عروستي؟؟؟؟؟!!!!!!!

[yrashidy]

يا جماعة أنا محتاج خبرتكم و مساعدتكم عشان تنصحوني ..........

لو واحد معه في حدود ٧٠ ألف وعايز يركب مستعمل ممكن يركب إيه؟؟؟!!!!

بس بشرط تكون 1600cc أوتوماتيك و موديل فوق إل ٢٠٠٤ و عاملة كيلوات قليلة أقل من كم٥٠٠٠٠

أنا تعبت من كتر اللف و التدوير و محتاج نصيحة من الناس الجامدة في المنتدى ....
مستني ردودكم و مقتراحتكم المفيده انشاء الله ........

[Ahmed_Gadalah]

خالي اشترى مازدا 3 ب75000 من اسبوع موديل 2005 ونضيفه جداا وممكن تشوف لانسر2006 او صني
واستنى باقي الردود.

[Eslam.Elrefaey]

ميجان بيجو 307 سيتروين c4 أوكتافيا a4 لانسر بوما كرولا 2004 لسا كتييييييييير بس قول ماصفات العربية الى إنت عايزها بس أنا مع الميجان

[tarekmomo]

نيسان صنى وهيونداى الينترا 2004 دول احسن حاجة فى السعر دة

[yrashidy]

أولا يا جماعه أنا متشكر جدا جدا على الردود الجميلة و المشاركات الفعالة ...........

ثانيا عشان أسهل العملية عليكم أنا طماع شويتيين و بدور على عربية بتجمع معظم المواصفات الحلوة

انا عارف إن ده ممكن يكون مستحيل بس أنا كلي أمل إن شاء الله إن شباب نايل موتورز الجامد هيقدروا يساعدوني و يدلوني على الحاجة التمام

نخش بقى في مواصفات عربية الاحلام (بنت الحلال) و هحاول أرتب المواصفات دي على حسب أهميتها بالنسبه ليا:

الموديل : يكون فوق إل ٢٠٠٤ و تكون أقل من ٥٠-٦٠ ألف كيلو في العداد

الموتور : ١٦٠٠ أوتوماتيك يكون معروف إنه قوي و سريع الاستجابة و يكون استهلاكه ف البنزين معقول لأن مشاوييري كتيير حوالى 300-400 كيلو في الأسبوع

البودي : مش مهم تكون رشة من برا بس المهم تكون أساساتها سليمة و دواخلها فابريقة و مفهاش حوادث جامدة يعنى من الأخر تكون واقفه مصحصحة لأن مش هيبقي معايا مليم أصرفه عليها

الثبات و العفشة : لازم تكون ناعمة و ثابتة و دي من الحاجات المهمه جداعندى لأني معا يا عربية معقدانى من الموضوع ده.

الصيانة : يكوون معروف عنها انها مشاكلها قليلة و بسيطة و قطع غيارها مش مهم أسعارها بس المهم تكون متوفره لأن انا بعاني من ال مشكلة دى دلوقت برضه .

سعر ما بعد البيع: كل شئ بيد الله طبعا بس اتمنى تكون مبتخسرش كتيير لو فكرت ابعها بعد3 -4 سنيين خصوصا أنى هاحط فيها اللى ورايا و اللى قدامى

و متشكر تاني ومستنى كده تتحفونى بأقتراحتكم الجامدة و خبراتكم السابقة..............

[yrashidy]

أيه يا رجالة !!!! ولا رد واحد

ممكن يا جماعة حد يرشحلى حاجه بس يا ريت يكون متأكد من السعر و يكون عارف العربية عن تجربة مش سماعي

[M0dY]

النترا 2006 عربيه محترمه جداً .. اوكتافيا a4 بس كده هتجيبها موديل قديم شويه مش ينفع اوتوماتيك ناس كتير بتشتكى منه .. لانسر بومه .. انا فنفس حرتك برده بس الى هلاقيه ادامى حالته نضيفه هدوس على طول .. ربنا يوفقك

[nab!l]

لانسر

[esam_comm]

لانسر
النترا
اوبترا

[yrashidy]

أنا متشكر على الردود الإقتراحات و أنا بالفعل بدأت أتفرج و بقارن ما بين تلات حاجات بالترتيب :

أوبل أسترا 2005 -2006

رينو ميجان 2005 -2006

النترا 2005-2006

الانسر فوجئت ان النضيف منه سعره عالى شوية عن أمكانباتى فبا ريت يا جماعة تتموا جميلكم معايا و تقولولى انتوا بترشحوا ايه من التلات حاجات دول و أيه اللى تعرفوه عن مميزاتهم و عيوبهم

[Karim_Mohy]

ممكن صني عربية محترمة

[محمد أنور]

انا في نفس حيرتك بالظبط و بدور على لانسر 1600

[kar!m]

بص كل الاختيارات اللى حضرتك بتقارن بينها هتديك نفس الأوبشنز اللى حضرتط طالبها ما عدا حاجة واحدة وهى انك لما تيجى تبيع متخسرش كتير و الميزة دى مش موجودة غير فى الالنتر واللانسر (من اختياراتك) و بما انك استبعدت اللانسر فالالنترا هى اللى فاضلة :-) وهى عربية ممتازة بصراحة (رأيي)

[a7madramadan]

يــــــــــــاريت تلاقي لانسر ماكانش كده توكل على الله و هات اوبل استرا 2006 اعتماديتها عالية و عيوبها نادرة جدا فقط ان قطع غيارها غالية حبتين عشان الماني

[m000dy]

نصيحة اخ وعن تجربة اصحابى ملاك اللانسر والابينترا الشيب بتاع موديل 2005 وبناء على مواصفات حضرتك
الالينترا تكتسح