حسبي الله ونعم الوكيل

[hpxp]

الحمد لله تروسيكل اداني بوسه مشبك من ورا
كنت بوصل اختي لبيتها وانا بقي في شارع مؤمن دخلت من الملف واذا بتروسيكل طاير من ورا لبس فيا قمت سادد عليه وموقف الشارع كله وزعقت وووووو
المهم ركنت علي جنب
وهوا ركن علي جنب ونزلنا لبعض بقي
بيقلي
انا علي باب الله
قلتله وانا مالي
قالي ياعم انا بلم بلستك من الشارع
برضه وانا مالي وهنا فتحت فيه بقي وانت جاي جاري وخبطني من ورا وكسرتلي الفانوس وخربشت الرفرف حلو (جاب الصاج وبالكمبوند مش راضي يروح )
.... راحت اختي نازله لاء مش نزلت وبس نزلت بابنها الصغير هنا بقي مسكت نفسي قبل ما كنت هشتبك
را الراجل قالي ربنا يخليلك مراتك وعيالك وووووو وكان عايز يكلني في الكلام
قلتله
بص انا عايز 700 جنيه ثمن الفانوس
طب انا علي باب الله والله ومش معايا وووو واقسم بالله وووو
قلتله تتصرف تقب تغطس تسرق تقتل تجبهملي
ولفيت اكلم واحد قريبي لقيت عدي في ثانيه وطار قمت طاير وراه
عملت تلفون وعرفت ان الفانوس ب 450 قلت بس علشان جري والله لجيبه واعلقه واخدهم منه (كنت هسيبه في الاول )
وهووب طاير وراه لقيت عربيه جت حودت من قدامي وقفت لاء وخد الملف علي مرتين جيت اعدي بقي القي الراجل فص ملح وداب
لفيت فللل الجامعه خرم خرم واتصلت بصحابي ونشرتهم في القاوميه وطلعت انا وواحد قريبي علي الجامعه والراجل معرفش عمل ايه خفي نفسه
بس بصراحه انا مضايق من نفسي
لاني اما طلعت اجري وراه
اختي صوتت وقالت نزلني قمت زي الاهبل في نص الشارع ومخليها مكمله للغشام المقطوعه والظلمه مشي
انا مش عارف كان كل همي اجيبه اخبطه بالعربيه ولا اعمله عاهه مستديمه
لانه حمار كان بيجري وبيقلي معييش فرامل
هوا كان قالي علي كهربائي بقي في الغشام وروحت سالت وطلع فعلا موجود هل اروح للكهربائي ده واخليه يدلني علي التروسيكل واخد منه قي بدراعي
ولا يكفي انه هزقته قدام مراته وبنته وخليت منظره زي ........ المحروق
ولو شفته تاني اعمل فيه ايه علشان انا حالف لهضربه وهكسر التروسيكل فوق نفوخه
معلش اصلي كنت مخنوق فقلت افضفض معاكم
رائيكم ايه في تصرفي
لان في ناس شافت اني اتصرفت غلط منهم ابن عمتي

[S O P H O S]

يا باشا متخليش نفسك فوقت تعصب
تعمل خطأ اكبر من المشكلة الي انت فيها
وربنا يعوضك خير عن الي حصل بس الدنيا ليل والي معاك اهم منه ومن 100 فانوس ..

[NineVision]

هو حضرتك اتصرفت جزء صح وجزء غلط اللى هو انك تجرى وراه
هقول لحضرتك حاجة انا لما بعمل حادثة وناوى اخد حقى ياما بشوف رقم العربية ياما بقوله بطاقتك وساعتها هقرر هعفو ولا هاخد حقى وافضل شئ سامح لو اللى ودامك يستحق يمكن تتوضع فى نفس الموقف وميكونش معاك فلوس او اى سبب اخر ومعاك بردك مراتك وعيالك ساعتها موقفك هيكون ايه ؟؟
اما حكاية تجرى وراه وحتى لو كنت جبته ساعتها كان هيكون فى واحد منكم هيروح المستشفى عشان ساعتها انت وهو الادريالين هيكون عالى جدا

[AHMED_DINAMO]

قدر الله ما شاء فعل يا باشا وعلى رأى الاسطى زلطه يا بخت من قدر وعفى

انت صح انك ظبطته فى نص الشارع كده لكن اخت حضرتك وابنها اهم من العربيه نفسها مش الفانوس بس

رأيى وجايز لانى عصبى اعرف مكانه وروحله قوله انا عرفت مكانك بس انا مسامحك اهه تاخد فيه ثواب برده وجايز لو عملت كده الرجل ده يعقل على ايدك ولا حاجه وقدر الله ما شاء فعل

[Khaled Lanos]

هدي نفسك بس ياباشا فداك 1000 فانوس..انا شايف انك غلطان بصراحة انك نزلت اختك وابنها في نص الشارع في الضلمه..كان ممكن لاقدر الله يحصل لهم حاجة وساعتها كنت هتقول في 60 داهية العربية كلها.

