بتغسل عربيتك إزاي وفين وبكام؟؟؟

[goodwave]

السلام عليكم

بصراحة موضوع ممكن يكون بسيط بس بيشغلني شخصيا! انا اشتريت عربيتي من شهر ونص ويمكن غسلتها مرتين بس وذلك لأنني:

1- ما بيعجبنيش شغلهم في البنزينة . تحس انهم بيشتغلوا الواحد ويا بية ويا باشا ويلهف على الاقل 5 جنية فوق فاتورة البنزينة وماعملش حاجة إلا رش شوية مية!

2- الغسيل الداخلي للسيارة زي الزفت! نفسي اشوف واحد بيمسح مش حقول بيغسل العربية بضمير من جوة مش بس شوية هوا مضغوط ويعفر الدنيا وخلاص!

3- في ناس تقول لأ انت لازم تبقى واقف على ايدة وتقوله يعمل اية! طب قولولي انتم اقولة يعمل اية؟ وهل لازم اخد معايا بعض المستلزمات لكي يستخدمها العامل في البنزينة؟

4- في حد متعود يغسل عربيتة بنفسة ولو في بيغسلها ازاي واية الادوات السليمة التي يجب ان تستخدم!

"معلومة طريفة"
انا المدير بتاعي نرويجي وهو بينظر لموضوع غسيل العربية في مصر كظاهرة لمنتهى الرفاهية لانة ببساطة في اوروبا مفيش حاجة اسمها ان حد يغسلك عربيتك! شوفتم احنا شعب مرفه إزاي؟

في انتظار مشاركتكم

[Eng.Ahmed]

المشكله ان هنا فى مصر لو وقفت تغسل عربيتك فى مكان حد يعرفك فيه عند البيت مثلا هتلاقى كل الناس واقفه تتفرج عليك و مستغربه جدا كانك بتعمل مصيبه او حاجه عيب

[Hossam_Hassan]

أولاد الجيران - تربية أمريكانى - عملوا مشروع لغسيل سيارات الشارع، العربية 30 جنيه فى الشهر و بتتغسل 4 مرات جوه و بره زى الفل و مع مسحة البواب اليومية العربية بتبقى كويسه على طول.

[goodwave]

اقسم بالله مشروع عظيم ومربح

وياريت كل اولادنا عندهم العقلية المتفتحة دي!

[أبو عبدالله]

بص يا سيدي

اولا هقولك على الادوات الأول :

1- مكنسة كهربائية بتاعت السيارات ( او بتاعت البيت بس هتنزلها تحت في الشارع )
2- فوطة جلد بتاعت الزجاج ودي رخيصه بخمسة جنيه او اللي بتيجي بتاعت العربيات ودي غالية حوالي 25جنيه
3-فوطة قماش تكون بفروة قطن
4- شامبو او صابون التنظيف السجاد علشان ده اخف صابون
5- زجاجة اسبراي صابون لقماش التنجيد وللسجاد وفرش السيارة

[أبو عبدالله]

حذف للتكرار

[Abonora]

بص يا سيدي انا من المهوسيين بتنظيف العربيات وساعات بنزل انا واخواتي الصغيرين علي العربيتين بتاعتي وبتاعة والدتي وهاتك يا نظافة جوه وبرة لحد ما يبقوا فابريكا بس الكلام ده بعملة في الشروق (بيت الحاجة) يعني وسع وهوا وشمس وكل واحد في حالة بس استحالة اعمل الكلام ده في شارعنا (عين شمس) والا هتلاقي الناس زي ما بيقول المهندس احمد بتتفرج عليك كانك حاوى

الخلاصة انك لو مش ساكن في مكان زي الشروق او معندكش جراج خاص تقدر تعيش فيه حياتك مع العربية يبقي تعمل الاتي

كل شهر (حسب معدل استخدامك) تروح بنزينة تغسل العربية جوا وبرة بشكل عادى مع انك تقف علي ايد الناس عشان اقل حاجة ممكن بالبلاور الهواء يطيرلك مسمار او غطا حاجة ومتلاقيهاش ده غير انهم ممكن يطنشوا عن حاجات وتراضي الناس من 1 جنية ل 2 جنية علي الاكثر

كل 3 اشهر الي 6 اشهر غسيل كامل للعربية فوق وتحت وجوة وبرة وموتور (لو انجيكشن ممكن تغسلة بجاز بس تكون العربية باردة وتكون عارف اماكن الحساسات او الاامن انك تغسل بالفوم وانت اللي تشترية بحوالي 20 جنية العلبة)


لما تخلص النظافة استخدم الاتي
1- سبراي برايت لتلميع الفبر والاكصدامات (اللي مش بلون العربية) او جلد التابلوه
2- علبة شمع تيرتيل واكس (سلحفة) وده علشان تشميع العربية
لتفاصيل عملية تشميع العربية اقرا اللينك ده

http://www.nilemotors.net/Forum/viewtopic.php?t=1663&highlight=%C7%E1%D4%E3%DA

ممكن كمان تجيب بولش او كومبوند وده لازالة اثار الحكات والبوية الناتجة عن التصادم او الخرابيش كمان فيه بولش بلون العربية او قلم الدوكو

