موتور العربية جنني

[snowlandeg]

السلام عليكم و رحمة الله
احبابي اعضاء المنتدي الكرام اود مشاركتكم مشكلتي الخاصة بسيارتي سوزوكي سويفت 95
العربية مشتريها من سنة
سخنت مني و دخنت و عطلت بيا في القاهرة. سبتها هناك تاني يوم جبتها و رحت للميكانيكي كان خرطوم ميه ضرب و غيرته و قالي الموتور سليم مافيهوش حاجة و ما جبش جوان.

بعدها بمده لقيت في غطا الموتور طحينة. رحت لمكانيكي عندنا قالي جوان قلت غير.
غيرنا الجوان و اخدت العربية ظبطت معايا اسبوع و بعدين رجعت الطحينة تاني
رحت لميكانيكي تاني فكها و قالي غيرت جوان و خرطت الوش
الكلام ده كان في الصيف اللي فات . بس العربية كانت بتعمل حركة غريبة بعدها لما تكون سخنة و ابطلها تضرب ميه من الفايز بتاع قربة الميه.
دوخت علي سبب المشكلة طلع غطا الريدياتير من غير جلدة. غيرته بواحد جديد.
ظهرت الطحينة تاني رحت للميكانيكي الاخير قالي الطحينة بسبب جلدة غطا الريدياتير و كان هيقطعها و طلع هو اللي شال الجلده من غطا الريدياتير الاولاني و ما قاليش
قلت له خلاص هركب الغطا القديم و ما تعملش حاجة

و الصيف خلص علي كده

اليومين دول رحلت لميكانيكي تالت قلت له علي اللي فات قالي هنفك و نشوف لو الوش هيتغير كله و لا لأ. قلت ماشي.

اشتغل لقي الوش سليم و غير الجوان ب 2 دوبل ياباني و جبتهم مخصوص من بتوع الياياني في الزقازيق. و خلص شغل.
لقيت تاني يوم اثر خفيف للطحينة قالي دا بخر هيروح مع الوقت.

رحت بعدها ب 3 ايام يحرق علي الوش و يظبط تاكيهات و موتور. لان العربية سبحها كان في الارض و بتاكل بنزين.
الحمد لله العربية قطعت طحينة خالص و بقت كويسة.


النهاردة الصبح بفتخ الغطا لققيت الطحينة ظهرت تاني بزيادة.

حد يفهمني اعمل ايه؟؟؟؟؟؟؟

[Abo_Mazen]

بص ..هسألك كام سؤال ..وبناء على إجابة الإسئلة دي ..هقولك حاجه من التلاته ...يا تغير المكنه كلها ...يا تغير وش بس ..يا تجيب جوان أصلي عشان تخلص من المشكلة دي ..ومعلش فيه حاجه ..إجابة الإسئله دي كلها إجباري ..عشان هي مرتبطه ببعض :
أولا :لما كنت بتيجي تغير الجوان في المرتين الأولانين ..كان الجوان بيطلع سليم ؟؟...يعني مثلا الميكانيكي لما بيطلع الجوان ..كان بيلاقي في شرخ مثلا في حته معينة ...أو في حته معينة كده مسوده أكتر من اللازم أو محروقه قوي ...أو في حته في الجوان شكلها كده مضعضع ...
ثانيا : بعد لما كنت بتعمل جوان وش سلندر للعربيه ..أثناء مشيك على الطرق المفتوحه ..كان مؤشر الحراره بينزل معاك ..يعني مؤشر الحرارة مثلا معتاد عندك إنه في الربع أو النص ..لما كنت بتمشي على طريق مفتوح ..كان مؤشر الحراره بينزل معاك على السرعات العالية ؟؟؟؟
ثالثا :بعد ما كنت بتعمل جوان وش سلندر ..كنت بتغسل الريداتير إزاي ..بتغسله بنظام الدورة المغلقه ..ولا بنظام خرطوم في الريداتير والعربيه دايره ؟؟؟
رابعا : جوان وش السلندر لما إتعمل أول مرة ..الوش إتمسح ..أو إتقشط ..ولا الوش إتقشط كام مره بالضبط؟؟؟ ..