عموما أنا رأيي مثلا انك ترحلو وتفهمه ان اللي عملو ده غلط..بس تفهموا بلهجة شديدة..ممكن ربنا يهديه على ايدك..وفي نفس الوقت تقوله انك مسامحه متعرفش ظروفه يمكن تكون صعبه.

وممكن بردو تسامحه بدون ما تروحلو ولا بتاع..الله اعلم ساعتها لما ترحلو ايه اللي ممكن يحصل.

عموما الاختيار ليك في الآخر اذا كنت عايز تسامحه ولا لأ.

وتذكر حديث الرسول صلى الله عليه وسلم:

عن أبي هريرة رضي الله عنه أن رسول الله صلى الله عليه وسلم قال (ليس الشديد بالصرعة، إنما الشديد الذي يملك نفسه عند الغضب) متفق عليه.

[HAITHAM1985]

من أفسد شىء فعليه إصلاحه .......... هل تتعارض مع قبول العوض !!!!!

هوا ده اللى عامل تربنة للشعب المصرى ......... رأيي إن مفيش حاجة إسمها عوض ..... كل واحد يفسد شىء عليه واجب قانونى وأخلاقى إنه يرجعه لأصله

الموضوع بسييييييييييييط ......... بس حركاااااات مصرييييييييييين

متضايقش نفسك قوى كده يا بلدياتى وإحتماااال يكون دخل ناحية المصرية بلازا

[KemozTanta]

ربنا يعوض عليك ، طالما الواد هرب ، متحرقش خلاص في دمك.
وبعدين موقف صعب برضة لما حد يخبطك ويقولك انا غلبان ومش معايا ادفعلك ، اجيب منين واعمل اية
هتعمل اية وقتها..؟؟ هتضربة عشان فقره !
لكن لو واحد مقتدر او واحد قليل الادب ومعتذرش ع الاقل ، يبقي حلال فيه اى حاجة وقتها
عموما اللي حصل حصل ومتتعبش نفسك انك تدور عليه ، وغلطان انك تنزل اختك وابنها في حته زي دي كدا بس واضح انك كنت متعصب ومتنرفز جداً.

[المنسي]

ياما بنخبط ونتخبط ومرة ريحت على سواق تاكسي وانا راجع بظهرى ونزلت كلمته والراجل قاللى خلاص ومرة تانية الطريق وقف وجه واحد ب 128 وراح طرررررررررررررررراخ خبطنى وطبقلى باب الشنطة من ورا ونزلت وهلللت وقالى انه ميكانيكيى ودى عربية زبون بصراحة سيبته ومشيت واستعوضت ربنا وزى مالمثل بيقول حاجة بتفدر حاجة يعني انت اتكسر عندك الفانوس حتى لوكان ب 1000 جنيه احسن ولا لاقدر الله كان حصل لك حاجة استعوض ربنا ومتعملش عقلك بعقلهم

[semi]

انت كبرت الموضوع اوي وكان كفاية انك هزأت الراجل وفرجت عليه الدنيا
وبقولك كنت تسيبه من الاول لان اكيد مش معاه 100 جنيه على بعض في جيبه
وطالما مش قصده خلاص كنت تعديها لان ممكن انت كمان تخبط اي حد من غير ما تقصد
وينزل ويعملك مشكلة ويكون قليل ادب فيشتمك ويهزأك

[khaled_legend]

قدر الله و ما شاء فعل و قضي اخف من قضي و الحمد لله

[hpxp]

