاجه والماياه مش بتطلع
تماما انا هاعمل زي ماحضرتك قولت وربنا يسهل
بس هلي الترموستات دي ينفع افكها بنفسي ولا لازم الميكانيكي ؟ يعني الكوع ده فين بالظبط في الياريس ؟

[Abo_Mazen]

تمام انا لما بتفح القربه والعربيه سخنه مش بيعصل حاجه والماياه مش بتطلع
تماما انا هاعمل زي ماحضرتك قولت وربنا يسهل
بس هلي الترموستات دي ينفع افكها بنفسي ولا لازم الميكانيكي ؟ يعني الكوع ده فين بالظبط في الياريس ؟

كده تبدأ الشكوك تروح ناحية ثرموستات الكوع ..عموما الثرموستات دي لازم الميكانيكي هو اللي يفكها ..عشان بيحط مكان الجوان بتاعها سليكون ويتأكد إن مفيش تسريب ..وعموما حكاية فك الثرموستات دي عشان تتأكد بس إن العيب منها مش أكتر

[sonaeg]

نصيحة ماتشيلش ثرموستات الكوعة ابدا .... لو بايظة غيرها وهات الاصلية لو شلتها العربية حتفضل باردة ف الجري وتاكل بنزين وترجرج وحتقرفك وبيأثر علي عمر الموتور

[tasaka]

نصيحة ماتشيلش ثرموستات الكوعة ابدا .... لو بايظة غيرها وهات الاصلية لو شلتها العربية حتفضل باردة ف الجري وتاكل بنزين وترجرج وحتقرفك وبيأثر علي عمر الموتور

كلام مضبوط جدا .. عموما شيل ثرموستات الكوع ده يعنى الحل لما تكون مرغم على ذلك ( مثلا عربيه معروف عنها عيب مشكله السخونه .. او اشياء من هذا القبيل )

الاصح هو ما قاله sonaeg بعد اصلاح سبب السخونه .. و هات الاصلى

[Abo_Mazen]

نصيحة ماتشيلش ثرموستات الكوعة ابدا .... لو بايظة غيرها وهات الاصلية لو شلتها العربية حتفضل باردة ف الجري وتاكل بنزين وترجرج وحتقرفك وبيأثر علي عمر الموتور

ياباشا ما أنا قايله يشيلها عشان يعرف بس العيب منها ولا لأ ..إنما طبعا شيل الثرموستات علطول غلط طبعا ..هو هيشيلها بس عشان يشوف المشكله هتضبط ولا لأ ..لو ضبط لما يشيل الثرموستات يبقى الثرموستات دي كانت عامله مشكلة ويجيب ثرموستات غيرها مش أكتر

[mahmoud_dev]

السلام عليكم
ربنا يباركلكم جميعا بجد ادع ناس

امبارح روحت لواحد بتاع ردياتير قولت اشوف الرادياتير حالته ايه الراجل شاف الراداتير وقالي الرادتير مسدود جامد جدا ومافيش ولا مكان فيه سالك وقعد نضفه وغيرنا المياه وانهارده روحت بيها الشغل (من الهرم لمساكن شيراتون) والحمد لله ماحصلش سخونه واللمبه مانورتش وطبعا انا هاراقب المياه والعربيه لحد ماتاكد ان المشكله اتحلت

ربنا يبارك للجميع يارب في اولادهم واهلهم وعربياتهم :)

[mr_green]

أهم حاجة تحط ماء أخضر مش حنفية و لا حنفية و تزودها ماء مركز برده مش كويس

إن شاء الله ماتسخنش تانى :)

[sonaeg]

ياباشا ما أنا قايله يشيلها عشان يعرف بس العيب منها ولا لأ ..إنما طبعا شيل الثرموستات علطول غلط طبعا ..هو هيشيلها بس عشان يشوف المشكله هتضبط ولا لأ ..لو ضبط لما يشيل الثرموستات يبقى الثرموستات دي كانت عامله مشكلة ويجيب ثرموستات غيرها مش أكتر

تمام كﻻمك يافندم

[sonaeg]

السلام عليكم
ربنا يباركلكم جميعا بجد ادع ناس

امبارح روحت لواحد بتاع ردياتير قولت اشوف الرادياتير حالته ايه الراجل شاف الراداتير وقالي الرادتير مسدود جامد جدا ومافيش ولا مكان فيه سالك وقعد نضفه وغيرنا المياه وانهارده روحت بيها الشغل (من الهرم لمساكن شيراتون) والحمد لله ماحصلش سخونه واللمبه مانورتش وطبعا انا هاراقب المياه والعربيه لحد ماتاكد ان المشكله اتحلت

ربنا يبارك للجميع يارب في اولادهم واهلهم وعربياتهم :)

الحمد لله ربنا يباركلك فيها