إجابتك على الأسئلة دي هتساعدني كتيييير عشان أقدر أساعدك في إتخاذ قرار ..بتسقيط مكنه ..أو أقولك تعمل إيه بالضبط

[اسامه نور الدي]

العربيه كده فيها تقفيع بمعني ان السلندر بقي فيه عالي وواطي ودا بيؤدي الي السخونه المستمره للعربيه و علي طول ضرب جوان طوالي روح لواحد ميكانيكي و خليه يبص مع الخراط ع الجوان و يعمله لانه طول ماهو مش مستوي هتفضل تاكل جوانات و تسخن

[snowlandeg]

شكرا اخي علي الاسئلة و سرعة الرد معلومة احب اوضحها خلط الزيت و الميه بيظهر في الغطا فقط
لكن مقاس الزيت نظيف في كل المرات اللي فاتت.
يعني تقريبا و الله اعلم الخلط بيبقي فوق بس

أولا :لما كنت بتيجي تغير الجوان في المرتين الأولانين ..كان الجوان بيطلع سليم ؟؟...يعني مثلا الميكانيكي لما بيطلع الجوان ..كان بيلاقي في شرخ مثلا في حته معينة ...أو في حته معينة كده مسوده أكتر من اللازم أو محروقه قوي ...أو في حته في الجوان شكلها كده مضعضع ...

اول مرة كان الجوان مقطوع للاسف المرتين التانين ما كنتش حاضر الفك

ثانيا : بعد لما كنت بتعمل جوان وش سلندر للعربيه ..أثناء مشيك على الطرق المفتوحه ..كان مؤشر الحراره بينزل معاك ..يعني مؤشر الحرارة مثلا معتاد عندك إنه في الربع أو النص ..لما كنت بتمشي على طريق مفتوح ..كان مؤشر الحراره بينزل معاك على السرعات العالية ؟؟؟؟

وانا علي الطريق الصحراوي كل ما اسرع الحرارة بتنزل لغاية الربع اللي تحت

الثا :بعد ما كنت بتعمل جوان وش سلندر ..كنت بتغسل الريداتير إزاي ..بتغسله بنظام الدورة المغلقه ..ولا بنظام خرطوم في الريداتير والعربيه دايره ؟؟؟

خرطوم في الريداتير و العربية دايرة

رابعا : جوان وش السلندر لما إتعمل أول مرة ..الوش إتمسح ..أو إتقشط ..ولا الوش إتقشط كام مره بالضبط؟؟؟

الوش اتقشط مرة واحدة بس مع تاني ميكانيكي


ممنوع إستخدام اللون الأحمر حيث أنه مخصص للمداخلات الإدارية
م.ع 7

[Abo_Mazen]