هو حضرتك اتصرفت جزء صح وجزء غلط اللى هو انك تجرى وراه
هقول لحضرتك حاجة انا لما بعمل حادثة وناوى اخد حقى ياما بشوف رقم العربية ياما بقوله بطاقتك وساعتها هقرر هعفو ولا هاخد حقى وافضل شئ سامح لو اللى ودامك يستحق يمكن تتوضع فى نفس الموقف وميكونش معاك فلوس او اى سبب اخر ومعاك بردك مراتك وعيالك ساعتها موقفك هيكون ايه ؟؟
اما حكاية تجرى وراه وحتى لو كنت جبته ساعتها كان هيكون فى واحد منكم هيروح المستشفى عشان ساعتها انت وهو الادريالين هيكون عالى جدا

شكرا يا باشا علي ردك
بص انا طبعتي هادي جدا وعمري ما زعقت مع حد واحيانا بسيب حقي بس بقالي فترة مش عارف كان مالي كان ركبني 8000 عفريت ازرق وبهب في اي حد (يمكن لضغوط الشغل والكليه) وامبارح بقي ساعه اما خبطني زي ما تكون القشه الي قسمت ظهر البعير هبيت فيه وكان فاضلي تكه وهجيب كلبش الدريكسيون وكونت هضربه لولا قريبي الي كان موجود كان الرعبيه الي قدامي كل شويه يهدني ويبعدني
وبالنسبه لموقف زي ده حصل معاياا
بس نزلت للراجل قلتله انا غلطان وانا تحت امرك بالرغم انه زعق حبتين بس من احترامي ليه واعترافي بغلطي قلي لولا انك محترم انا كنت بهدلتك
انما ده بكل بجاحه او ما نزلت بسيطه بسيطه مفهاش خربوش
قلتله والفانوس والرفرف يا روح......
واما حكايه واحد فينا يروح المستشفي احب اقولك صحابي كلهم كانو في المنطقه بيدوروا معايا وكنا هندفنه اقل واجب

قدر الله ما شاء فعل يا باشا وعلى رأى الاسطى زلطه يا بخت من قدر وعفى

انت صح انك ظبطته فى نص الشارع كده لكن اخت حضرتك وابنها اهم من العربيه نفسها مش الفانوس بس

رأيى وجايز لانى عصبى اعرف مكانه وروحله قوله انا عرفت مكانك بس انا مسامحك اهه تاخد فيه ثواب برده وجايز لو عملت كده الرجل ده يعقل على ايدك ولا حاجه وقدر الله ما شاء فعل

شكرا ليك ياباشا
ومعاك حق والله واتصلت بيها اعتذرتلها وكانت زعلانه مني اوي اصلي زعقت معاها لما هي اتصلت بيها وهبيت فيها وبعد اما روحتلها اول كلمه قالتهالي كده تسبني امشي لوحدي
وعلي فكرة رائ من رئيك والله بس خلاص بقي انا دعيت ربي ان كان فعلا غلبان فيارب انا مسامحه وان كان قادر يصلحلي العربيه وقلب فايرب خدلي حقي منه
واحنا في ايام مفترجه
بس يارب عطرني فيه

هدي نفسك بس ياباشا فداك 1000 فانوس..انا شايف انك غلطان بصراحة انك نزلت اختك وابنها في نص الشارع في الضلمه..كان ممكن لاقدر الله يحصل لهم حاجة وساعتها كنت هتقول في 60 داهية العربية كلها.

عموما أنا رأيي مثلا انك ترحلو وتفهمه ان اللي عملو ده غلط..بس تفهموا بلهجة شديدة..ممكن ربنا يهديه على ايدك..وفي نفس الوقت تقوله انك مسامحه متعرفش ظروفه يمكن تكون صعبه.

وممكن بردو تسامحه بدون ما تروحلو ولا بتاع..الله اعلم ساعتها لما ترحلو ايه اللي ممكن يحصل.

عموما الاختيار ليك في الآخر اذا كنت عايز تسامحه ولا لأ.

وتذكر حديث الرسول صلى الله عليه وسلم:

عن أبي هريرة رضي الله عنه أن رسول الله صلى الله عليه وسلم قال (ليس الشديد بالصرعة، إنما الشديد الذي يملك نفسه عند الغضب) متفق عليه.