الخلاصة اما انك يكون عندك مكان لتنظيف العربية بنفسك وساعتها هتعمل كل حاجة احسن من اي حد او تعمل الشغل الاساسي في مكان زي البنزينة والباقي تعملوا بنفسك زي نظافة التابلوة والكاوتش وتشميع العربية

[aboalm]

سؤال ظريف و موضوع دمه خفيف انا شخصيا باغسلها فى البيت عندى المكان و ماحدش بيتفرج عليا الحمد لله
لو حبيت اعسلها بره ده بيكون كل مده طوووووووووووويله تقريبا قبل الفحص يعنى 3 سنيين وقتها بىق الراجل بتاع المغسله مش محطة بنزين على فكره وقتها بقى بياخد 50 جنيه بس العربيه بتكون انضف من اللى خارجه من المصنع
سؤال بقى للفاضل ابونورا منين اجيب الفوم بتاع الموتور ؟

[goodwave]

الله ينور يا ابو نورا

ومتشكرين يا استاذ أبو عبد الله

[hazem_khidr]

انا عن نفسي اوقات كتير بقف اغسل العربيه في الشارع عادي ولا بيهمني اي حد .

[Karim_Monir]

انا شخصيا كنت بغسلها في البنزينة ب 12 جنية جوه وبرة وادي الولد 5 جنية يظبطها

وبعد كدة اجيب ال سائل بتاع التابلوة واقف في اي حتة جانبية اعمل التابلوة والببان والجلد عشان بتقف في الشمس كتير9 ساعات تقريبا (الله يرحم ايام العاشر كانت بتقف في الجراج)
المهم ربنا رزقني ببواب شاطر وبيفهم وواعي وبيعرف يسوق كمان
المهم علمتة يعمل الحاجات دي ويلمع التابلوة والببان والجلد الداخلي وكل حاجة وزودتلة شهريتة وبرضه اقل ن اللي كنت بدفعة في البنزينة

المكونات زي ما قال ابو عبدالله تمام بس انا عشان محسوك حبتين في العربية جبت صابون فورميلا مخصوص للعربية وده اللتر لو بتستعملة بالعقل ممكن يقعد من 6 شهور لسنة حسب كثافة الغسيل
ده صابون امن علي بوية العربية (للاسف امريكي ) مالقتش اي نوع غير الزجاجة 1 لتر ب 20 جنية بيحط في الغسيل قيمة نص فنجان علي 3 لتر مية يغسل بيهم العربية
اكتر ميزة لاحظت انه مش بيجير علي المناطق السوداء او الجنوط زي ما كان بيعمل الصابون السايل او الشامبو
لانهم كانو بيطفوا لمعة العربية

انا جبتة من بنزينة وطنية اللي في امتداد الاتوستراد وكان في انواع تانية بس مش للغسيل المتكرر
بس اكتر حاجة لفتت نظر نوع بيشيل الحشرات اللي لزقت علي الازاز الامامي وده بيتط في خزان مياه الزجاج عشان يحلل الحشرات دي واللي بيسافر علي طرق زراعية كتير هايعرف قيمتة وان الصابون العادي ما بيشيلش الحشرات الميتة والهاموش ده

[modux]

كنت فاكر اني انا لوحدي اللي بعمل كده :P

انا علي طوول بغسل العربية بايدي بس لما الاقي وقت

مش بتردد و انزل اغسلها و ساعات كمان بنزل اصلح فيها حاجة

او اركب حاجة جبتها جدبد زي سي دي ولا سماعات

كده يعني
بكون في قمة متعتي

[nabilaly]

والله ياجماعة انتو منتهى اللذة كل يوم الواحد بيتعلم منكم حاجة مفيدة شكرا لكم جميعا :D

[Abonora]

سؤال ظريف و موضوع دمه خفيف انا شخصيا باغسلها فى البيت عندى المكان و ماحدش بيتفرج عليا الحمد لله
لو حبيت اعسلها بره ده بيكون كل مده طوووووووووووويله تقريبا قبل الفحص يعنى 3 سنيين وقتها بىق الراجل بتاع المغسله مش محطة بنزين على فكره وقتها بقى بياخد 50 جنيه بس العربيه بتكون انضف من اللى خارجه من المصنع
سؤال بقى للفاضل ابونورا منين اجيب الفوم بتاع الموتور ؟

ابو علم بخصوص الفوم ممكن تجيبوا من :

- التوفيقيه ( وهناك فيه ناس بتبيع بسعر الجملة ) مكان التوفيقية بين ميدان رمسيس ودار القضاء العالي

- البنزينات ( On the run) علي الاخص بس هيبقي غالي شوية ممكن يوصل ل 30 جنية
- شارع دمشق

[Nader]

انا بغسل العربية في محطة شل غسيل شامل ببلاور ومكنسة كهربائية من الداخل ومن الخارج بفوم واختياري غسيل يدوي او

بالمكنة ومن تحت بصابون والماتور اختياري وفي الاخر بيجي واحد وينشف العربية وينضف الزجاج من الداخل وكدة بـ16

جنية "غير الاكراميات". وفي غسيل شامل تاني بـ35 جبية شامل العربية بالكامل بما في زلك فرش الابواب القماش وفرش

الصالون و1لك باستخدام الفوم "ممكن انت تشتري الفوم وهما يستعملوة او تستعمل الفوم بياعهم علشان هما عندهم مكنة فوم".