للاباء و الامهات فقط

[haytham1542]

اخوانى

كل عام و انتم بخير

كنت عاوز اجيب كارسيت ( بوزته ) للاطفال بحيث اشيل البيبي يها و كمان اقدر احطها فى السيارة

كنت عاوز اماكن بيعها و اسعارها بشرط ان يكون سعرها كويس بالنسبة لجودتها و نوعية المادة المصنع منها و تكون حجم معقول بحيث تاخد الطفل لحد سن 2 سنه

انا لسه جديد فى موضوع الاطفال - لو سمحتوا ارشودنى - و كمان انا عاوز اجيب ملابس للبيبي تكون شيك و تكون سعرها كويس
ياريت بلاش ماركة شيكو لانى لاقيتها فى حدود 500 ج.م

اشكركم

[mailo]

الكار سيت بتاع الباشا عندي نوعه gracco
وده حلو قوي بس حاول تجيبه اخف وزن عشان هتحتاج تشيله بالكار سيت كتير فـدراعك هيقف
سعره حوالي 300 من جراند مول

بالنسبة للملابس هاتله قطن بس وعندك lovely فيه حاجات كويسة واسعار بتبتدي من 80 LE للقطعة تقريبا
هتضطر للأسف تجيب غالية عشان تبقى قطن خالص خصوصا في أول 3 شهور
واتعود على موضوع t-shirt يقعد اسبوعين بس عشان أول 3 شهور بيكبرو بسرعة

وربنا يقويك
دا إنت هتشوف أيام

آه نسيت أقولك حاول تنام كويس الكام يوم الجايين دول إنت والمدام عشان هتحلمو بـيه صاحيين ال 6 شهور الجايين

[heshamzaky]

اف مبروك على المولود . بص يا باشا عن تجربة الكار سيت دة غير الكارىكوت الى ينفع تجط فية البيبى و تشيلة و تحطة فى العربية
كرسى العربية ممكن يفضل لغاية 4 سنوات حسب الحجم الانواع الى أسعارها معقولة جدا حا تبقى ال كراجو و البيبى جينيور دول أسعارهم معقولة جدا أما ال شيكو غالية شويتين
لو عاوز ملابس حلوة جدا عندك كذا حاجة أنصحك روح لمحل اطفال our kidsحا تلاقى كل الانواع و لعلمك الشيكو مش حلو قوى زى ما الناس متخيلة الافضل منة هو ال ديزنى و نيمو و دول مش رخاص برضو بس بجد جودة فوق الممتازة و عندك حاجات كتير ممكن تنقى الى يعجبك منهم

[M.Hosni]

فيه كمان محل كويس في آخر شارع مكرم عبيد قصاد عمر أفندي اسمه كيدز بارك
ده هتلاقي فيه كل حاجة
لبس أطفال شيك و بأسعار معقولة
كرسي أطفال للسيارة و عربيات الأطفال
و فيه تنوع كبير عنده في الأسعار
و فيه كمان في نفس المكان محل اسمه تشايلد مول

[M.Mostafa80]

بالنسبه لكرسى العربيه انا جبته نوعه كراجو ب 180 وهو هو اللى فى المحلات الكبيره بيتباع ب 300 ج منين بقى من اول ش الأزهر فى وسط البلد ممر صغير هتلاقى محل فى وشك كبير شويه بس دا رافع فى السعر وطبعا الفصال وارد لو دخلت الممر اللى جنبه هتلاقى كام محل فى تساهل فى الفصال معاهم شويه كان ب 230 اخدته ب 180 وممكن تلاقى منه فى التوحيد والنور وهو هو نفس الخامات ونفس الماركه
اما اللبس فا ممكن من دنيال دى شيماريه وبيبى جينيور ملابسهم حلوه وفى المعقول جدا

[mohkhattab]

يا جماعة بما انى هنضم قريب جدا الى موضع الاباء ، هستاذنكم انكم تقول عناوين المحلات علشان اعرف اوصل ليهم بسهولة ، و ادعولى

[city_ct]

بالطبع سوف تجد فى السوق أنواع كثيرة منها الأصلى و منها التقليد الصينى الذى يحمل نفس اسم الماركة الأصلية و لكن مع اختلاف فى بعض الحروف (نفس اللعبة القديمة فى الترويج لأديداس و أديدوس).

الكار سيت ينقسم إلى فئات حسب الشريحة العمرية و يحكمه وزن الطفل و بالطبع كل فئة تختلف فى طريقة تثبيتها فى السيارة عن الأخرى و تصلح الفئة الأكبر للأطفال الفئة الأصغر.