شكرا يك ياباشا
وانا اكتر واحد بارد في حورات العصبيه دي
بس مش عارف من ساعت اما خسرت في شغلي ولما اي حد ينطق بكلمه بهب فيه حتي لو بيصبح او بيمسي
ومعاك حق انا شايف نفسي استاهل ضرب الجزم اني نزلتها بس مكنتش في وعي سعاتها كان كل همي اجيبه اخبطه العربيه او اعلقه في فلكه سعتها المهم كنت عايز اجيبه
واان شاء الله مسامحه علي شان خاطر الايام المفترجه الي احنا فيها بس
بس لو قابلته بقي مش ضامن نفسي الصراحه

من أفسد شىء فعليه إصلاحه .......... هل تتعارض مع قبول العوض !!!!!

هوا ده اللى عامل تربنة للشعب المصرى ......... رأيي إن مفيش حاجة إسمها عوض ..... كل واحد يفسد شىء عليه واجب قانونى وأخلاقى إنه يرجعه لأصله

الموضوع بسييييييييييييط ......... بس حركاااااات مصرييييييييييين

متضايقش نفسك قوى كده يا بلدياتى وإحتماااال يكون دخل ناحية المصرية بلازا

حبيبي يا بلادياتي ومعاك حق والله انا اكسفت اقول للراجل ان الماده 36 او 136 بتقول ان من اتلف شئ عليه اصلاحه
غير كده من الدين انه يصلحه هو دخل فلل الجامعه من الملف الي فوشها في شارع مؤمن وطار من الشارع ده وروحت علي الظباط الي قاعدين قدام بيت مرسي قالولي مفيش تروسكلات عدت من هنا هوا ممكن يكون لف وططلع علي الشارع تاني بس منين هموت واعرف دا انا لفتها خرم خرم والله بس هوا ممكن فعلا طلع من فلل الجامعه علي المصريه بلازا مجتش في بالي
بس متقلقش مصير الحي يتلاقي
وشكرا ليك يا زعيم يا بلادياتي :-)))))))

ربنا يعوض عليك ، طالما الواد هرب ، متحرقش خلاص في دمك.
وبعدين موقف صعب برضة لما حد يخبطك ويقولك انا غلبان ومش معايا ادفعلك ، اجيب منين واعمل اية
هتعمل اية وقتها..؟؟ هتضربة عشان فقره !
لكن لو واحد مقتدر او واحد قليل الادب ومعتذرش ع الاقل ، يبقي حلال فيه اى حاجة وقتها
عموما اللي حصل حصل ومتتعبش نفسك انك تدور عليه ، وغلطان انك تنزل اختك وابنها في حته زي دي كدا بس واضح انك كنت متعصب ومتنرفز جداً.

شكرا ليك ياباشا
بس مش هضربه علشان فقرة ولا حاجه بس هوا اما يبقي الطريق ماشي حارة واحده بس يقوم هوا يمشي في حارة البارك ويعدي الناس كلها ويجي يخبط فيا انا علشان الباشا بيجري ومستعجل يبقي عايز يتربي ولاء؟
بس هوا قرصه ودن جامده حبتين تلاته علشان يبقي ماشي هادي علشان حجه الفرامل فصلت ي متتقلش تاني
وبالنسبه لموضوع اني متنرفز فده وصف ضعيف علي الي كنت فيه امبارح وانا ماسك الدريكسيون وطاير ولشغال بقول هقتله هقتله وغير كده والدي اتصل وغلط قدام والدي في الكلام من شده العصبيه

انت كبرت الموضوع اوي وكان كفاية انك هزأت الراجل وفرجت عليه الدنيا
وبقولك كنت تسيبه من الاول لان اكيد مش معاه 100 جنيه على بعض في جيبه
وطالما مش قصده خلاص كنت تعديها لان ممكن انت كمان تخبط اي حد من غير ما تقصد
وينزل ويعملك مشكلة ويكون قليل ادب فيشتمك ويهزأك

هوا فعلا انا كبرت الموضوع ولو كان الراجل مجريش انا كنت هجيب النجده كمان
هوا حمار الطريق كله ماشي حارة واحده وجاي هوا ماشي من علي اليمين وجاي يلبس فيا في الشمال وانا كنت لازم اعمل كده علشان يتربي لاني لو سبته هيخبط عربيه حد غيري وووو الخ
وانا الحمد لله كنت خبط واحد قبل كده بس ذانا نزلت محترم وركبت عربيتي تاني محترم لاني اول ما نزلت قلته انا اسف انا غلطان وضوف حضرتك انت عايز ايه وانا اعملهولك زعق حبتين
بعديها قالي لولا انك كنت محترم انا كنت بهدلتك
هي القصه قصه احترام وثبات علي موقف مش يخبط ويبقي مش عايز يدفع ولا مليم ويكابر
وبيقلي كبير الي حصل 10 جنيه ولقيته بيطلعهملي فضه قلتله لاء هنروح لسعيد الكهربائي بتاعك ه وبرضه هاخد منك 700 جنيه

