عربيات الاستيراد او استعمال الخارج

[kalmah]

السلام عليكم
انا كنت عاوز أعرف اية مةضةع عربيات الاستيراد اللي بيقولك مستعملة في الخارج او خليجي
و دية ببتجاب من فين؟
مميزاتها و عيوبها اية؟
هتكون أحسن من العربيات المستعملة في مصر ؟
ياريت كل حد عندوا معلومة و لو صغيرة يقولها عشان نستفيد

[Ahmad Allawy]

العربيات الاستيراد دي يا سيدي..
عادة و المشهور قوي بتبقي متقطعة.. العربيات اللي بتتعدم برة او بتبقي عاملة حوادث تجار الخردة بيستوردوها و عادة معظم العربيات دي لو حوادث بتبقي عاملة كيلو متر قليل قوي..
اما لو العربيات كاملة.. بتبقي معظمها في بورسعيد\..و غالبا بتكون داخلة عشان الجمارك تصريح معاقين..ودي كتير..
بصراحة ده اللي انا عارفه.. اكيد في معلومات اكتر بس استني حد يكون عارف يفيدنا..

[kalmah]

ألف شكر يا أستاذ أحمد علي درك
انا انهاردة كنت يتكلم مع واحد و قالي انها بتيجي من برة و بتفق مع حد معوق و مخلص جمارك
بس بردة مفهمتش الطريقة أوي
بس انا حاسس انها ممكن يبقيء فيها نصب ولا امان؟
و أهم حاجة تعتبر الطريقة دية حلال ولا حرام عشان التحايل اللي بيحصل؟
هوا اللي انا بدور عليها ابيزا 94
1.6 او 2.0
بس العادية مش سيستم بورش

[Akram]

العربيات دي بيستوردها تجار في بور سعيد و مابتكونش عاملة حادثة و لكن بتكون مستعملة في الخارج ,

و علشان تجيب عربية من دول لازم تشوف واحد معاق و بيروح لمكتب تابع لوزارة الصحة في جاردن سيتي و بيقدم طلب للحصول على عربية و ده بيتكلف حوالي 200ج و بيتعمل كشف طبي ليه لتحديد مدى حاجته للعربية و التجهيز المطلوب لتعديل العربية لتصبح جاهزة للإستخدام , و بيدولك ميعاد لإستلام الموافقة الإستيرادية و بعد ما تستلم الموافقة بتروح بور سعيد و هتلاقي معارض و تجار لبيع العربيات دي و اسمع ان المعارض بتبقى اغلى من التجار اللي عندهم مخازن و لما بتروح للتاجر و بتشوف العربيات الموجوده عنده و ممكن تظبط اللي شغال مع التاجر ده علشان يجيبلك العربية اللي انت عايزها بأحسن حالة و كمان بعد الشراء تتضمن ان العربية مش هتتقلب قبل ما تستلمها , و بعد ما تستلم العربية تجيبها مصر و تروح للمرور علشان ترخصها باسم المعاق و المرور بيطلب جواب بان العربية اتحولت للاستعمال للمعال و ده بيبقى عن طري ورشة في شبرا و التحويل بيتم بناء على التقرير الطبي يعني اللي عنده إعاقة في رجليه الشمال ممكن يجيب عربية اوتوماتيك و مش لازم يحصل عيها تعديل و لكن لو عربية مانيوال أو معاق في رجليه اليمين يبقى لازم يتم تعديل العربية , و بتدي الجواب اللي هتخده من الورشة للمرور فبيتم ترخيص العربية و بتبقى باسم المعاق و علشان تتحول باسمك يبقى يإما تستنى خمس سنين و ساعتها المعاق يسجلك العربية بدون جمارك أو انك تدفع مبلغ حوالي 9500 لترخيص العربية بإسمك ,
تعالي نحسبها بالأرقام , لو عربية لانوس مو99 هتجيبها بحوالي 24000 ج و هتدي للمعاق 5000ج و مصاريف نثرية و طلبات ممكن توصل الي 1500ج + 9500 ج لترخيصها بإسمك يبقى المجموع حوالي 40000ج على الأقل و لو هتجيبها من هنا ممكن تجيبها بـ 42000ج , دا غير تعب شهر أو أكتر ,
دا غير ان الموضوع محتاج تسأل فيه شيخ ثقة علشان تعرف إذا كان حلال ولا حرام ,
انا أختها من قصيرها و جبت عربية من هنا .............

[kalmah]

يالهوي الحوار طلع سحلة سودة
كل دة عشان عربية :s
انا هبقيء أحاول أجيب نمرت حد من التجار بنوع بورسعيد دول و اسألهم
لو طلع فرق كبير يبقيء هبقيء من عندهم لكن لو طلع صغير ملهاش لازمة الجوار دة كلة
و انتا رأيك اية يا أستاذ أكرام؟

[Ahmed Samy]

الموضوع ده فيه كل حاجة

موضوع سيارات المعاقين

و ربنا يوفق

[Nile_Storm]

بغض النظر عن شبهته من حيث كونه حلالا او حراما
او حتي شبهته القانونيه فهو وجع دماغ لشرا عربيه مش مضمونه و تقريبا بنفس السعر في مصر
علي الاقل لو هتجيب مستعمل في مصر هتتكلم مع صاحبها و تعرف فيها ايه
انما كده انتي بتشتري بطيخه وانت و حظك

[MeshoMicra]

