استفســــــارات ....

[pendodo2002]

بسم الله الرحمن الرحيم
===============
هما شوية استفسارات صغيرين مش هطول عليكم ان شاء الله :)
===============
1- في كذا واحد معاهم عربيات جمارك موجوده في مصر بقالها اكتر من سنه ولسا بنمر الجمرك وعادي خالص .... الفكره هوا ازاي قاعد كل الفتره دي ... حسب معرفتي ان نظام التربتك هوا مدته 6 شهور او 3 شهور ... العربيتين واحده فورد اكسبدش ودي بقالها سنه و التانيه مازدا 6 ودي بقالها تقريبا سنتين و نص ... فهل في طريقه معينه (وخصوصا اللي جايين من الخليج) انهم يدخلوا بالعربيات فترات اكبر من المصرح بها في التربتك ؟

2- كحل للخربشات اللي العيال ولاد *** بيعملوها على العربيات في واحد قال ان بيتحط اكتر من طبقه بوليش فوق الصبغ وبالتالي اي خربشه او اي حاجة بتيجي في البولش الاول و ان اللي عايز يأذي العربيه لازم يحاااارب علشان يعرف يخربشها بجد حتى لو هيخربشها بسكينه... (انا قريت عنها اعلان في الامارات بس لقيتهم بيعملوها بحوالي 3000 درهم (4500 مصري)...) فقلت الاول اسأل الكلام ده صح و لا نصب

3- لو الواحد حب يشتري عربيه قسط في مصر و هوا مش قاعد في مصر اصلا ومعندوش حسابات في البنوك المصريه ...
3-أ- في شركات بتسمح ؟ مين ؟
3-ب- ايه اقل مقدم ممكن يتدفع بحيث ان ميكونش في فايده على الاقساط ؟

4- بخصوص الناس اللي بتسافر (بر) .(علشان والدي مصمم ينزل بر السنه دي) ... ايه هيا الاجراءات و الاوراق المطلوب وتكاليف السفر بر (طبعا باستثناء البنزين)

=========================
يرجى الاجابه على الاسئلة بالقلم الازرق مع مراعاة الكتابه بخط واضح و يتم الاجابه على كل سؤال في صفحه جديده على ان يكتب رقم السؤال في عنوان الصفحه ...

والصوره دي بمناسبه اني وصلت لارض الوطن ولله الحمد
سباق جوي ما بين طيارتين مصر للطيران ...
الاولى اللي انا فيها بمحركين توربينيين من انتاج رولز رويس
والتانيه البعيده فيها 4 محركات مروحيه من انتاج جينرال الكترك
بس للأسف احنا خسرنا السباق علشان طيراتنا آخرها بتمشي 770 كيلومتر في الساعه بس ومكانش في لا تيربو ولا نايتروس ....
يلا تتعوض



(الصوره تم التقاطها بعدسه ال Air Marshal الملازم ممدوح ... وانا طبعا لطشتها منو على اللابتوب :) )
================
تحياتي

[pendodo2002]

ولا رد واحد ولا حمدلله على السلامه ولا حتى ربنا يسهلك يا عم لا من هنا ولا ايه حاجة !!!!!!!

[theking2690]

حمد الله على سلامتك بس للأسف معنديش و لا معلومه تفيدك فى اللى انت عايزه

[Xpert]

هوه اللي اعرفه ان العربيات التريبتك اللي في البلد بقالها كتير دي بتبقي بتاع واحد و بيرجع يبيعها علي الورق لابنه مثلاُ بعد ما المده تخلص .. انا بيني و بينك هاتجن و اعرف ايه الحكايه دي بالظبط علشان انا معايا جنسيه تانيه و عاوز اعملها الحركه دي ..

[Xpert]

http://www.nilemotors.net/Nile/showthread.php?t=26168

[khalid_adel]

انا اللي اعرفه ان العربيات الجمرك اللي بتقعد مده دي لحالات خاصه واذكر منها لو طالب خليجي مثلا بيدرس في جامعه مصريه وكده ده من حقه يبقى معاه عربيه جمرك طول فتره الدراسه بس بيدفع برضه مبلغ محترم وفي حالات تانيه بس انا مش فاكرها اوي

[WalidAdel]

الحوار بتاع العربيه الجمرك دي فعلاً زي ما الاخ خالد قال واحد اجنبي و بيدرس هنا من حقوا ان يكون معاه عربيه طول فترة الدراسه و تقريباً كاهن زمان بيدفع 2000 كل ثلاث شهور و 3000 في الثلاث شهور بتوع الصيف
واحد صحبي كان بيدفع كده

تاني سؤال معرفش عنوا حاجه

3- هوه تقريباً المشكله ان لازم تكون قاعد في العنوان اللي حتكتبوا علشان الاستعلام و كده و بييجوا علي البيت كمان و لازم تقابلهم اعتقد او بيسال في الشارع كده يعني لكن حوار الحساب في البنك معتقدش انه مهم لانهم بيفتحوا حساب باسمك في البنك اللي حتقسط معاه علشان تعمل ايداع للقسط

4 معرفش بردوا عنها حاجه

انا كده شكلي حعدي بالعافيه مجوبتش غير نص الاسئله بس ربنا يستر بقي

[Sharky]

إحنا عندنا فى الشركة عربية تويوتا لاندكروزر بقالها أكتر من 4 سنين جمرك و دا نتيجة لإننا واخدين مشروع لشركة بترول بترول فبتدينا تصريح إننا ندخل عربية جمرك بإسم الشركة بتاعتنا لصالح المشروع و بتفضل جمرك طوال فترة المشروع و صيانته