من المركات الصينى المستقلة و التى لها براند مستقل هى بيبى جونيور و سوف تجد فيها كراسى بفئات كثيرة.

الإختلاف فى الماركات البراند و التقليد سوف تجده واضحا فى نوعية الأحزمة التى تربط الطفل و أقفالهذه الأحزمة و خامة هيكل الكرسى من بلاستيك رديئ ذو حواف خشنة إلى بلاستيك قوى ذو حواف ناعمة، هذا بالإضافة إلى خامة القماش ا, النسيج الذى يكسو الكرسى و التبطين.

تقريبا الفئة الأولى فى الكراسى من سن (صفر - 15 شهر) أى تتراوح من وزن (3-14) كجم، و هذه الفئة تثبت فى عكس اتجاه سير السيارة أى فى مواجهة ظهر الكنبة. و يمكن فكها و التحرك بها. و الفئة التى تليها هى الفئة التى تثيت فى اتجاه سير السيارة و يصعب التحرك بها لكبر حجمها و وزنها و تصلح للأطفال حتى سن ثرث سنوات تقريبا.

ممكن تزور مواقع المصنعيين لهذه الكراسى على الانترنت و كذلك موقع الEuroNCAP .

نصيحة قبل شرائك للكرسى جرب تركيبه فى السيارة أولا و شد حزام السيارة عليه للتأكد من توافقه مع السيارة.

[haytham1542]

بالنسبه لكرسى العربيه انا جبته نوعه كراجو ب 180 وهو هو اللى فى المحلات الكبيره بيتباع ب 300 ج منين بقى من اول ش الأزهر فى وسط البلد ممر صغير هتلاقى محل فى وشك كبير شويه بس دا رافع فى السعر وطبعا الفصال وارد لو دخلت الممر اللى جنبه هتلاقى كام محل فى تساهل فى الفصال معاهم شويه كان ب 230 اخدته ب 180 وممكن تلاقى منه فى التوحيد والنور وهو هو نفس الخامات ونفس الماركه
اما اللبس فا ممكن من دنيال دى شيماريه وبيبى جينيور ملابسهم حلوه وفى المعقول جدا

لو سمحت فين بالظبط فى اول شارع الازهر- لو ياريت علامة مميزة اول اسم محل -

و بخصوص اللبس - الاقى فين دنيال دى شيماريه وبيبى جينيور-

انا شاكر جدا لكم جميعا
يا سلام علي الاخوه

[w-m-a]

فعلا لازم تجرب الاول على احزمه السياره
لكن النوع الاول من 0:18 شهر بيكون سهل الحركه او التثبيت
المحل المحترم جدا نهايه اول ممر من شارع الجيش على ش الازهر على ناصيته بتوه شنط وعجل
اسمه الحاج ابو الفرج وهو راجل لذيذ جدا ومتسامح ومهاود فى السعر
وممكن الاول تتفرج فى التوحيد والنور هتلاقى اكثر من موديل واسعار متفاوته

[w-m-a]

اه نسيت بالنسبه لملابس ديزنى ملابس الاهرام فى باب اللوق كانت عامله خصم 50% من حوالى شهر شهر ونص

[haytham1542]

الكار سيت بتاع الباشا عندي نوعه gracco
وده حلو قوي بس حاول تجيبه اخف وزن عشان هتحتاج تشيله بالكار سيت كتير فـدراعك هيقف
سعره حوالي 300 من جراند مول
ين جراند مول- انا فى مصر الجديدة- انا هاروح بالعربية- لو ده اللي فى المعادى ياريت تشرحلي من كورنيش النيل

بالنسبة للملابس هاتله قطن بس وعندك lovely فيه حاجات كويسة واسعار بتبتدي من 80 LE للقطعة تقريبا
هتضطر للأسف تجيب غالية عشان تبقى قطن خالص خصوصا في أول 3 شهور
واتعود على موضوع t-shirt يقعد اسبوعين بس عشان أول 3 شهور بيكبرو بسرعة
لجو حر هاقعده من غير الهدوم

وربنا يقويك
دا إنت هتشوف أيام

آه نسيت أقولك حاول تنام كويس الكام يوم الجايين دول إنت والمدام عشان هتحلمو بـيه صاحيين ال 6 شهور الجايين

الباشا فى الطريق ان شاء الله - بس انا خايف من المرحله ده.