طيب جميل جدا ..إنت فرحتني جدا بالمعلومات دي ...إنت كده بنسبة 80 في المائة المشكلة عندك فنيه من الميكانيكي التحفة اللي بتتعامل معاه ..بص ..هقولك على حاجه عشان أخوك كان برضه كده ..حوارات جوان وقرف لمدة سنة ونص ...و لله الحمد..وبسم الله ما شاء الله ..الموضوع خلص بعد ما عملت شوية حاجات كده بالترتيب ..وقبل ما أعمل الحاجات دي قلت لنفسي دي آخر مره هعمل فيها جوان عشان أتأكد ..هرمي المكنه ولا لأ ..وقلت هدفع 300 جنيه بس هبقى خدت قرار ..إما هوفر على نفسي سبع تلاف جنيه ..اللي هي مصاريف تسقيط مكنه ..أو ربنا بقى يوفر عليا المبلغ ده ويبقى رزقني بيه..خلي بالك أنا عملت جوان أربع مرات ..طبعا الكويس في كلامك لما قلتلي إن أول مرة الجوان كان مقطوع ..إن معنى كده إن المشكلة كانت من الجوان مكانتش من البلوك ..وإن اللي عمل المشكلة في الجوان وخلاه يتقطع التقفيع اللي كان في الوش واللي كان المفروض يتعمل من أول مرة ..ثانيا ..حكاية إنك لما تطلع على طريق مفتوح الحرارة تنزل معاك ده دليل إن مفيش عندك تسريب حرارة من وش السلندر على دورة التبريد عندك ..وده معناه برضه إن البلوك ولله الحمد سليم ..
بص بقى ...أولا لو حضرتك من إسكندرية ..كنت هبعتك لواحد يعملك الموضوع ده كما يجب أن يكون ...لو حضرتك مش من إسكندرية يبقى تروح لميكانيكي تاني ويفضل إنه يكون إشتغل في ا لعربيه دي قبل كده ..أنا بقول يفضل..لكن مش لازم ..ثانيا ..هتفك الوش ..وهتقيس الوش ..لو لقيت الوش مقفع ..يبقى ما تمسحش الوش ده تاني ..الوش ده يترمى ويتجاب غيره ..عشان برضه ما تدخلش في فرعيات ..خلينا نركز في حاجه واحده بس..لو لقيته سليم ..وده في الغالب اللي هتلاقيه بإذن الله عشان مفيش حرارة عليت أصلا عندك من يوم ما مسحت الوش ..يبقى هتجيب جوان أصلي ..تجيب جوان واحد بس أصليييييي...وده تجيبه من عند أي حد بتاع قطع غيار سوزوكي سويفت ...لو عايز ناس في القاهره ممكن أقولك على واحد كويس خلف محطة القطار في أحمد حلمي عند بنزينة التعاون إسمه ميدو الكنج ..بعد الجوان ما يركب وكله تمام ..تخلي الميكانيكي يضبط تاكيهات وميخليهاش محمله ...بعد كده تقوم منزل الزيت اللي عندك كله وتحط زيت تعاون تقيل ..اللي هو يمشيك ألف كيلو تقريبا ..عموما هو الزيت اللي بيستخدموه في التليين بعد العمرات ..هتلاقي الميكانيكي عارفه كويس ..نبدأ بقى مرحلة المراقبة والمتابعة ..لما تمشي بالعربيه هتلاحظ إن في طحينه بتظهر معاك في الغطا ..عادي ..ما تشغلش بالك ..لو الطحينه اللي بتظهر عندك في غطا الزيت ثابته يعني ما بتزيدش ..يبقى ده عادي ..لكن مش عادي علطول ..المفروض إن الطحينه دي هتظهر وتثبت كده على معدل معين ..يعني ما تزيدش ..وبعدين هتبدأ تقل تقل تقل لغاية ما بإذن الله مش هتلاقيلها أثر ..ولو عايز تتأكد أكتر إن كانت الطحينه دي رواسب ولا مياه متجدده داخله على دورة الزيت ..نزل الزيت بعد إسبوعين مثلا ..اللي هو الزيت الغشيم ده بتاع التليين اللي قلتلك الميكانيكي عارفه ..وحط غيره ..المفروض هتلاقي الطحينه دي بتقل أكتر بعد تغيير الزيت ..ومع المشي المفروض تختفي ..خلي بالك ..الحر ظهر ..وحاول تمشي بيها في الحر كتير أكتر من الطرق المفتوحه ..عشان المياه اللي في الزيت دي تتبخر بسرعه ..جرب وشوف ..وبإذن الله ..ما تشوف إلا الخير

قبل ما أنسى ..لالالالالازم الميكانيكي يحرق على الجوان بعد أسبوع من التركيب

وإبقى طمنا عملت إيه وتابعنا كده أول بأول

[snowlandeg]

سيدي الفاضل
انا من العاشر من رمضان و العربية اتعملت في بلبيس اخر مرة والرجل كشف علي الوش قال سليم مافيهوش مشكلة

اتركب لها جوان اصلي الميكانيكي بعتنا لواحد في الزقازيق علشان اشتريه منه الكلام ده الاربعاء الماضي و الميكانيكي غير الزيت بزيت التعاون تقيل فعلا حتي انا عملت فيلم ازاي يحط زيت ديزل التعاون في عربيتي قال لي دا زيت للغسيل و بعدين هينزل و تغيره.