السلام عليكم ورحمه الله وبركاته


شباب بما اني من بورسعيد فانا عارف كل الي بيحصل في الموضوع ده

وبصراحه كل الي قاله الاستاذ اكرم شرح وافي وسليم

بس فيه شويه اضافات ومعلومه عايز اقولهالك

---العربيات الي بتيجي من بره بتكون مخبووطه ---

قولي ليه بقي ؟؟؟

علشان التاجر يحقق فيها اعلي مكسب

لان كل لما العربيه بتكون مخبوطه سعرها بيكون اقل

يعني مثلا لو اشتري من هناك هوندا مخبوطه حتقف عليه 5000$انما لو جايبها سليمه تقف عليه 8000$


بس ده ميمنعش ان فيه عربيات بتيجي مش مخبوطه بس دي اغلبها بتبقي جايه متباعه ناس حاجزنها يعني او ناس طالبينها مش مخبوطه

بس طبعا زي مقولت كل حاجه بتفرق في السعر

بس احلي حاجه هنا ان فيه تجار كتير عندهم زمه وبيقولو ان العربيه جايه مخبوطه وكده


المهم ما علينا نقطه تانيه عايز اضيفها ان المعاق بقي بياخد دلوقتي 10.000 جنيه


وحاجه كمان ان دلوقتي تقدر تنزل بورسعيد وتشتري العربيه وتخلص اجرائتها علي طول

لا شهرين ولا حاجه

وبعدين انت مش حيبقي ليك اي دور التاجر حيخلصلك كل الاجرائات لغايه اجراء نقل الملكيه بس .......


وبجد فيه عربيات جااامده جدا جدا بتيجي من بره وبتبقي عامله كيلوات قليله ونضيفه





واي استفسار انا في الخدمه

[ASD peugeot]

عمليه مش جايبه همها وزي ما قال اكرم ممكن تكون حلال و ممكن حرام و السعر قريب جدا من ممكن تشتريها من مصر عادي من السوق بس الحاله ممكن تفرق هو ده السؤال المهم
حاله العربيه الاستيراد افضل من الاستعمل هنا في مصر

[Akram]

الفرق بسيط

يالهوي الحوار طلع سحلة سودة
كل دة عشان عربية :s
انا هبقيء أحاول أجيب نمرة حد من التجار بتوع بورسعيد دول و اسألهم
لو طلع فرق كبير يبقيء هبقيء من عندهم لكن لو طلع صغير ملهاش لازمة الحوار دة كلة
و انت رأيك اية يا أستاذ أكرم؟

انا رأي انك تشتري من مصر و بلاش لف و دوشة و شبهة حرام (ودا المفروض يكون اهم حاجة) ,
خليك في المضمون أحسن و اشتري من مصر ,
الموضوع ده بيفرق مع المعاق اللي عايز يشتري عربية ليه لإنها بتقف عليه بسعرها في بور سعيد بس و ده معناه توفير عن سعرها هنا حوالي 40% ,

على فكرة انا سمعت عن واحد اشترى العربية بالنظام ده من فترة بسيطة و حصل مشكلة في الورق (مش عارف تفاصيلها) و في الآخر العربية مركونة تحت البيت و مش عارف يمشي بيها .
مع تحياتي ,,,
أكرم

[mohamed ibiza]

انا شايف انها عملية جايبا همها جدا جدا جدا واحد صاحبي جاب جولف 3 1995 1600 سي سي وارد الخارج تكييف فتحة سقف كهربا مرايات كهربا كل الاوبشنز ما عدا ازاز كهربا ازازها عادي و جابها عاملة 50 الف كيلو الموتور لسه بيعرق ميه من الشكمان بكتالوجها مجنطة علي 55 الف جنيه الجولف هنا 1400 سي سي و مفهاش كل ده و بتعمل54 الف يبقي انهي احسن؟؟؟؟؟؟؟؟

[Xpert]

العربيات الاستيراد دي يا سيدي..
عادة و المشهور قوي بتبقي متقطعة.. العربيات اللي بتتعدم برة او بتبقي عاملة حوادث تجار الخردة بيستوردوها و عادة معظم العربيات دي لو حوادث بتبقي عاملة كيلو متر قليل قوي..
اما لو العربيات كاملة.. بتبقي معظمها في بورسعيد\..و غالبا بتكون داخلة عشان الجمارك تصريح معاقين..ودي كتير..
بصراحة ده اللي انا عارفه.. اكيد في معلومات اكتر بس استني حد يكون عارف يفيدنا..

احم احم ... اسمهم المستوردين يا بوب ... المستوردين

العمليه جايبه همها طبعاُ و خاصه لو الواحد جاب العربيه بمعرفته ... معظم لاعربيات بتبقي شركه بره و جوه و حتي لو مخبوطه الخبطه بتبقي بسيطه و مش مغيره نص زي عندنا ....
اللي انا عاوز اعرفه ايه درجه امان الورق بتاعها ! ..

[Mzeid]

طيب سؤال يا بيشو أنتم بتجيبوا العربية متقطعة جاهزة و لا كاملة و بتقطعوها هنا .. ؟!
:):)

[Ahmad Allawy]

يا بيشو.. سيبك من المسميات..
ما هما طبعا مستوردين.. مش بيستوردوا حاجة.. يبقوا طبعا مستوردين..
و بيزنس من كمان..
ومقيش احسن من البيزنس يا معلم..
ربنا يبارك و يررق

[kalmah]

1000 شكر يا رجالة اللينك اللي اتحط و ردودكم ساعدتني اني اعرف الموضوع احسن من الاول
هوا الشيء الفاضل اني ابقيء أكلم تاجر و اشوف العربية هتقوف عليا بكام بكل الليلة دية و احسبها مع نفسي