[heshamzaky]

فية ملابس داخلية و بيجامات للأطفال حديثى الولادة قطن خالص الماركة اسمها جنيور ممتازة و مش غالية حا تلاقى منها فى محلات التوحيد و النور

[ihabchina]

فى كمان محلات next احلى حاجة عنده لبس الاطفار اكتر من لبس الكبار وتروح تتفرج بس هههه وتشترى لما يبقى عندهم تخفيضات لان اسعارهم غالية بس لبسهم جميل جدا وبتبقى فرص فى التخفيضات

اه زى ما قال كل الزملاء لازم اللبس يبقى قطن 100 فى 100 وابعد عن اللبس الصينى هههه كفاية احنا

هتلاقى المحل ده فى سيتى استار وكل افرع كارفور

[mailo]

:m_yes[1]:

ين جراند مول- انا فى مصر الجديدة- انا هاروح بالعربية- لو ده اللي فى المعادى ياريت تشرحلي من كورنيش النيل
هتاخد كورنيش المعادي لحد وتعدي المحكمة الدستورية we-nile mall لحد متلقي sign المعادي 1
هتخش منها شمال وتمشي على طول لحد متعدي مزلقان هتلاقي جراند mall
طبعا تمشي على طول دي يعني هتعدي بتاع 7 ميادين هينسوك اسمك وأنا نفسي بتلخبط فيهم لحد دلوقتي
الاسهل تطلع اوتستراد وتنزل نزلت شارع النصر وآخره العرب اسأل هناك هيسهاورولك على el-mall أو تاخد اللاسلكي من النصر وتسأل برده هتلاقي كتير يدلك أنا ممكن ارسملك map لو عايز

وكمان فيه في اركاديا mall حاجات كويسة برده بس دي من سن 6 شهور لفوق جنزات وقمصان وكده أنا مرحتش بس أخويا بيجيب من هناك

لجو حر هاقعده من غير الهدوم
مش بمزاجك الموضوع ده الباشا شرفني في شهر 7 عايز حر إيه أكتر من كده
وكان بيلبس هدوم بس يعني مكنتش بزودها عليه يعني 3 قطع بس بالكتير
وخد بالك من التكيف والمراوح وال كلام ده
ويستحسن لو تخليه في جو كويس مش حر

الباشا فى الطريق ان شاء الله - بس انا خايف من المرحله ده.
أنا عن نفسي بحاول ادي ابني هدية لاي حد بس مش عارف :(
وعليه 2000 جنيه فالشهر غير مصاريفه

بالمناسبة موضوع إنك إنت اللي تحكم البيت الفترة الجاية دي انساه تماما
إنت هتنام على مزاجه وتصحى على مزاجه
وكمان هتشيله وتلاعبه على مزاجه مش على مزاجك إنت :)

ولا تخاف ولا حاجة إنت بتعمل كل اللي تقدر عليه وربنا مش هيحملك فوق طاقتك إن شاء الله
بس بجد موضوع النوم ده هتقاسي منه شويتين هتبتدي تحس بالسرير بعد 4 شهور وياريت لو مامته أجازة أول 3 شهور على الأقل

وبرده ماحدش هيقدر يقولك هو ليه مستحمل العذاب ده إنت لما تعيش معاه هتعرف بنفسك


ومبروك وربنا يباركلك فيه وفي مامته وفي ذريته إن شاء الله

[haytham1542]

ولا تخاف ولا حاجة إنت بتعمل كل اللي تقدر عليه وربنا مش هيحملك فوق طاقتك إن شاء الله
بس بجد موضوع النوم ده هتقاسي منه شويتين هتبتدي تحس بالسرير بعد 4 شهور وياريت لو مامته أجازة أول 3 شهور على الأقل

وبرده ماحدش هيقدر يقولك هو ليه مستحمل العذاب ده إنت لما تعيش معاه هتعرف بنفسك


ومبروك وربنا يباركلك فيه وفي مامته وفي ذريته إن شاء الله

الله يبارك فيك- و انا حقيقى متشكر علي كلامك الحلو اوى ده و مساعدتك الجميلة
و انا ابنى برده احتمال يشرف فى شهر 7 ان شاء الله وربنا يستر فى الحر
بس معنى كلامك انى مانعدش فى التكيف- انا ممكن اعمله يسحب الرطوبة فقط و لا انت رايك ايه؟
نا لي الشرف انى اتعرفت علي الاخوة هنا فى المنتدى

اشكركم جميعا