قدر الله و ما شاء فعل و قضي اخف من قضي و الحمد لله

شكرا ليك ياباشا ومعاك حق والله

[hpxp]

يا باشا متخليش نفسك فوقت تعصب
تعمل خطأ اكبر من المشكلة الي انت فيها
وربنا يعوضك خير عن الي حصل بس الدنيا ليل والي معاك اهم منه ومن 100 فانوس ..

شكرا ليك ا باشا ومعاك حق والله
بس مكنتش عارف مالي امبارح الا اجيبه

ياما بنخبط ونتخبط ومرة ريحت على سواق تاكسي وانا راجع بظهرى ونزلت كلمته والراجل قاللى خلاص ومرة تانية الطريق وقف وجه واحد ب 128 وراح طرررررررررررررررراخ خبطنى وطبقلى باب الشنطة من ورا ونزلت وهلللت وقالى انه ميكانيكيى ودى عربية زبون بصراحة سيبته ومشيت واستعوضت ربنا وزى مالمثل بيقول حاجة بتفدر حاجة يعني انت اتكسر عندك الفانوس حتى لوكان ب 1000 جنيه احسن ولا لاقدر الله كان حصل لك حاجة استعوض ربنا ومتعملش عقلك بعقلهم

فعلا ياباشا معاك حق والله
هوا الواحد اما يبقي محترم بيجبر الي قدامه يحترمه
وفي نفس الوقت بتلاقي اشكال ضاله كده كده علي بعضها متجبش 50 جنيه بتبها تمشي
وشكرا

[beshomilan]

انا حاسس بيك فكل كلامك
والمشكله ان المصايب بتيجى للواحد وهو على اخره ويكون هينزل فعلا يرتكب جنايه مع اللى قدامه وخصوصا لما تلاقيه بيبجح كمان
معلش كل عصبيتك ونرفزتك دى معلومه مش مجهوله
ومصدرها التعب والهم والقرف من احوال البلد واللى الواحد بيشوفه وبيسمعه ويقراه كل يوم ويخلى مزاجه زى الزفت ومش طايق يعمل اى حاجه
اهدى كده واستغفر الله وكل شىء هيكون كويس وانسى عشان تقدر تعيش ياصاحبى

[drmagieed]

قدر الله ما شاء فعل ... وإعتبر كأنك صحيت الصبح لقيت العربية كدة وما تعرفش مين خبطها ... والله لو عملت زيك لأقضي كل يوم في خناقة لأن الشوارع ما عدتش مستحمله ناس مش عربيات وتكاتك وموتسيكلات وعجل وكارو وتروسيكلات ... إلخ

[hpxp]

انا حاسس بيك فكل كلامك
والمشكله ان المصايب بتيجى للواحد وهو على اخره ويكون هينزل فعلا يرتكب جنايه مع اللى قدامه وخصوصا لما تلاقيه بيبجح كمان
معلش كل عصبيتك ونرفزتك دى معلومه مش مجهوله
ومصدرها التعب والهم والقرف من احوال البلد واللى الواحد بيشوفه وبيسمعه ويقراه كل يوم ويخلى مزاجه زى الزفت ومش طايق يعمل اى حاجه
اهدى كده واستغفر الله وكل شىء هيكون كويس وانسى عشان تقدر تعيش ياصاحبى

شكرا ليك يا باشا
ومعاك حق والله من ساعت ما خبطني تاكنه رج زجاجه البيبسي قمت فاير في وشه
والله قاعد النهارده بهدي اعصابي علشان وقفه عرفه

قدر الله ما شاء فعل ... وإعتبر كأنك صحيت الصبح لقيت العربية كدة وما تعرفش مين خبطها ... والله لو عملت زيك لأقضي كل يوم في خناقة لأن الشوارع ما عدتش مستحمله ناس مش عربيات وتكاتك وموتسيكلات وعجل وكارو وتروسيكلات ... إلخ

حبيبييييييييييييييييييييييييييي يا دكتور
معاك حق والله
يلا عوضي علي الله
كل سنه وحضرتك طيب يا دكتور