رحت له امبارح السبت بعد ما شدينا معاه علي اثر الطحينة الخفيف ظبط تاكيهات و حرق علي الوش
و قال استني شوية و غير الزيت
لغاية كده كله تمام و الطحينة فعلا بتقل

بس النهاردة الصبح لقيت اثر الطحينة زاد مرة واحدة .هستني و اتابع الطحينة دي اعمل ايه.

[Abo_Mazen]

سيدي الفاضل
انا من العاشر من رمضان و العربية اتعملت في بلبيس اخر مرة والرجل كشف علي الوش قال سليم مافيهوش مشكلة

اتركب لها جوان اصلي الميكانيكي بعتنا لواحد في الزقازيق علشان اشتريه منه الكلام ده الاربعاء الماضي و الميكانيكي غير الزيت بزيت التعاون تقيل فعلا حتي انا عملت فيلم ازاي يحط زيت ديزل التعاون في عربيتي قال لي دا زيت للغسيل و بعدين هينزل و تغيره.

رحت له امبارح السبت بعد ما شدينا معاه علي اثر الطحينة الخفيف ظبط تاكيهات و حرق علي الوش
و قال استني شوية و غير الزيت
لغاية كده كله تمام و الطحينة فعلا بتقل

بس النهاردة الصبح لقيت اثر الطحينة زاد مرة واحدة .هستني و اتابع الطحينة دي اعمل ايه.

طيب جميل ..يبقى حضرتك أصلا عامل تلات تربع الكلام اللي أنا قايل عليه ..يبقى باقي بس حتة المتابعة إن كانت الطحينه دي بتزيد ولا ثابته ولا بتقل ..وافيني بالأخبار برضه

[snowlandeg]

الحمد لله حتي الان لم تظهر الطحينة مرة اخري و الموتور بفضل الله اصبح سحبه جيد و فاضل تغيير الزيت

[Abo_Mazen]

الحمد لله حتي الان لم تظهر الطحينة مرة اخري و الموتور بفضل الله اصبح سحبه جيد و فاضل تغيير الزيت

لله الفضل والمنه...والحمدلله الذي بنعمته تتم الصالحات

[snowlandeg]

امبارح بالليل لقيت اثر للطحينة تاني بعد ما قطع يومين تلاته . مش عارف اغير زيت و لا اعمل ايه؟ ..............

[Abo_Mazen]

امبارح بالليل لقيت اثر للطحينة تاني بعد ما قطع يومين تلاته . مش عارف اغير زيت و لا اعمل ايه؟ ..............

الطحينه اللي ظاهره لونها أبيض طحيني فاتح ولا طحيني غامق ..وطحينه تقيله ولا تحسها كده أقرب للرغاوي منها للطحينة ؟؟؟؟؟

[ahmed1981]

لقيت أثر الطحينة فين ؟؟
العربية بتسخن ولا لأ
إفنح الردياتير وشوفه بينفخ ولا لأ

-

[snowlandeg]

الصورة ابلغ من الكلام

[snowlandeg]

الصورة توضع منظر الطحينىة في غطا الموتور

[snowlandeg]

اسف علي عدم ظهور الصورة. صورة الطحينة مرفقة.

https://www.dropbox.com/s/lnsflztbrq0dcp5/2015-05-01%2012.50.48.jpg?dl=0

https://drive.google.com/file/d/0B6qL3zHFJ9sSaUVEa0hkenUwUVU/view?usp=sharing