الحمد لله وبعد عناء الإختيار إستلمت الياريس

[KiNgMaX]

باركولى يا إخوانى الحمد لله وبفضله استلمت العربية اول امبارح ياريس كاملة مانوال 2007 حمراء ماشاء الله عليها جميلة بجد افضل من الكورى اللى جربيته كتير الغريب ان العربية دى ماكانتش فى بالى انا شخصيا خالص وكنت مستبعدها لانى كنت حاسس انها ضيقة العربية طلعت واسعة جدآ وانا حاليا لسه بلين فا مش بقرص عليها جامد عشان مش هتكلم على الاداء مؤقتا بس طبعا واضح انه شديد وكان من الطبيعى طبعا ان عربية زى دى باللون ده والورق الابيض اللى عليها وشكلها الملفت انها ماتروحش البيت سليمة وانا راجع من المعرض يدوبك مشيت حوالى 3 كيلو وفجأة سمعت الصوت اللى كنت مستنيه عربية لادا لبست فيا من ورا الإكصدام اتكسر والفانوس اعوج ومابقتش عارف اعمل إيه شوية عكننة مالهومش لازمة بس نرجع نقول الحمد لله وقدر الله وماشاء فعل
نرجع للعربية بالنسبة للهدايا اللى كنت سالت عليها اتصلت بالتوكيل قبل ماأروح المعرض قالولى ان الهدايا دى كانت ايام السعر القديم 91000 جم اما انا واخدها فى فترة الخصم فامفيش هدايا عليها خالص انا واخدها من غير اى حاجة وعلى فكرة انا استلمت من غير كاسيت بس هستلمه 1/10 إن شاء الله قالولى ممكن اخد الف جنيه بدالو بس انا مرضتش وبالمناسبة انا بفكر ازود 1200 جم وآخد كاسيت cd هيبقى تويوتا دبل ايه رايكو افضل ولا آخد ال 2200 جم واجيب حاجة سونى ولا كلاريون مين هيكون صوته احسن وبعين فى حد يعرف كاسيتات تويوتا دى بتبقى ماركتها إيه ولاهى تويوتا بس ؟؟
العربية استلمتها عاملة 15 كم وفى خلال يومين عملت 280 كم
انا فى خلال التليين براعى الاتى
1 - مش بعلى ال rpm عن 3
2 - مش بشغل تكييف كتير
3 - مش بزود عن 100 كم/س
كده تمام ولا فى حاجة غلط ؟؟
وفى حاجة كنت عايز اسال عليها الفرامل حاسسها ضعيفة شوية اروح الصيانة ولا استنى الالف كيلو وخلاص هى مش خطيرة يعنى بس ضعيفة حبتين
ده اللى انا فاكره دلوقتى واى استفسار انا تحت امركم وإن شاء الله هبقا قاقولكم على اسباب اختيارى للياريس بالذات

[اسلام المصرى]

ألف مبروك يا باشا :) ربنا يباركلك فيها ان شاء الله و يديك خيرها و يبعد عنك شرها , معلش ذى ما حضرتك قولت الحمد لله و قدر الله و ما شاء فعل , سيب الخبطة ذى ماهيا ماتعملاهاش دلوقتى لغايت ما تاخد العين خالص :)
يعنى السرعة ممكن تخليها 80 بدل من 100
الفرامل مع الوقت هتاخد عليها لا اعتقد ان فيها عيب , أنت كنت سايق ايه قبل كده ؟؟
ربنا معاك

[eng/muhamad]

حضرتم المفتاح بتاعها ريموت كنترول ولا عادى
و حضرتك شاريها منييين

[معاذ الشرباصى]

اولا الف مبروك عليها

ربنا يبارك لك فيها و يحفظها لك

هو عامة انا لما سقت الياريس اول مرة كنت حاسس ان فراملها ضعيفة شوية, بس مع الوقت ادائها بقى احسن بس مش اداء عالى اوى

[أبوسيف]

ألف مبروك على العربية وياريت تقولنا جبتها بكام ومنين؟

[abo3bdolrahman]

الف مبروك و ربنا يباركلك فيها و الأفضل إنك تاخد الكاسيت الأصلى بتاعها و حاول تاخد اللى فيه MP3 و تقريبا كاسيت تويوتا كلاريون مصنوع خصيصا لتويوتا بس مش متاكد من المعلومة دى. :mrgreen:

[bassam nagy]

الف الف مبروك ربنا يديك خيرها ويبعد عنك شرها
وبالنسبة للفرامل او اى ملاحظات ان شاء اللة تظبطها فى صيانة الالف

[fahd_628]

الف الف مبرووووووووك و ربنا يحفظهالك

بالنسبة للكاسيت انا شايف ان التويوتا عمرة ما حيكون صوتة وحش و شكله كمان حلو اوى و ممكن تشغل فية كاسيت و CD مع بعض انا رأى انك تتوكل على الله و تجيبة و لكن لو انت بقى ناوى ان شاء الله قدام تركب طقم صوت جامد يعنى حتغير السماعات و Gm و حاجات من دية يبقى خد الفلوس و اشترى حاجة تانية بس لو انت حتشغله عادى زى كل الناس انا افضل التويوتا :)

و ربنا يوفقك و متزعلش على الخبطة الحمد لله انك سليم

و زى ما الناس هنا قالو قبل كدة ابقى شيل الورق الأبيض و الكياس بتاعت الكراسى علشان العربية بتبان انها جديدة و بتتحسد و انا بصراحة اقتنع بوجهة النظر دية

و الف مبروووووووووووك كمان مرة :)

[AlmAhAtmA]

مبروك يا سيد الكل
ربنا يبارك لك فيها

اولا ربنا يجعل اللي حصل في ميزان حسناتك
لازم العربيه الجديده تيجي ليها بركه الشوارع المصريه بس هنا البركه جت بدري شويه
انا كل الخبطات و انا راكن و نايم في بيتنا بس عادي خالص فداك

بالنسبه للفرامل انا كلمت صاحبي معاه ياريس مانيوال قالي قبل صيانه الالف حتحس بتحسن جامد في الفرامل و حتديك الاداء اللي انت عايزه

جيب الكاسيت الدبل علشان صاحبي جايبه و هوه فعلا تحفه

ربنا يبارك لك فيها و يكفيك شرها و يصونك

عايزن نشوفك في الافطار ان شاء الله

[aboalm]

الف مبروك و ربنا يعطيك خيرها
باقى ملاحظه عن ما قاله الاخوه بلاش التكييف فى فترة التليين احسن

[eng_amrazek]

الف الف الف ميروك يا باشا
ربنا يباركلك فيها
وفعلا بلاش تكييف فى فترة التليين

[goodwave]

إختيار موفق وربنا يبارك لك فيها ويكفيك شر الطريق
زي ما إخواني قالوا سيب الخبطة علشان تاخد العين بس ياريت تقولنا هي الخبطة كانت جامدة ولا إيه؟ وإية تأثيرها على العربية؟ قصدي يعني الاكصدام ورق واتدشدش ولا معقول؟

لو مش حطول عليك ياريت تقول إنت كنت بتفاضل بينها وبين إيه وليه وقع إختيارك عليها هي بالذات؟

ومبرووووووووووووووووووك

[Ahmed_Ezz]

الف مبروك و ربنا يعطيك خيرها ويكفيك شرها ان شاء الله

[TAG_Turbo0]

الف مبروك
وربنا يباركلك فيها

[Eng.Salah Mahdy Salama]

الف مبروك ربنا يديك خيرها و يكفيك شرها