السايس يسايسني...فما رأيكم ؟؟

[toty_305]

-بسم الله الرحمن الرحيم

-الوضع كاﻵتي:-شغلي في مصر الجديدة في مكان زحمة و فيه 3 شوارع ممكن أركن فيهم و فيه زحمة جامدة على الركنة في كل شارع مما أدى لوجود 3 سايس واحد في كل شارع.

-بروح مش بلاقي مكان بركن بعيد شوية عادي بالنسبة ليا بحب المشي :d المهم السايس قعد يا باشا و مش يا باشا و قعد يحور قصه بيحور بيها على الناس في المكتب عن سرقة السيارات بعدين راح مظبطلي مكان فوق الرصيف بعدين بدأ يطلب فلوس بقى بالشهر عشان هو راجل مهم و له إلتزاماته :d ( عايز 80 جنية :019f3b~14:)

-المهم بردو بقول أني أحافظ على العربية من القلق و بتقف في الظل و كده و أدفع.. أو أمشيها باليوم ولا أنخدع و أطاطي لهذا السايس اللعين

رأيك يهمني...عايز أسمع آرااااء.

[amr011111]

طالما المكان زحمه يبقى هتضطر تركن مع سايس
الا لو فيه مكان بعيد شويه وفاضى فاركن فيه مع تأمين السياره
ان العربيه يكون فيها قفل وايموبلايز
ومتزعلش لو لا قدر الله اتسرق منها العلامات او الطاسات

[akmm]

سايسه وراضيه ...... هتطمن على العربيه بدل ماتدخل معاه في مشاكل وترجع تلاقى لاقدر الله حاجه مش كويسه في العربيه انتقاما منه فيك .... ولحد ماتزول غمه البلطجه اللى في البلد .

[toty_305]

-انا بقول برده راحة البال و لو العربية اتقلبت هخسر كتيير...انا احسن حل امشيها باليوم و خلاص ؟؟؟

[أسامه الحسيني]

حاميها حراميها - يا تدفع وامر الى الله لتكون مهدد بالسرقة حاجة تحير بس لو انت بتركن فى مكان فية حركة كتير وناس رايحة جية ما تقلقيش عليها من السرقة - وربنا الحافظ

[toty_305]

-هحاول أمشيها باليوم أعتقد كده أقل خسائر هديله 3 جنيه مثلا و أشوف أيه نظامه و لا أدفع ال80 خلاص -_-

[misho2008]

80 جنية كويس

[SAMEH_FOUAD]

انت لو حسبتها على 24 يوم مثلا لو عندك جمعة وسبت اجازة , هتلاقى انك فى اليوم بتدفع تقريبا 3.5 جنية , يعنى هية هية تقريبا

وممكن تلاقية رخم عليك فى يوم ويقولك هات 5 جنية ياباشا

عموما انا من رأى تديلة ال 80 جنية افضل بس اهم حاجة يكون هو اللى موجود بأستمرار ويحافظ عليها

[Hazeeeeem]

خليك في الامان احسن ..
هو مش هيقدر يعمل حاجه .. بس برضو عشان ماتبقاش قلقان

[ehab_hamed]

انا متهيا لى بالشهر احسن وتريح دماغك وتبقى مطمن على العربية. المهم فعلا انه يبقى نفس الشخص موجود على طول مش كل يوم تلاقى واحد مختلف وتقعد تفهم فيه بقى انك دافع بالشهر.

[toty_305]

-هو فعلا الراجل ثابت يوميا و بتكون راكنه جنبه بالظبط و كمان ممكن أخليه يبقى يغسلها و كده

-بالشهر أريح و هضمن و لاءه ليا :d

- شكرا يا رجالة على الردود جميعا

[محمود سامح]

مدام هو طلب يبقى الان تدفع وريح بالك احسن

[ahmedfathi]

السايس ده عباره عن بلطجى بيأخد منك فلوس بالادب وبرضاك للاسف
ادفع له احسن ما دام بتركن هناك كل يوم

[Shido]

بالظبط..... بقيت شغلانه البلطجيه و طبعا مافيش امن يلمهم. امبارح عند مرور التجمع لقيت 3 منهم قال بيركنو الناس.... طبعا اللي راح هيعرف ان الدنيا هناك فاضيه خالص
بص انت اديله 50 جنيه و شوفه رده بس حاول تمسك في موضوع ال 50 ده ان ماكانش 40 كمان جرب مش هتخسر حاجه

[ahmed sa3ed]

فى السويس هنا نعمه تقريبا الشغلانه تعتبر معدومه والواحد بيركن فى اى حتى وفى اماكن كتير للركنه

بس فى موضوعك دا حاول تبقى بالتراضى بينك وبينوا بس حاول تقلل ال 80 دول